رجعو اهلي من الدكتور ودخلو وسالتهم شكال كال ابويه كل الخير انشالله بس امي ماعرف شبيهه وسويت العشا وكملنه ونظفت وكالعاده امي اخذت علاجهه ونامت وابويه كاعد بلحديقه يشرب جاي طلعت كعدت يمة بس احس ابويه مهموم عاد سالته
ساره:: ها بابا شو كاعد اهنا اليوم شعجب مطلعت
ابو ساره:: مابيه شي حبيبتي بس تعبان وكلت اكعدلي ساعه واطب انام
ساره :: لعد شبيك شو مو على بعضك من جيتو من الطبيب لهسه
ابو ساره:: امج بابا وضعهه معاجبني واليوم الدكتور خلاني بحيره
ساره بقهر:: شبيهه وشكال الدكتور
ابو ساره:: يكول المي صاعد بصدرهه وبادي يصير بلرئتين لذلك تختنك .... ولازم ينسحب
ساره:: اي وشننتظر خلي ناخذهه للمستشفى ويسحبوه منهه مو كل مره هالشكل
ابو ساره:: سوالهه الدكتور فحوصات وتحاليل اسبوع وتطلع وناخذهه يسحبوه هو كال هسة مستقر وضعهه والله كريم
ساره:: متت قهر مادري على امي ووضعهه لو على ابويه الحاير بامي ..... كتله الله كريم بابا كوم نام وارتاح وانشالله مبيهه الا العافيه بس اني بداخلي ميته وحايره بكد حيرته واني اشوف امي تذبل يوم على يوم
نمت حتى ايهم مخابرته مالي واهس احجي ويه احد وثاني يوم خابرني هو سال عن امي واحوالهه ومتاخر بلمكالمه لان يدري عندي قرايه كالي بعد اخابرج بس بليل اسمع صوتج واطمن واسده منا لوره الامتحانات وفعلا انقطعنه والتهيت ادرس ووره يومين الصبحيه ندك الباب وامي بلحديقه وابويه بدوامه طلعت امي واني مشغوله اسوي غده علمود اكعد اقره فمعرفت منو اجه وره تقريبا نص ساعه صاحت امي كالت جيبي مي اهذت دولكة وكلاص وطلعت ونصدمت شفت ايهم كاعد يم امي ارتبكت وسلمت انطيتهم المي وطبيت بس جان سلامه عادي بس اني وكف كلبي وبقيت اراقب من الاستقبال وهو يسولف هو وامي وكانه يعرفهه من زمان والظحك. والميانه تقريبا نص ساعه وطلع وامي صاحتلي طلعت يمهه ها يمة
ام ساره:: كملتي شغلج
ساره:: اي ليش
ام ساره:: اكعدي شويه نسولف
ساره:: مو اريد اروح اقره بعد ٣ايام امتحاني
ام ساره:: ولج دكعدي مطايره القرايه ارد احاجيك قبل ميجي ابوج
ساره:: خير يمه شكو
ام ساره:: شفتي هذا الولد الجان يمي
ساره:: بلعت ريكي اي شبي ومنين هذا
ام ساره:: هذا قبل فتره اني اغسل بلباب واجه هو فات وسيارته حاميه واخذ الصونده بردهه وبقينه بوكتهه نسولف اني ويا شويه وهو لامحج بلطرمة ورايح سائل علينه وعليج بلذات واليوم جاي مخصوص حتى يخطبج ويشوف نطيج لاااا
ساره:: هااا وين شايفني
ام ساره :: يمه هذا الولد مشتريج ورايدج وهو حلو وجبير يعني عاقل ورزن مو من ذول الطايشين ومادام هو الرايدج يعني يوفرلج التردي ويدللج وهو من هسه يباوعلج مباوع انتي يمكن مانتبهتيله بس اني انتبهت من طلعتي يريد ياكلج بعيونه يمه وابو المثل يكول اخذي اليريدج لتاخذين التردي
ساره:: بس يمه ودراستي شلون (متدري اني الاريده ومتفقين على كلشي هههه)
ام ساره:: عود نكله تكملين هو انطاني عنوانهم ورقمه وكال سالو علينه ورجعولي خبر حتى ادز خواتي ونسوان عمي لان هو اهله متوفين يعني طركج طركة بلبيت
