ابشع ليله بحياتي المليانة سواد ..اكثر ليلة تأذيت بيها نفسياً وجسدياً ..اكثر ليلة انهنت بيها حد التعب حد الموت
اصرخ من اعماق كلبي ..بألم
اريد افهم شي اريد استوعب..الدم يصب من راسي ..احس راسي فرغ من الشعر ..علكد ما انجريت منه ..عشت الاجرام بحذافيره يسحلون بيه من شعري للسيارة ودفر وفشار عليه
ما خلوا بيه جزء سالم ..الرجف الاحس بيها مو طبيعية ..منا فزيت عليهم ومنا ..يضربون بقسوة مو اخوان والله عدوان..ليكول زلمه وكادرين عليه تمنيت يحطون طلقة براسي ولا هيج يسوون بيه بشاعة الموقف وبشاعة شكلي ذيج الليلة لسا حافر ببالي
مؤمل كاعد يمي بالوره ..و عدي يسوق
يالله عدي الضرب الاكلته نصه منه ..
جان كلساع ينزع حذائه ويدور علي يضربني علراسي..ويفشر.. مؤمل صاح بيه ..عوفهاااا لا تكلب بينا السيارة انتبة لا تسوينا قدررر ..السيارة تمشي بشكل مُموج وخط متعرج..طسات قوية
ودنيا ليل
عدي ..حاركه كلبي هالكلبه..تعالللل مؤمل سوق بداليييي
طبك يريد ينزل ..لزمه مصطفى ..دتوكلل نوصل للبيت واشفي غليلك بيها ..دصبر ماظل هواي
حجه مؤمل بعد مده ..عدي ..اخاف حازم يكلب علي نوب ..
عدي ..دخل يولي مسوي بيها الاخ الحنين هو كله هذا يريد يبغض ابوي ..تصرفاته كلها عكسنا..عود هو هسه زلمه يمشي من شور راسه ما يمشي ورانا ..الكوا....د انه اله الا ما اربيه
مؤمل ..خاف يسويلنا سالفه ..تدري بيه مسودن من ماتت مرته ولليوم حاقد عالناس كلها وبالذات ابوك
عدي ..علكيفه مو هيه تايهتله السالفة..والله اسوكه سوك هالساقط هذا..بعد ولا اعترف بيه ولا اكول اخوي الجبير ..الا ادوسه بالقوندرة..انه يصيح بوجي
جنت من دون حجاب ..اصلا مثل الخرقة البالية صرت بين اديهم..فوتوا السيارة للبيت ..
تلكتنا اختي ابتسام دكت صدرها..من شافتني فزت..يمه هاي رويده شجابها ..شمسوين بيها ..!!!
عدي دفعها بحيث انضربت بالحافة مال باب
..وخري من وجهي لا انعل ابو الخلفج..انعل ابوجن لابو عرضجن..انعل ابو النسوان يابو البنات يابو شرفهن..يابو كلمن عده بنات
اثاريهم بالجاهلية على حگ من جانوا يدفنونهن
من مُعاملته الها ..عرفت شيعانن من بعدي
هما من زمان هيج مو كلش علينا ..وبالذات علي اني ..چي يشوفون ابوي ويانا ..كرهه للبنات طابع ببالهم..صار ورث الهم..يقلدونه بكلشي
جانت حجايت ابوي دوم اسمعها منه ..
البت ما ينسمع الها ..ولو جاريتها كسرتك.. اكسر ضهرها ..وراسها..قبل لا تكسرك..البت ما تنطي وجه..دوسها حالها حال الجحش عاملها..
وحجايته الثانية ..البت شغلتها بس تكنس وتنظف ما الها كل دور..غير الولادة والزلمة ما الها وضيفة
أنت تقرأ
ما ذنبي انا (الموؤدة)
Short Storyأسِيْرُ ولَسْتُ أعْلَمُ أينَ أمْضي غَريبَ الدَّارِ قد ضَيَّعْتُ بعضِي فَبَعْدَكِ ليسَ لي وَطٌنٌ وخِلٌّ أبُوحُ لهُ بما أشْكُو وأُفْضِي وأُطْفِئَ في عُيُوني كُلُّ حُلْمٍ وجَفَّتْ كُلُّ عاطفتي ونَبْضِي أعِيشُ التِّيْهَ أسْبَحُ في ظلامٍ وآمالي تُواجِهُ...
