وفعلا راحو وهمه ماخذين الموافقه ثاني يوم ابويه دز على بيت خالي وحجالهم الي صار بيني وبين ياسر كلهم اني مذاب بتي عليه حتى هو يحملهه منيه انه هو خطبهه والحمدلله بعدنه معاقدين وعرفته شنو هو فمنا وبعد تعتبر الفاتحه ملغيه بينه وبينهه وخالي تفهم الوضع ومعارض بلعكس رجع على ابنه ورزله وانوب انطاهم ابويه خبر بخطبتي لا حمد اي الولد اسمه احمد وره يومين صادف يوم ثلاثاء اجوي امه ومرت اخو الكبير ودزينه على حوراء وابويه موجود اتفقو على الحاظر والغايب والذهب وهاي الامور وابويه كلهم ماكو زواج الا وره السنه مال امهه وماعترضو وافقوا واتفقو يوم الجمعه مشيه الزلم وعقد سيد بس شنو اني بلا شعور بس شعور الحزن على امي هو الطاغي مانكر شعور الغضب على ايهم موجود بس خلي هو الراد هالشي ...... رحت ثاني يوم اني وحوراء للسوك واشتريت تنوره سوده وستره سوده ستن قصير كولش حلوات وشال اسود اني ما تحجبت بس لان حزينه كمت البس الشال بس مو حجاب كامل والبس جواريب سوده خفيفه منطلع ابد بدون جواريب اني وخواتي ...... واجه يوم الجمعه وحظرن خالاتي ومرت خالي من الصبح وخواتي اكيد وازواجهم وخالي وعمامي وسوينه الغده ورتبنه البيت وراه لان المشيه ساعه ب٤ عاد كمت سبحت ولبست التنوره والستره وجواهه سترابلس اكيد هم اسود وسشورت بس كذلتلي وتعطرت وبس كولشي مسويت بعد وذبيت الشال على راسي وجواريبي اكيد ودخلت خليت الجاي عالنار لان كالو اول ميدخلون جاي ووره مايتهم العقد كيك وعصير وبقيت بلمطبخ بس ماكو اي علامه فرح على وجههي لان خلصت من ياسر وربطت نفسي بغيره واني كلبي مو يمهم اصلا .... وحضرت الاستكانات وجان نسمع صوت الهورنات واجوي طبعا جايين بلعشرين سياره وكلهه معكله وولد شباب وكومه عالم عمامهم وخوالهم والاصدقاء ودخلن بناتهم خواته وخالاته وعماته وبيبيته وامه اكيد والفرحه على وجهم تقره مليار بوستهم وكلهه تصلي على محمد رغم اني ممخليه مكياج او حافه بس جنت كلش حلوه طالعه وخصوصا الاسود لايكلي بحيث حته هنة خلاته يكلولي ماشاء الله احلى عروس نشوفهه وهي بدون مكياج ولابسه اسود فرحت شويه بكلامهم ورحت للمطبخ اريد انهزم من واقعي بحجه اصب جاي وبقن خواتي وخلاتي ومرت خالي وعمتي يمهم وبلفعل صبينه جاي وازواج خواتي ابتلو بلتقديم خطيه مي وجاي وكذا ووراهه بدت مراسيم الخطبه وتمت وبدو جماعته واخوانه وولد خواله وخواله يهلهلون عاد ابويه كلهم بدون هلاهل لان احنه قبل اسبوع اربعين امهه. وفعلا سكتو وصاحولي للغرفه لفيت شالي عدل كانه محجبه ورحت دخلت لكيت ابويه وعمي والولد وجده لان ابوه متوفي والسيد كعدت يم ابويه وبده مراسيم العقد وعقدنه بس حسيت كانه ذبحت نفسي بنفسي كالو مبروك وطلعو همه وردت اطلع عمي كال شويه وطلعي بقيت كاعده ومدنكة حتى مباوعت بوجه احمد ولا شفته بس من سدو الباب حسيته اجه كعد بصفي وكال مبروك كتله شكرا وسكتت واني مدنكة عاد كام واني هم كمت ورفع راسي بايده وصفن بوجهيي شويه كال باوعيلي بس اني مستحيه كولش مكدرت كال باوعيلي شبيج بس اشوف عيونج