لمن وصلنا كان في كميه من الصحفيين ، عاينت لـ لؤي و قلت ليهو شفت الناس بتجي بدري كيف!!
قال لي ما فاتتنا حاجه ، المهم لمن نزلنا خالتي سارا إتصلت علي و إتناقشنا معاها في الموضوع ، بعدها قلت لـ لؤي يلا ابدا تصوير ، قال لي ركبي السماعات دي كويس و مكبر الصوت ، ركبتها كويس و اتأكدت إنو الصوت واضح و هو بدا تصوير :
إذاً هنا و من أمام قاعة الصداقة نترقب البيان الصحفي الذي ستصدره الشرطة السودانية بعد قليل بما يتعلق بمقتل الطالب الجامعي عماد فخر الدين الذى وجد مقتولاً في شقته في بحري الشهر الماضي و سـوف نوافيكم بكل جديد....
طبعاً الشمس كانت سخنه شديد ، لؤي مشى جاب لينا مويه و بارد و سندوتشات ، قلت ليهو هسي لو خلونا دخلنا القاعه جوه مالهم ؟؟ قال لي ما حـ يخلونا إلا المؤتمر يقرب يبدا ، المهم لمن الساعه 10 جات مشينا على باب القاعه ، كانوا في صحفيين و مصورين و مراسلين كتار داخلين بالصف ، كل واحد بطلع بطاقتو للحرس و بدخل ، لمن دخلنا قعدنا في النص لأنو قدام كان مخصص لـ شخصيات معينه ، لؤي مشى ركب الكاميرا قدام المنصه زيو و زي باقي المصورين ، جات وحده من الصحفيات صحبة سارا خالتي اسمها إلهام سلمت علي و باركت لي العرس و قعدت جنبي ، قلت ليها أخيراً القضيه دي حـ تخلص و كلنا حـ نعرف القاتل منو ، قالت لي ما أظن ، المهم جا الناطق الرسمي بإسم الشرطه السودانيه و بدا يتلو البيان :
" بتاريخ 16/7/2022 م حدثت جــريمة قتل الطالب الجامعي عماد فخر الدين
- زمن الحادث : 9:47 مساءً
- الشـــاكي ح . ع . أ
- ذهب الشاكي إلى شقة المجني عليه ليأخذ منه الهاتف الذى طلب منه الشاكي شراءه له لمعرفة المغدور بالهواتف
- عندما طرق الشـاكي الباب و لم يجد رداً عاد أدراجه ظناً منه أن المقتول لم يأتي بعد لأنه أحياناً كثيرة يعود إلى شقته في ساعات متأخرة من الليل ، ثم عاد في اليوم الثاني و طرق الباب عند الساعه السادسه صباحاً لعلمه أن المقتول يخرج باكراً إلى جامعته لذا جاءه من الصباح قبل خروجه ، عندما لم يجد رداً اتصل على المجني عليه و كان يسمع صوت رنين هاتفه من داخل الشقة فـإستمر في الطرق و أصبح ينادي الجاني بإسمه لكن دون جدوى ، مما أدى لـ تجمهر بعض من سكان العمارة أمام شقة المجني عليه ، عندما أحسوا أن هنالك أمراً مريب كسروا الباب و عند دخولهم وجدوا المجني عليه يسبح في دمائه و أبلغوا الشرطة فوراً..
اتــخــذنا كـــافة الإجراءات الفنية و تم تحويل الجثمان للمشرحة و تــم إستجــــواب الشاكي و الشهود و سكان العماره و أصدقاءه و بعض المشتبه بهم
- تم تحـويل البلاغ لفرعية مباحث ولاية الخرطوم لإكمال التحريات .... التحريات الأولية و الأدلة المادية المتوفرة و نتائج الفحص الجنائي أوضحت أن السلاح المستخدم في جريمة مقتل الطالب الجامعي عماد فخر الدين هو سلاح شخصي ، و أنه لا يوجد أي كسر أو سرقة أو نهب لممتلكات المنزل
