الصباح صحيت نشيطه و إبتسامتي للضرس الآخير ، زيدان قال لأمي يا حجه ألحقي بتك دي شكلها جنت ، قالت ليهو خليها بتكون متبعه مقولة اضحك للحياه عشان تضحك ليك ، قلت ليها شبه كدا ، رشا قالت بتكون شافت ليها حلم حلو ، سماح قالت ليها هي نامت عشان تحلم !! امبارح كل ما تجيني صحيه بلقاها ماسكه تلفونها و بتبسم ، سارا قالت خلااااص معناها دا ناصر ، غمزت لي و قالت لي قال ليك شنو ....قلت ليهم كلكم ما عندكم موضوع ، الزول لو زعل مشكله و لو فرح مشكلتين ، دي سنه جديده و أنا عايزا 2023 دي تكون بدايتها سعيده عشان كدا مريحه راسي و صاحيه مبسوطه ، زيدان قال لي نتمنى ذلك ....
المهم بعد شربنا الشاي و فطرنا طوالي طلعنا و كل واحد رجع بيتهم ، لمن جينا داخلين أبوي قال لينا حمدالله على السلامه قايلكم ما حترجعوا تاني ، ضحكنا و قلنا ليهو كنا حـ نقعد مع حبوبه أكتر لكن إشتقنا ليك ، ضحك و قال لينا يلا اقعدوا أحرسوا بيتكم أنا طالع ، أمي قالت ليهو ما تقول لي عندك شغل و الناس مؤجزه !!...قال ليها لا بس في واحد صاحبي عازمنا في بيتو ، رشا قالت ليهو خلاص سوق معاك أمي لو هم جايبين نسوانهم ، قال ليها جايبنهم والله لكن أكيد أمك جايه تعبانه و تاني ما حتقدر تمشي معاي ، أمي قالت ليهو بري والله قااااادره ، انتظرني بس ، قلت ليهم حـ ترجعوا البيت متين ؟؟
زيدان قال لي أمـي لسه ما فطمتك ؟؟
ضربتو في كتفو و قلت ليهو انت أسكت ، أبوي قال لي ما معروف يمكن لحد المغرب كدا ، قلت ليهم طيب ما تتأخروا ، أبوي قال لي ليه في حاجه يعني ؟؟
قلت ليها لا لا ساي قلت كدا عشان لمن تغيبوا إنتوا الإتنين من البيت ببقى لينا باهت و ما سمح ، زيدان قال ليهو بتك دي من أصبحت ما طبيعيه يا حاج ، رشا قالت ليهو حاسه إنو اليوم حـ تحصل حاجه سمحه ...
المهم بعد ما هم مشوا بقينا قاعدين أنا و رشا و زيدان ، قلت ليهم واحد فيكم يقوم يعمل لينا حاجه خفيفه نقزقز بيها ، رشا قالت لي قايلانا ناصر !!...قومي أمشي المطبخ و حاولي أطبخي براك ، قلت ليهو زيدان قوم انت ، رشا دي كلبه ساي ، قال لي يا بتي دي شنو دي الأدوار المعكوسه دي ! انتِ و أختك ما بتخجلوا تكونوا قاعدين و أخوكم طول و عرض يدخل المطبخ و يطبخ ليكم ؟؟؛
قلت ليها زيدوووني ، أخوي حبيبي ، والله ما فيها حاجه ، قال لي دا كووولو ما بسلك معاي ، قومي براك ، قلت ليهو أنا ما أختك !! قال لي شاكي ، رشا قعدت تضحك فيني ، قلت ليهم انتوا أخوان أشرار بس أصبروا أنا أساساً ما قاعده ليكم و بكرا تتصلوا و تقولوا لي جايانا متين ، قالوا لي ليه مسافره برا السودان ولا شنو ، قلت ليهم آي 🥲
رشا قالت لي خلاص لمن تكوني مسافره كلمينا قبل يوم عشان نعمل ليك حفلة وداع ...قلت ليها أصبري لي ...إتلفت على زيدان و قلت ليهو زيدووو 🥺