هنا باوعتله ورجعت دنكت عاد باس راسي وفتح ايدي خله بيهه ١٠٠ دولار وكال هذا بياض الخطبه ماعرف شنو هو بس سكتت عاد طلع هو وطلعت وراه رحت يم النسوان تلكوني يباركون وخلاته كولش كولش حبابات وبوسوني وباركولي وهمه يردون يبجون على حالي وطلعو وقبل ميرحون حركو الجو حرك بلرمي عود دلاله على فرحهم وخلو وراحو.... احنه عادي عدنه كانه مصاير شي لملمنه البيت ونظفنه لان ورق الجكليت مالي البيت طشو جكليت همه هواي بس بدون هلاهل المهم نظفه وسوينه العشه تعشينا وراحو الكل واني رجعت الحاتي وروتيني الممل وثاني يوم اجوي احمد وامه ومرت اخو الجبير ومرت اخو الوسط جابولي فلوس للذهب والملابس وبقو ساعه تقريبا وراحو اكيد بحضور ابويه واني من نوع بسرعه اذب ميانه اخذت بساع عالبنات كلش حبيتهن طبعا احمد هم خوش ولد
مواصفاته طوله ١٧٥ جسمه عادي بس حلو ماعنده كرش واسمراني عيونه عسلي فاتح شعره سرح وصاحب حواجب ثخان ورسمه تخبل واهم شي حباب وحنين ..... مرت على خطبتنه شهر ونص صح اخذت عليه واسولف واضحك بس ابد ماعندي مشاعر تجاهه وشكد حاولت اطلع ايهم من بالي ماكو مكدرت انوب اشتياقي اله يوم عن يوم يزيد ويوميه ادخل على محادثاتنه واقراهن وساعه اضحك على عركنه وغيرته وساعه ابجي لان اريده ...... وشوقي لامي زاد حيل وتعبني فراكهه حيل واذاني لدرجه تهسترت وكمت بس ابجي النهار واليل عليهه وطبعا ابويه كل جم يوم ياخذنه الهه للنجف بس ميبرد كلبنه واجتني فتره كمت فجأه افقد الوعي ويغمى عليه بدون سابق انذار ورحت وفحصت يكولون حاله نفسيه حتى احمد وامه اجوي اخذوني لكربلاء بتنه هناك ورجعونه للنجف هم زرنه وانوب ودوني لامي لان اني اندلهه وهم كعدت يمهه صفيت راسي وكوه كوموني واخر فتره حتى كمت اختنك وبقيت على هالحال شهرين بحيث احمد تخبل عليه كام كل شهر يجيب اهله يحاجون ابويه علمود نزوج يكول الابويه راح تتخبل من الوحده طبعا احمد يجيني بين يوم ويوم وتعلمت عليه بس ابد مو شعور حب وفعلا بعد ست اشهر قنع ابويه انه ازوج عقدنه محكمه وبلرجعه اني وهو وابويه وجده وامه وحوراء بلسياره احنه وكفنه بلازدحام وجان اشوف ايهم متتخيلون النار الي اشتعلت بيه وكوه مسيطه على نفسي ومابجي وهو هم بقه صافن بوجههي عاد رجعنه للبيت وحددو العرس بعد ١٠ايام رجعنه من العقد واجتي صابرين جانت يم اهلهه بقت كاعده وسوالف عاديه وبس طلع ابويه كال
صابرين :: ساره راح اكولج شي بس مو تضوجين
ساره :: احجي شكو على شنو اضوج
صابرين :: انتي تدرين اني مزوجه اخو حيدر
ساره:: اي ادري وشنو الجديد
صابرين :: وحيدر يصير ابن عم ايهم هم تدرين
ساره:: صابرين شبيج احجي وفضيهه
صابرين :: وتدرين اخت ايهم ماخذه حماي الجبير؟؟؟
ساره:: لا
صابرين :: عبير اخت ايهم ماخذه حماي الجبير لذلك ايهم كل اسبوع اسبوعين يجي علينه
ساره:: واني شكو
صابرين:: اخرجيه الاجيت بيهه الاهلي من رجعت لكيته يمنه وبقه عالغده وره الغده حيدر طالع وزوجي هم طلع لشغله وعمتي وعمي نايمين فبقى هو واخته كاعدين بلهول واني صبيت جاي وداودي الهم وسمعتهم يحجون بيج ومن دخلت سكتو عاد انطيتهم الجاي وخذت زنوبه نايمه منهم وكتلهم راح اروح انام وطلعت ووكفت وره الحايط اتصنت
