ما عارفه كيف الجمله دي طلعت مني و ما عارفه من وين جاتني الشجاعه دي !! ...وائل أخوهو أنقذني من الموقف ...كنت حاسه بنظرات ناصر لي و هو بسلم على أخوهو و أنا ما قدرت أعاين ليهو تاني ، وائل قال ليهو انتوا كل واحد جا براهو ولا شنو عشان شايفك حـ تاكلها أكل بنظراتك دي يا ناصر ! يعني كأنها ما جات معاك .... طبعاً قلبي كان شغال دق دق ...دخلنا لـ جوه و أهلو إستقبلونا ، كانوا عازمين كم نفر كدا من أهلهم و جيرانهم عشان يشوفوني و يتعرفوا علي و هيفاء ذاتا كانت معاهم ، لمن جات تسلم علينا مدت لي يدها و هي بتتكلم مع ناصر و بتقول ليهو وووينك يا دودي مشتاقين والله ، مديت ليها يدي و سحبتها منها ، قال ليها موجود والله بس طولت ما لاقيتك مع اني بجي البيت طوالي ، المهم سلمنا على كل الناس و قعدنا بعدها ناصر مشى مكان الرجال و أنا بقيت قاعده مع ناس أمو و أخواتو و باقي النسوان ، حسيت نفسي زي عارضة الأزياء ، كلهم كانوا بعاينوا لي من الهيلز لحد نص راسي عديل ، واحده من عمات ناصر قالت لي هسي من عرستو ليكم كم ؟؟
قلت ليها تقريباً أربعه شهور ، قالت لي و لسه ماف حمل ؟؟ قلت ليها لسه و أنا متضايقه شديد لأني بزهج من السيره دي ، وحده تانيه قالت لي طيب ما مشيتوا لـ دكتور أو كدا ؟؟ قلت ليها لا ، ورده قالت ليهم عادي يا جماعه الموضوع ما خطير و الدكتور دا ذاتو الناس ما بتمشي ليهو إلا بعد سنه أو سنتين من الزواج !! ردت عليها وحده من جيرانهم و قالت ليها احسن يمشوا من بدري عشان لو في مشكله يعالجوها ، أم ناصر يلي هي عمتو فريده قالت ليهم بنات الزمن دا ما بحبن الولاده و التعب ، الواحده بتعرس عشان تقشر بس و تطلع و تنزل مع راجلها و تتبوبر بالعرس لكن فكرة الولاده دي هم شايلنها من بالهم ، عمتها قالت ليها هو الهدف من العرس شنو ؟ مش الواحد يستقر و يجيب ليهو وليدات !؟ قلت ليهم معليش لكن دي حاجه بتخصنا نحنا الإتنين ، أنا زي ما قلت ليكم حالياً ما جاهزه و بكل صراحه ما بقدر على الشغل و مسؤولية طفل في نفس الوقت ، عمتو قالت لي كتاااار شغالين و ماسكين أولادهم و لو اضطريتي خلي شغلك عديل المشكله وين ؟؟ و اذا هسي ما جاهزه حـ تجهزي متين و هل عندك فتره معينه حـ تخلي فيها شغلك و تتفرغي لـ بيتك ؟؟! نازك قالت لي هسي أنا شغاله و ماسكه بيتي و أولادي ، قلت ليها ما تكذبي يا نازك ، انتِ ما قدرتي توازني بين شغلك و بيتك عشان كدا كنتِ بتجيبي لينا دانه ، قالت لي جبتها بيت أخووي كمان عندك إعتراض !!؟ أمها قالت لي هي حصل قالت ليك امسكي لي أولادي ؟؟ دانه متعلقه بـ خالها عشان كدا نازك بتخليها معاهو ، عمتو قالت لي النوريك ناصر دا قبل ما يعرسك ماسك بت أختو دي و باقي ليها الأم و الأب و هي عشان بتريدو شديد دائماً بتقول ماشه ليهو و نازك كانت بتجيبها ليهو هنا ، قلت ليها : ليها حق لأنو شغل و بيت و شفع صعبه والله 😊
طبعاً أنا كلامهم ضايقني شديد و أساساً من البدايه العزومه دي ما كانت عاجباني لأني عارفه كويس إنو مواضيع زي دي حـ تنفتح بس كنت مجبوره أجي مع ناصر ، بعد مسافه قالوا قوموا الأكل جاهز ، مشيت دخلت يدي بس و طوالي قمت ، أمو قالت لي أقعدي تمي أكلك حركات زي دي ما بتنفع والله لأنو كلامنا ما بزعل ، ناصر ولدنا و مصلحتو بتهمنا و كلنا كنا متمنين متين يعرس و نشوفوا في بيتو و بـ أولادو ، عمتو قالت لي يا بتي أقعدي أكلي سااااي و كلامنا نصيحه و النصيحه ما بتنأبي ، قلت ليهم شبعت والله ، ورده قالت لي عليك الله يا مها أقعدي أكلي زي الناس !! نازك قالت ليهم يخوانا ! قالت ليكم شبعت يعني غصب عايزين تأكلوها !!
