سديته منه ودخلت يم البنات وكعدنه نسولف وامي تضحك وتشاقه ويانه وكلش فرحانين بوضعهه الحمدلله زينه هالايام وكمنه اني واسماء دنسوي عشا خابر ابويه كال لتسون حجيب من بره وفعلا جاب وتعشينه وامي اخذت علاجها ودخلت تمددت واسماء هليام تكعد هواي بلغرفه ومرات اشوفهه تراسل عرفت اكو حب بلموضوع ههههه بس استغربت لان هي متحب هالشغلات الجو حلو وره ٨عاد نظفت المطبخ وره العشى وسبحت وكعدت خليت التليفون عالشحن وابويه طلع راح يم بيت عمتي ودخلت لامي لكيتهه نايمه بستهه وغطيتهه وطلعت سديت الباب صارت بلعشره الا ربع اخذت التليفون وطلعت للحديقه اخذت حبشكلات وياي جبس وحب ونستله وقوطيه ببسي احب اسوي لنفسي اجواء واني اسمع برنامج شعر وغزل بلراديو فتحت الجبس واستمع ونفسيتي حييييييل مرتاحه وجان يدك تليفون باوعت صابرين طبعا كلهم سميتهم صابرين مجرد اغير الرقم ههههههه وصابرين مسميتهه ام حسين عاد جاوبت بصوت يشبه الهمس لان جنت كلش ريلاكس
الووو
علي:: اروح فدوه للالو
ساره:: ههههه شلونك
علي:: بخير اذا انتي بخير ... انتي شلونج جنج مرتاحه اليوم
ساره :: اي والله الحمدلله كلش مرتاحه اليوم لان امي وضعهه زين واني من اشوفهه زينه ارتاح نفسيا
علي :: انشالله دوم تشوفوهه مرتاحه وزينه الله يشفيهه ويحفظهه الكم
ساره:: امين يارب شكرا على دعائك الهه ربي يحفظلك اهلك
علي :: امين يارب .. اي سرو سولفيلي عليج
ساره:: شتريد تعرف عني اشو انتو تعرفوني اكثر من نفسي ماشاء الله ههههه انت سولفلي عنك خلي اتعرف عليك
علي:: ههههه حقج والله .. عموما اسمي علي عمري ٢٥بكد حيدر اني .. عندي محل موبايلات عندي ثنين اخوان واحد اكبر مني متزوج وعنده ثنين اطفال وواحد اصغر مني طالب متوسطه وعندي خوات اربعه وتلاثه مزوجات ووحدة طالبه اعدايه رابع وامي وابويه بلوجود والحمدلله
ساره:: ماشاء الله الله يحفهم الك حلو من تكون العائله جبيره ومن تكون ولد وبنات احس حتى لمتهم عالاكل تكون غير وخصوصا برمضان
علي :: اي صح برمضان حلوه لمتنه بس بلاشهر العاديه لا نادرا ناكل سوه لان كلمن بوقت يطب بلبيت وهاي اختي ومرت اخوي مبتليات بينه خطيه هههه اني مرات بليل من ارجع متاخر اكل بره لفه او اي شي في سبيل ماكعدهن هم خطيه هنه وخصوصا مرت اخوي اطفالهه زغار وحامل
ساره:: اي صح خطيه بس مع ذالك حلو ... اني اشوفهه من نروح لبيت خالتي هم عائلتهم كبيره تجنن لمتهم ابقى اقارن بينه وبينهم مثلا احنه جنه تلث خوات وامي وابويه صح نلتم عالاكل كل يوم بس قليلين واختي الجبيره تزوجت وبقينه بس ثنين بس شنكول الف الحمدلله على كلشي
علي :: شعجب ابوج متزوج علمود يصيرله ولد؟؟؟
ساره:: حتى نكتله ونكتل مرته خلاص احنه وامي هههههههه لا اشاقه بس امي صارله سبع ولد بس كلهم ماتو اما بلولاده او يبقون كم يوم ويموتون وابويه اقتنع انه هذا رزقه بلدنيا بس بنات مع العلم امي كالتله تزوج بس هو مقبل كلهه اولا منو يكول يصيرلي ولد احتمال هم بنيه وثانيا والاهم انتي وبناتي عندي بلدنيا كلهه بس شوفتكم تسوه ابو الولد