ساره:: شيحجون بيه
صابرين:: عبير سالته عن احواله
ايهم :: مو زين والله عبوره
عبير:: شلونهه ساره ماتصالحتو
ايهم:: لا متصالحنه
عبير:: ايهم خويه احجيلي شصار بينكم جوز اكدر اساعد ترجعون
ايهم:: ميفيد بعد الحجي
عبير :: بس كلي شصار
ايهم:: عبير بيوم وفاه امهه بقيت ادك وادك وماكو واني ادري بامهه بلمستشفى وخفت حيل كلت بس لا صار بيهه شي وفعلا وره يومين جاوبت بس مو هي بنيه جيرانهم اسمهه نوركالت منو انت كتله انتي منو وهذا مو تليفون ساره كالت اي بس ساره امهه توفت وتليفونات بناتهم ظموهن يمنه هنه وذهبهم ... اني هنا متت قهر عليهه وهي اخر فتره كلش تعلقت بامهه انوب هسه ماتت كلت شصار بيهه كتلهه شوكت كالت البارحة الثالث مالتهم بس همه مو بيتهم بيت خالهم حتى الفاتحه تشكرت منهه وسديته لليل دك عليه رقم جاوبت بنيه سلمت عليه وكالت اني نور صديقت ساره وعادي سلمت وبدت تاخذ وتنطي بلحجي انوب سالتني شلون تعرفت على ساره مسولفتلهه بس بينت الهه شكد احبهه اشو هاي تغير كلامهه كالت بصراحه ساره تضحك عليك مصدكت اكيد بس ردت اشوف شتكول كالت اي تضحك عليك هسه هي علاقه بيك وابن حيرانه هم عدهه علاقه بي وعدهه علاقه باخويه هم بس ماعرف علاقتيش لان من تجينه تكعد هي واخويه بلاستقبال وبحجه يريد مي يكومني ومن ارجع الكاهم مرتبكين وهي تعدل بملابسه فماعرف شيسوون من اكوم اني هنا اشتعلت ردت اردهه بس هي كملت وكالت اصلا اني كتله بيوم الثالث من رحت تليفونج يدك كالت منو كتلهه صابرين ٢ كالت طبه مرض خيولي قفلي الجهاز اصلا اني انخطبت لابن خالي هذا جنت اضحك عليه ومره من جيتج سالت صابرين بلبسكوت صدك انخطبت لابن خاله كالت اي خطيه قرو فاتحتهه بثالث امهه حتى بدون مياخذون رايهه عاد اتاكدلي هالشي بحيث كمت ماشوفهه بعيني ضجت منهه حيل رغم من جانت تخابرني تشبع بجي بس اكول لا هذا كله تمثيل وهاي ظلت كل فتره تخابر وتحشي براسي وهذا كله الصار بس تدرين احن واون عليهه
عبير:: خويه هو مبين الحجي كله تصفط انته شلون تتصرف هيج هي غير تتنفسك واني اكول البنيه حتى كامت مادك علي واني ملتهيه بالجهال بعد مادكيت عليهه
ايهم:: لا اني حضرتهه من تلفونج وتلفون ام احمد بدون متدرن
عبير :: شوف ايهم اني اسبوع اللاخ اجيكم اني وام احمد وصير خير زين
صابرين :: عاد انوب بقو يسولفون سوالف عاديه بس انقهرت حيل من نور الادبسسز وحلفت من اجي اكلج
ساره بحركت كلب:: شوكت هالحجي
صابرين :: ذاك الاسبوع
ساره:: وليش مخابرتيني وكتيلي صابرين هسه جاي تكليلي من عقدت محكمه اليوم صابرين يعني بعد ماكو رجعه صابرين وكمت ابجي حيل
صابرين:: وهي تسكت بيه والله ماعندي تليفون زنوبه ذبته بلمي واحترك ورقمج محافضته
ساره:: خلت وراحت صابرين واني كعدت ابجي على حضي ودكيت ولطمت والزاد الطين بله انه العرس بعد عشر ايام كعدت ابجي لحد مانمت بدون مادري
يتبع................................