المهم مشيت غسلت يدي و جيت قعدت بعيد عنهم ، بعد شويه أبوهم جا و قال يخوانا اعملوا لينا الشاي دا سرعه ، لمن شافني تاني جا سلم علي و قال لي مالك ما قاعده تتغدي معاهم ! قلت ليهو قمت هسي دي والله ، قال لي اها اخبارك شنو يا بتي و كيف عامله مع الشغل ، قلت ليهو تمام الحمدلله ....المهم قعد يتكلم معاي لحد ما جا وائل ، قال ليهو أنا بفتش عليك يا أبوي و انت هنا ضارب حنك مع مرة ولدك ، قال ليهو يا ولد هوي يضربك بعكاز ان شاء الله ، قعدت أضحك عليهو ، وائل ذاتو قعد و بقى يتونس معانا ، طبعاً أنا قدامهم كنت بحاول إني أكون طبيعيه رغم إني فاشله في إخفاء زعلي ، لو زعلت ما بقدر أظهر العكس ، بعد شويه رجال أهلهم جوا قعدوا معانا و إتلمينا كلنا رجال على نسوان ، لمن جابوا الشاي قلت ليهم ما عايزا ، عمتهم قالت لي اجي مالك ؟؟ وائل قال ليهم يمكن ما بتشرب شاي ، أعملوا ليها قهوه أو عصير ، قلت ليهو لا لا ما عايزا حاجه والله .... طبعاً كلهم قعدوا يعاينوا لي ، خالتهم قالت لي أكلنا أبيتيهو و هسي حتى شرابنا ما عايزاهو !! قلت ليها لا لا والله بس ما عايزا أتعبكم معاي ، عمو مدثر قال لي يا بت هووي ماف أي تعب و البيت بيتك ، المهم عملوا لي عصير و جابوهو لي ، غصبت نفسي و شربتو ، طبعاً لاحظت إنو ناصر و هيفاء من قبيل ما موجودين ، بعد شويه ناصر جا و وراهو طوالي هيفاء ، غصب عني عاينت ليهو جوه عيونو و بنظرات كلها زعل و عتاب ، زعلت من نفسي شديد و قلت ما كان أستعجل و اعترف ليهو ، ياريتني مسكت نفسي ، المهم قعد يتونس معاهم شويه و كل دقيقتين يعاين لي ، بعدها قال ليهم نستأذن بعد دا ، قالوا ليهو بدري والله ما بتمشوا هسي ، قال ليهم لا لا نمشي بعد دا نحنا اصلاً جيناكم من مشوار والله ،نازك قالت ليهو كنتوا في بيت أهلها ولا شنو ؟؟
قال ليها لا و حكى ليهم بموضوع البرنامج ، قالوا ليهو اهاااا كويس والله ....
المهم قدمونا لحد الباب و رجعوا ، أول ما ركبنا العربيه ، ناصر مسك يدي و قال لي عيدي الجمله القلتيها قبيل لأني حاسي إني سمعت غلط ....سحبت يدي منو و قلت ليهو فعلاً سمعت غلط ....قال لي خير في شنو ؟؟! الإتغير شنو فجأه كدا !؟؟
قلت ليهو لو سمحت سوق و خلينا نمشي البيت ....إتلفت مني بزهج و ساق العربيه طوالي و هو ساكت و تاني ما إتكلمنا لحد ما وصلنا البيت ، دخلت غرفتي إتدوشت و بدلت ملابسي و رميت نفسي على السرير و بقيت اتذكر في تفاصيل اليوم دا ، مره ألوم نفسي لأني إعترفت ليهو و مره اقول خلاص حصل الحصل ، بس شوفتو هو و هيفاء مع بعض ضايقتني شديد ، بالإضافة لكلام أمو و أختو و نسوان أهلهم ....
