ناعسين فالفراش حتا وقفات عليهم رغد على النبوري كالسة على ركابيها و بيجامة خفيفة فيها لاستيك من العنق .. شعرها الزعر مطلوق مخربق .. دور دور و ترجع ليها الصورة ديال حنين مرخية فيد عيسى .. حتا صبحات عليهم تشوفهم .. باركا غا الليل كامل و هي تحلم .. ماشي غا هي حتا حنين حلمتها للي ولات كتخلعها من جديد .. و عليها حلات عويناتها و شافتها كالسة حداهم بلا صوت باش متفيقهمش ..
- صباح النور
غفلاتها تهزات كانت كتقول ناعسين .. حتا ضحكات كحزات لعندها من جيهت باباها كتدوي بشويا كتشوف فيه بنص عين
- بونجوغ ماماي .. بريتي ؟
- بريت اماما بريت .. و نتي لاباس ؟
دارت اديها على فمها فحال الى كتهضر فودنيها و تحنات مزال لعندها : شفت كوشماغ البارح ..
جات تكمل هضرتها محسات غا بعيسى للي دورها لعندهم دايرها الوسط كالسة على ركابيها كيشوفو فيها بجوج و ابتسامة دار عند حنين و بصوتو المحبح الصباحي نطق : كي صبحتي ؟
- الحمد لله
- الحمد لله (كمل لرغد) اوا شنو شفتي ؟
رغد هزات عينيها الكبار على غفلة شافت فحنين نيشان فعينيها ناطقة بصوتها الطفولي " لو نواغ" .. (تبلوكات فيها ثواني حتا رجعات شافت فباباها و حطات اديداتها الصغار على عينو للي باقا مطراسيا) امتى غتمشي الجرحة ؟ ..
كتسمعهم كيهضرو و كتشوف فوجوههم بالحق العقل غايب .. الكحل و الظلام و البيبان و العتمة و رغد تاني زادتها للي خاصها .. الطريقة باش قالتها و الشوفة للي شافت فيها متنكرش طيحات فيها النص .. الرعب خدا طريق و تسلل لذاتها ..
عامين و نص و الحلمة كتعاود
شنو مضمونها و شنو جاي من موراها ..
وقفات خلاتهم ناضت للحمام تقضي غراضها .. توضات و صلات حداهم و هوما باقي مجمعين كيلعبوا .. صحتها اليوم مزيان حتا فالليلة للي فاتت خدات دوش رتاحت فنعاسها و نفتسها ..
سالات هزات يديها تدعي و بقلب طالب كترجى .. جمعات الصلاية لبسات بيجامة طويلة خفيفة و هبطات عالماهم "انا سبقتكم لتحت" .. توجد الفطور ليهم مع نادية و منعم ..
وصلات للكوزينة لقاتها كتورق الملوي و طيبو .. الروايح مكاين غا الله اعطيك صحيحتك .. صبحات عليها ضايرة عندها بايساها فحنكها كيف كدير لمها .. عمرها محسباتها عكوزتها و لا تكبرات عليها .. شحال من مرة شاوراتها و كبرات بيها .. حتا نادية نيتها وصلاتها .. لقاتها عسل دايراها كي الما القليل خصوصا فاش لاقاتها هي و ثريا ..
- كي بقيتي ؟
شافت فيها : الحمد لله .. عدبتي راسك كون كلستي ترتاحي نقاد كلشي ..
- كتضحك عاجبها الحال : لاواه غا طحين خلطتو مع الما ... عزيز على وليداتي واخا نكون عيانة نوض نقادو .. الكبدة صعيبة
ضحكات لكلامها : ربي اخليك .. الله اطول عمرك
شافت فيها بنص عين : آمين و العقبة تجربي حتا نتي .. تخاويو ديك البنية ..
أنت تقرأ
حنين
Romansa" مـــن أنــــت؟ يا من تنشر سحرها كالغبار بين الأعين والجفون وتنثر من شعرها المجنون مــــن أنــــت؟ يا من تبحثين عني وعن جراحي وجنوني أقتربي أكثر.. واجعلي من شعركِ جسراً تسير فوقه روحي إليك •• هي قصة بالدارجة المغربية و ان شاء الله تكون خفيفة عل...
