"شكون عندو شهراين ؟"
نطقات ثريا داخلة معاهم فالكلام ..
حنان : وا مراتو مراتو .. ثلاتة ماشي جوج
نغزها راشد شافها كسيرات تاني نسات راسها ...
قاد عيسى جلستو قاطع الموضوع قبل متمشي تكولها لكلشي .. رد عينو على العرسان للي كالسين حدا حدا .. خاطرو تزير عليه من جوايه كثار .. كيحك لحيتو بجهالة كالعادة مخرج فيها جنونو .. ثريا بنص عين كتشوف فخوها و كيف غيكون احساسو و هو فدار غفلون شهر و لا شوف تشوف !
حركاتو جدبات تا حنين متبعا ليه العين حتا شافت مهدي داير لعندها و ردات عينيها لبلاصتهم .. بتاسم ليها و بتاسمات ليه جاها مقبول فالعين .. و بيها تم ختام الدرس بدعاء فيه هزو كفوفهم كاملين و تزغريتة كتعلن بداية فترة الخطوبة ..
جبد لي بواط عطاهم لنجية مشات غا حطاتهم تا تمات مدخلة الصينية و البنات كيعشقو على النبي .. حنين بضحيكة مبينة سنيناتها كتجاوب هادا و هادا ..
تحطات الصينية تركبو الخواتم على التعشاق و الضحك و الهضرة .. شربو لبغضياتهم الحليب و كلاو التمر والباقي على العزبات كفال ليهم .. و تفرق من جديد كيسان الحليب و التمر على الحاضرين
سالات العشية و فحال اي عائلة خرجوا مسلمين على العائلة و الخطاب مودعينهم .. حتا تمات حنين جاية مبدلة حوايجها و خارجة عندهم تنقص شي بلايص على الأقل للرباط .. المهم غاديين فطريق وحدة مونسة
منى : حتا نتي غادا ؟
حنين : الخدمة اماما .. واحد 300 درهم خليتها ليك تحت الطاجين جيبي شي وحدة تعاونك
منى بنص عين : بنيتك !.. كول مرة لايحالي للكونط فلوس صحاح كتقوليلي 300 درهم ... ياك العراضة كاملة حلفتي باك ميحط الريال دابا هازا الهم حتا للعوين !!
حنين غامزاها : زعما معارفاش حطيتو كثر مني ..
ضرباتها بخفة كتضحك : راك بنتنا ألحمقة بنتنااا
تمات خارجة نادية من الصالة تابعاها ثريا متوجهة لعندهم : لالة منى .. حنين بنتي الله اكمل كلشي بالخير ان شاء الله (عطاو اش جابو)
حنين : الله ابارك فيك شقيتو راسكم
ثريا جات حداها كيدويو : جيتي غزالة تبارك الله مبروك عليك
غاصو البنات فحديثهم و كملات منى فرحانة بتكبيرتهم
منى : الله اكبر بيكم بالحق هادي آخر مرة .. حنا عائلة وحدة و معرفتكم متوزن بذهب شكرا حيت ضربتو طريق طويلة على قبلنا
نادية : الله يا ختي .. هانتي قلتي عائلة وحدة و لاش كتشكريني .. بناتك بناتي (شافت فحنين مفكرة) ابنتي نهار تحتاجي شي حاجة و لو بسيطة منسمحش ليك لا مقلتيليش
حنين بشكر : لهلا اخطيك عارفة للي كاين (صونا تيليفونها لقاتها عشيرتها فبلاد الغربة) سمحولي صاحبتي كتصوني (نطقات لمياء بلا متخرج صوت لماماها)
أنت تقرأ
حنين
Romance" مـــن أنــــت؟ يا من تنشر سحرها كالغبار بين الأعين والجفون وتنثر من شعرها المجنون مــــن أنــــت؟ يا من تبحثين عني وعن جراحي وجنوني أقتربي أكثر.. واجعلي من شعركِ جسراً تسير فوقه روحي إليك •• هي قصة بالدارجة المغربية و ان شاء الله تكون خفيفة عل...
