حنين

بارت ٨

فالعشية و بعدما طاح الظلام خرج من البيت ماشط ناشط، لقا راشد حاط قدامو قهوة كيتفرج ففيلم، هز فيه هاد الاخير عينيه لقاه مقاد الحالة و عاجبو الحال وذنيه كينقزو
راشد بنص عين : شفتك خارج ؟

عيسى : ياكما كنسطاجي عندك بلا خباري !

راشد دار عندو : كيفاش ؟

عيسى : كتسول فحال المرا فاش كتشوف راجلها خارج

راشد ميق : شلا و الله كون كنت مرا منتزوج بيك

عيسى كيقاد ساعتو : بعدا غنشوف فيك ؟ نتا بيض تما تحلف تا دخلاك الموت

راشد بصوت رقيق : الزااااااين بيوضت لوغوووووب يا كحل العفطة

عيسى غا سمع كي هضر تسطا بالضحك مع راشقا ليه وايواااي حتا ضحك معاه راشد

راشد مسح وجهو : ههه اوديي .. قولي، غترجع و لا لا على حساب زكروم الحديد لانمشي نخليك برا

عيسى : لا طالع لقنيطرة عندك النساب المستقبليين عارضينا للعشا انا و كوثر نبات فدارنا و نشد الطريق

راشد : عول اجبدوليك كتب الكتاب و العرس عياو اتسناوك امسخوط ههههههههه

عيسى : غا بشويااا (فنفسو بالحق مسموعة شويا) زربانين على بنتهم

راشد : الله اعاونك

عيسى و هو غادي : يالاه تهلا حتا للغدا نتلاقاو فالخدمة.

سد الباب و خرّج الطوموبيل تحرك لدار كوثر .. وصل قدام البارطما لقاها كتساينو ركبات حداه باستو فحنكو و زادو لباتيسري خداو بسطيلة كومونداوها و مشاو فالطريق للقنيطرة
و هي قابطة ليه فيدو كتلمسها : ماما كانت عوالة تعيطليك السيمانة للي فاتت ساعة جاب الله علمتها الخدمة كانت عندنا مزيرة

عيسى : امم حسن نيت واخا الخدمة و لكن كنت غنتحاشم معاهم

كوثر (عنقاتو بجنب) : نووو را كيتفهموا متقولش هكا را وليتي ولدهم ..

كملوا الطريق و هوما كيهضرو عادي على عائلتها حتا وصلوا قدام واحد الفيلا هبطو هزو فيديهم شنو جابو .. دفعات كوثر الباب دازو على الجردة حتا وصلو للباب الدخلاني و صونات، جوباتها المساعدة (حليمة) و حلات عليهم سلموا عليها، عطاو شنو جابو و دخلوا .. لقاو مامات كوثر (فاطمة) هابطة من الفوق تلقا ليهم بالصواب و الآداااب، مرا فبداية الخمسينات بالحق مدا منها الزمان وااالو .. رشيقة و أنيقة غزاااالة بالجهد، عكس كوثر للي سمرا و حروفها كوحل بالحق واخدة من زعورية و عينيها للي فالكري .. فاطمة باينة مغربية فاسية بال"ر" للي كتنطقها "غ" ..

فاطمة : مغحبا و الف مغحبا بولدي عيسى ولد الاصل و المفصغ

عيسى كتساااالي معاه بنطقها و طريقة هدرتها : الله ابارك فيك الالة فاطمة ..