انصدمت من ابويه ظربني لان ابويه بحياته كلهه مظاربني ابد صح من اسوي شي غلط يرزلني بس ابد مضاربني نقهرت حيل لدرجه لبست الصايه وطلعت ورحت على بيت ام حسين دكيت الباب فتحته صابرين لان الظاهر جايه الهم بنفس اليوم بحيث راسا شبكتهه وكمت ابجي وهي متفاجاه وتسال شبيه ودخلنه جوه واجت حوراء ورايه وتلكتني امهه وبيبيتهه واني بس ابجي بحيث ام حسين بس كالتلي شبيج انفجرت بلبجي بدون مانطق حرف بس حوراء حجتلهم انه اني ماريد اتزوج لان كمت ماشوفه الاوحش خلت راسي ام حسين على رجلهه واني ابجي وهي تقره ايات حسيت كانه امي وياي وتره عليه لحد مصارت ساعه بتلاثه وهديت شويه ورجعنه للبيت وثاني يوم مكعدت عالريوك ولا غده ولا عشا زعلت على ابويه وثالث يوم هم مكعدت عالريوك واجه ابويه وكعد يمي وكال
ابو ساره:: بابا ليش هيج تسوين وتشلعين كلبي اني عوزي ضيم يابتي
ساره :: مجاوبت بس ابجي
ابو ساره:: حتلو ردت افسخ خطبتج هم ميكلولي وين جنت هسه يله حجيت بعد ماجهزنه ورتبنه امرنه عالجمعه وهسه مباقي شي اليوم احد والخميس المفروض الحنه يعني وين صايره هاي افسخلج قبل اربع ايام ..... استغفر الله بابا وين جنتي صار ست اشهر
ساره ببجي ؛؛ بابا مجان اكو شي جان من يجي طبيعي بس هسه صار اسبوع حتى اخاف اكعد يمه .... زين انت متخاف عليه يصير بيه شي هسه اني كعده من اكعد يمه شويه اخاف منه لعد لو تزوجنه وعشت ويا بنفس الغرفه شلون يمكن اتخبل بابا افهمني الله يخليك بابا انت تدري حتى اختنك بابا الله يخليك لتظلمني بهالزواج كافي ظلم الدنيا الي من اخذت امي فدوه بابا ابوس ايدك
ابو ساره :: كومي تريكي واكليلج لكمه باعي حالج ولا كانه زواجج بعد اربع ايام كومي الله يرضى عليج
ساره:: ماريد ماشتهي اريد اموت وارتاح
ابو ساره:: كومي لتشلعين كلبي كومي اكلي والله كريم
ساره:: خله وطلع ابويه واني هم كمت وراه غسلت وصبيتلي جاي وسويت لفه جبن واسمعه يحجي بلتليفون
ابو ساره :: الله يساعدك ابو مصطفى (اخو احمد ) شلونكم الوالده الولد ... الله يسلمك ابو حمودي تكدر تجيب الوالده وتجي العصر ..... لا انشالله ماكو شي .... انشالله انتظركم ... حبيبي حبيبي الله وياك
ساره:: وفعلا اجوي العصر وابويه حجه لام احمد كوووول الصار وكامت تدك وتلطم
ام احمد:: على بختك ابو ساره شلون تريد تبطل مبقى شي للعرس والدنيا كلهه عزمناهه ودرو بلموعد
ابو ساره:: والله يام احمد سولفتلج والبنيه صار يومين لا اكل ولا شرب بس تبجي وتخاف من احمد
ام احمد :: اكدر اشوفهه واحجي وياهه
ابو ساره:: اي يابه البيت بيتج تفضلي
ام احمد:: دخلت جوه وشهكت اباوع البنيه ذبلانه والعيون داخله جوه ومنفوخة من البجي انقهرت عليهه بس بنفس الوقت ماكدر انطي بابني .... ساره حبيبتي شلونج