طبعاً في نفس اليوم دا كان في مؤتمر للشرطه السودانيه و مشت مراسله غيري عشان تغطي الحدث ، لمن فتحت الواتس كان في رسايل كتيره نازله ، دخلت القروب الفيهو أنا و خالتي و إلهام و الصحفي ساجد ، قريت الرسايل من البدايه و لاحظت انو قبل البيان خالتي سارا قالت ليهم الكاتل هو مؤتمن ، و قريت باقي الرسايل و كانوا مرسلين مقطع فيديو من بيان الشرطه فـ شفتوا و زي ما قالت خالتي سارا مؤتمن هو القاتل ، بس في المؤتمر ما قالوا اسمو ، قالوا القاتل هو م . م . أ... صديق مقرب للمجني عليه و قالوا إنو حصل خلاف حاد بيناتهم و في آخر لقاء اتضاربوا بعنف و مؤتمن اضمر الإنتقام من صحبو..... ، قلت ليهم دا شنو السبب القوي الخلى صاحب يقتل صاحبو ؟؟ إلهام قالت لي الشرطه ما ذكرت أي تفصيل إضافي و إتعمقت مع الناس في سبب المشكله ، قلت ليهم طيب و التلات أنفار الكانوا ملثمين ؟؟ سارا قالت لي ديل كانوا حراميه و ساكنين في العماره و دخلوا عشان يسرقوا و ما لقوا طريقه عشان كدا أجلوا خططهم لليوم البعدو يلي فيهو الناس عرفت إنو عماد مقتول ، المهم إتكلمت معاهم شويه في الموضوع بعدها رسلت لـ سارا و قلت ليها السرب ليك الأخبار دي كلها منو ؟؟ لأنو شكلو زول ما هين ....قالت لي زول 😅
قلت ليها عااارفاهو زول منو هو ؟؟
قالت لي واحد اسمو سلطان شغال في المباحث ، قلت ليها اشششي و سلطان دا بتعرفيهو وين ان شاء الله ، قالت لي المهم بعرفو و خلاص ، قلت ليها أحكي لي ، قالت لي عايزا تحققي مع خالتك ؟؟
قلت ليها شكلو دا الفارس المنتظر ، قالت لي اقطعي وشك يا بت ....بقيت اتعابط ليها و ألح عليها لحد ما حكت لي و قالت إنها اتعرفت عليهو قبل كم شهر كدا ، قلت ليها اها و بعدو ؟🌚قالت لي شنو !؟؟ قلت ليها حسب الحكيتيهو لي هو بلمح ليك و انتِ عامله رايحه ، قالت لي أنا ما عايزا تلميحات حركات المراهقين دي ما بتنفع معاي ، خليهو يجيني عديل ، قلت ليها شكلو كدا حـ يجيك و قريباً حيكون في عرس تاني غير عرس إيهاب ....ضحكت بس المهم دردشت معاها مسافه بعدها نزلت تحت ، لقيت الهول فاضي ، شلت الريموت و بقيت اتنقل في القنوات السودانيه و آخر حاجه وقفت في قناة البلد و بقيت أحضر في برنامج إعترافات ، فجأه كدا ناصر جا طالع من المطبخ ، أول ما شفتو ختيت الريموت و طوالي قمت من مكاني و إتوجهت على السلم ، مسكني من يدي و لفتني عليهو و قال لي ممكن أفهم الحصل شنو ؟؟
فكيت يدي منو و مشيت طلعت السلم و هو بتكلم معاي و أنا لا رديت عليهو لا إتلفت عليهو ، قال لي بنهره بتكلم معاك أنا أقيفي و إتفاهمي معاي ....برضو ما رديت عليهو و واصلت مشي و لمن حسيت إنو جاي علي بإستعجال دخلت غرفتي و أول ما كنت حأقفل الباب كدا هو ثبتو بـ يدو ....دخل و قفلو ، قال لي فهمني مالك !؟؟
قلت ليهو ولا شي و لو سمحت أطلع من غرفتي ....جراني عليهو و قال لي أنا زهجت من حركاتك دي !!
