حنين

بارت ٤٨

الأيام كيدوزوا .. حنين معمرها مشافت الراحة فيهم .. فيها الوسواس من البوطة و الباب ساعة جا وسواسوا محا للي فاتو و زادها للي عليها .. الخلعة دايرة فيها للي بغات .. تمشى حتا دور و تشوف .. دابا اخرج ليها من شي قنت .. اما الباركينغ مبقاتش كتحط فيها الطوموبيل الى كانت غا هي و لا إلى عرفاتو مسافر لشي بلاصة خدام مغيكونش معاها .. كتسهى بزاف و الى هز ايدو على غفلة اجبد شي حاجة و لا مشير لراشد جاي تهز اديها تغطي وجهها ..
عيااااات و تهدات ..
و شاف و ميك ..

العشية و الظلام طاح معلن على الليل و على نهاية اليوم و نهاية الاسبوع للي هلكها نفسيا .. عيانة ماشي بزاف باش جات من الخدمة .. كالسة فالدار كتساين حنان تجي جايبة طوموبيلت باها سارقاها ليه مفيها للي يتزاحم فالترانات و زيد الويكاند كلشي راجع لدارو و عائلتو ..
كتفرج و رغد ناعسة على فخاضها كتفرج معاها كتلعب بشعرها ..

- مامي

- اممم ؟

هزات راسها شافتها بعويناتها الكبار للي كتوسطهم خضرة خفيفة متميزين : بابا غيتعطل ؟

- غدا و غيجي .. رتاحي (سكتات شويا) نجيب ليك الحليب ؟

- لا شكرا (رجعات كتشوف فالتلفازة حاطا يديداتها على فخضها كتمخشش فيه) شبعت الحمد لله ..

تحنات باستها بالخف مكملين برامجهم كيتفرجوا ..
مشا الحال و وصلات ل 10 و هي باقي موصلات لسيكتور .. كانت علماتها راها فالدخلة .. الدار خوات عليها باراكا غا عيسى للي مشا شاد الطريق لفاس بعدما خرج عندو عملية صعيبة معيطين ليه الفرع للي تما .. عندو تجربة ناجحة فيها ..

.. تحنات لعند رغد شافتها نعسات ليها مرتاحة على يديها الحنان فيها و على طيبوبتها و حبها المتبادل .. باستها بعدات راسها غا بالشويا تكاتها مزيان .. وقفات كتحرك كتافها كتستاعد لمسابقة حمل الاثقال ..
تحنات هازاها كتصللي على النبي و تسمي الله .. مربيين على هادشي و مربيين رغد عليه .. عائلة غزالة خفيفة على القلب ..

طلعات بيها فالدروج مكملة للبيت حطاتها كتضحك على ثقلها للي مبقاتش كتقد تهزو .. شدات ظهرها كتكسل و رجعات محنية عندها غطاتها بغطا خفيف .. باستها بوسة طويييلة تفديها بروحها بلا شك .. و خرجات سادا من وراها الباب تنعس ترتاح .. غتجي حنان كتهلل تفيها غا بالهضرة ..

هبطات سمعات البوانيي كيتحرك فحال شي حد كيفتح الباب .. لابسة غا شورط و و تيشورت  و بينوار ديال الساتان خفيف كيتراقص مع حركاتها .. و بفرحة غادا تشوف ختها توحشاتها بزاااف .. تفتح الباب للي ساداه من الداخل ..

فتحاتو و ياريتها مفتحاتو .. دخل دافعها مهجم ريحت الشراب عاطية منو .. غا شافتو و الدفعة للي تدفعات غفلاتها مطيحاها فالارض .. رجليها كيرجفو وقفات ثانية حتا تهزو بوحدهم ضايرين بيها طالعة للفوق تخبى و هو شبه واعي كيعاير من وراها كيغوت ...