مشات تطلع من جيهت الدروج .. درجة بدرجة راسها هابط للتحت حتا وقفات عينيها كيطحو الدموع عيات تحبس و تصبر حتا تغلبات كتافها كيتهزو و بكاها كيزيد .. داك الضغط كامل و الفرحة تجمعات عليها و خرجات فدقة .. إحساس حلمها للي تحقق انها تقبط وليد صغير ، لحيمة، تربية خارجة للدنيا معارفو حد و محاس بيه حد .. حلمها وصلاتو و احساس عاشتو ..
جهدها تقادا حتا كلسات فالدروج كتخرج للي فخاطرها حتا تم هابط عيسى من الدروج لابس للعملية ..
شافها حتا تم هابط لعندها كيفرنس ليها : معلكش (هزات راسها فيه) درتي خدمة كبيرة و تحملتي مسؤولية كبر منك واخا يلاه بادية (مشا هابط عطيها بالظهر مكمل هضرتو) مبروك عليك ألقابلة ديالنا و اقبل اجرك ..
مشا مكمل طريقوا و هي بقات جوج دقايق وراه كتستوعب واش عايرها و لا مدحها حتى بدات كتضحك كي الحمقة .. المهم بداتها دموع و سالاتها بتقهقيه ..
ناضت من تما ناشطة و البسمة مرسومة على وجهها بدلات عليها دازت سجلات الخروج ديالها .. ركبات و مشات فحالها ..
بعد ربعة د السوايع و بعد ما دار العملية و ستقرات حالتها خرج تسناه حتا بان على خاطرو .. ركبو و زايدين فالسكات .. معاجبوش من نهار الليلة المشؤومة عندو بالحق خلاه حتا يهضر بخاطروو لكن ملّ ..
- حنحن فاتحو فالموضوع كيطرطق عنقو : اياياي اصاحبي موت د العيا دازت علينا ..
راشد كيشوف فالجيهة الأخرى: واييه الله اشافيهم و اعاوننا
دار عندو عيسى كيخطف الشوفات جيهتو و يرجع اشوف قدامو : آمين الصاط شفتك متماش من شحال هادي
راشد منهد : غا خليها على الله ..
عيسى غا سمع تنهيدتو و شنو قال فحال لاعفط على خاطرو دور الفولون لجيهت البحر .. صطاسيونا و هبطو كيتمشاو على رجليهم حتا وصلوا للكورنيش و كلسو فواحد الكرسي و الغربي كيحرك خصلات من شعرهم
عيسى كيشوف قدامو : عاودلي اخويا نسمع ليك و تسمع لي قولي خوي خاطرك حتا حاجة متستاهل
راشد كيشوف بعيد : فاش كيتهرس الخاطر كيخصو وقت باش اتجبر دابا اتكلفوا ليام بلا متعدب راسك
عيسى ضربوا لظهروا : بيناتنا عداب و حنا مشاركين الدم (رد يدو ضارب على كتفو) خاطرك من خاطري .. عاودلي مربانا ازول الهم و إِتلّْم الجرح
- سكت ثواني كيقلب على الحروف حتا دوى : بغيتها من نهار شفتها هابطة و الضحكة مرسومة على وجهها (ساهي) كانت ملاك كتمشى فالأرض .. دوزنا بزاف د الحوايج و فرقونا ضروف لكن عمري مكانت لي شي حاجة ليها حتا شفتها (دار عندو) واخا صغير ديك الساعة تمنيتها تكون مراتي و نعيشو بجوج و نكبرو مع بعضياتنا .. بنيت و عليت و زينت بالحق جيت تال الضالة للي عليها كلشي و درتها بالميكة
عيسى حيد اديه من كتفو : و مال الميكة ؟ الما ديال الشتا معندو منين ادوز
راشد حنا راسو محركو بالنفي : نسيتي اعيسى الشمس و حرها ..
أنت تقرأ
حنين
Roman d'amour" مـــن أنــــت؟ يا من تنشر سحرها كالغبار بين الأعين والجفون وتنثر من شعرها المجنون مــــن أنــــت؟ يا من تبحثين عني وعن جراحي وجنوني أقتربي أكثر.. واجعلي من شعركِ جسراً تسير فوقه روحي إليك •• هي قصة بالدارجة المغربية و ان شاء الله تكون خفيفة عل...