قلت ليهو خلاص وديني بيت أهلي ، قال لي لاحظي إني لحد اللحظه ماسك نفسي و بحاول افهم منك في شنو ، لو غلطت عليك وريني عشان اعرف أبرر !! لحد آخر لحظه كنا حلوين حتى انك قبل ما ندخل قلت لي..... قاطعتو و قلت ليهو كنت بهظر بس ما تكون صدقتني ، قال لي ماف شي كان جابرك تقولي كدا و لمن تجي تهظري أكيد ما فجأه كدا حتقولي لي أنا بحبك ، قلت ليهو فكني و أطلع برا الغرفه....ما رد علي ...بقيت اتصارع و بحاول أفك نفسي منو بس هو ماسكني بقوه و بعاين لي جوه عيوني ، قربت أبكي طبعاً ، عيوني إتملت دموع ، قلت ليهو ناصر فكني ، قال لي سألتك جاوي على سؤالي ، قلت ليهو ماف شي ياخ ....قال لي إذاً حـ نكون واقفين كدا ، طبعاً كان مقربني منو شديد و لحيتو فوق راسي ، بقيت أضربو على صدرو و أنا بقول ليهو فكني ياخ و هو كأني ما بضرب فيهو !! في الآخر إستسلمت و بكيت ، ضماني عليهو و قال لي ما قصدي أبكيك والله بس كمان حابب اعرف الحصل شنو فجأه مش كنا كويسين ؟؟
ما رديت عليهو ، كنت ماسكاهو من قميصو و ببكي في صدرو ، قال لي السكوت ما حل ، قولي لي غلطت في شنو عشان أعاقب ليك نفسي ....بعد مسافه قلت ليهو كنت بتعمل شنو مع هيفاء 😭😭
قال لي شنو !!؟ قلت ليهو دائماً لمن أمشي عليك خطوه بتندمني و بتخليني أرجع مية خطوه لـ ورا ، قال لي يعني انتِ ندمانه لأنك قلتي بتحبيني ؟؟
قلت ليهو انت البتندمني بتصرفاتك دي ، هيفاء دي أنا فاهماها كويس و المشكله انك بتتساير معاها ، كنتوا وين و بتعملوا في شنو ؟!!
طبعاً بتكلم معاهو و هو لسه ضاميني عليهو ، قال لي صدقيني أنا و هيفاء ما كنا مع بعض و أساساً أنا كان عندي مكالمه مهمه فأول ما خلصت و جيت راجع لقيتها في الحوش ، سألتني عن حالي و كدا و بعدها دخلنا ليكم الإتنين سوا ! يعني وقفتي معاها ما تمت دقيقه !!...قلت ليهو و انت دي مكالمة شنو البطلعك برا البيت ! كنت بتتكلم مع توته صح ؟؟
ضحك و قال لي ايوه كنت بحاول أصالحها و دا كلو عشان انتِ عايزا كدا و ما عايزا علاقتي بـ توته تبوظ ، قلت ليهو انت بتحبها صح ؟؟
قال لي بحبها شديد ، أكتر من نفسي و مستعد أفديها بروحي ....لمن قال كدا شلت راسي عن صدرو و كنت حـ أبعد رجع ضماني تاني و قال لي ما عايزا تعرفي إسمها ؟؟
ما رديت عليهو و دموعي كانت عشره عشره ، مسح دموعي و قال لي يا هبله أنا بتكلم عنك انتِ ، قلت ليهو ما تكذب علي ، قال لي أقسم بالله أنا بتكلم عنك انتِ ، لأني بحبك !!
طبعاً لمن قال كدا قلبي عمل شححح و حسيت برعشه في جسمي ، ما قدرت أرفع رأسي و أعاين ليهو ...
رفع راسي و قال لي على فكره أنا جادي و ما بكذب عليك ....بقيت ساكته بس و بعاين ليهو ...فجأه باسني على خدي و قال لي عايني ما تسكتي لي كدا ، قولي حاجه ....قلت ليهو انت بتكذب علي ...
قال يا لطيييييف و بعدين معاك !! قلت ليهو و توته !؟ انت مش بتحبها ؟؟
قال لي تطير عيشتي أنا و توته !!....يا شابه أنا لا بحبها لا هي بتحبني ! هي مجرد صديقه وفيه لي و وقفت معاي كتير ، قلت ليهو بس هي واضح إنها بتحبك ، قال لي بالجد ؟؟
هزيت ليهو راسي بس ، إبتسم و قال لي كل البعرفو إني بحبك و ما شايف غيرك ، لا توته لا أي وحده غيرها ....قلت ليهو لكن ....سكتني لمن خت يدو على خشمي و قال لي ممكن ننسى كل حاجه و ما نجيب سيرة أي كائن و بس نعيش اللحظه دي و نفكر في نفسنا ؟؟ ممكن ولا لا ؟! هزيت ليهو راسي بس...
المهم بعدها حصل الحصل.....
لقد أحببتك و سأحبك و لا أندم على لحظة واحدة من حياتي قادتني إليك "💜
يتبع.......
م عارفه اقول شنو 😂 قلت بارت واحد في اليوم ....عاينوا خلوها مفتوحه ، يعني لو نزلت بارت خير و لو اتنين خيرين