قال لي ما تعايني لي كدا أنا قررت إني ما أطبخ لأي أنثى إلا هي ، أنا و رشا في نفس الوقت قلنا ليهو شنووو !! دي منو ؟؟
قال لينا شي ما بخصكم ، قمت من مكاني و مشيت قعدت جنبو و ضيقت ليهو عيوني و قلت ليهو قول لي دي منو ؟؟ ربع يدينو و قال لي أبيت ، رشا قالت ليهو لو ما كلمتنا حـ نكلم ليك أمي و أبوي و نقول ليهم في بت بتلعب بـ زيدان و ممشياهو مسطره لدرجة إنو قال مستعد بعدين يكون خاتم في يدها و يطبخ ليها ، قلت ليهو و كمان حـ اقول لأمي البت إتصلت عليهو و قالت ليهو في اللحظه دي ترسل لي قروش و هو من دون ما يتردد رسل ليها مبلغ كبير ، رشا قالت ليهو و كمان حـ نقول ليهم انك كنت في أنصاص الليالي تتبكى و تقول ليها سامحيني يا سوسو أنا ما قادر أتنفس ....عاين لينا الإتنين و بعدها فك الضحكه قال لينا انتوا بنات مجنونات ، قلت ليهو بعد دا حـ تقول لينا صح ؟😀
سكت مسافه و قال لي طيب ، استعدوا ....صلحنا قعدتنا و قلنا ليهو اهااا ...أخد نفس و قال لينا.....قلنا ليهو اهاااا......قال لي البدايه كانت.....سوووري ما بقدر أحكي ليكم و قعد يضحك لمن شاف تعابير وشوشنا ، شلنا المساند و بقينا نضرب فيهو و هو لسه بضحك ، قال لينا خلاص وقفوا ، كفايه ، كفاااايه قلنا ، وقفنا و قلنا ليهو يلا أحكي ، قال لينا ماف شي عشان أحكيهو ، في بت عاجباني و خلاص و هي نفسها ما عارفه ، قلت ليهو نحنا بنعرفها ؟؟ قال لينا لا و أبى يحكي لينا لمن زهجنا و خليناهو ، رشا قالت لينا أرح نلعب ليدو ، المهم فتحت تلفوني و بقينا نلعب ليدو لحد العصر و طبعاً زيدان كان بفوز على طول و أحياناً رشا و أنا آخر وحده و هم بكاوا فيني و هم لو قاموا على العباطه و المكاواة ما بسكتوا والله ، لدرجة إني بكيت بسببهم و شلت منهم تلفوني و مشيت غرفتي و هم بضحكوا ، دخلت و أنا عيوني مليانه دموع ، فجأه ناصر إتصل علي ، أول ما فتحت الخط ، قال لي حبيبي كيفك ؟
قلبي عمل شححح عشان قال لي "حبيبي "!!
قلت ليهو كويسه ....قال لي لا ما كويسه ، في شنو مالك صوتك متغير ، طوالي دموعي نزلت ، قلت ليهو ديل رشا و زيدان ، قال لي خليهم يصبروا لي ، عملوا شنو لـ مرتي ؟؟
قلت ليهو لو كلمتك حـ تضحك علي ، قال لي ما ممكن حاجه تتسبب في بكاك و تضحكني ، قلت ليهو كنا بنلعب ليدو ،و هم كانوا بفوزوا على طول و أنا بطلع خسرانه ، ما فزت ولا مره و هم بقوا يضحكوا علي و يكاوا فيني شديد ...قال لي ليييه لييييه بس ، أكيد كانوا بغشوا و اتفقوا عليك لو ما كدا ما كان خسرتي ، قلت ليهو نهاي ما خلوني أفوز ، قال لي ما مشكله كفايه انك فايزه بقلبي و محتله المرتبه الأولى.... طبعاً كلامو خجلني ، لمن ما رديت ضحك و قال لي ما بقدر انتظر للمسا ، انتوا مش رجعتوا من بيت حبوبتكم ؟؟ قلت ليهو أيوه ، قال لي خلاص حأجي عليكم و أرجعك معاي ، قلت ليهو أمي و أبوي ماف ، عايزهم يرجعوا و ما يلقوني !!؟
قال لي أنا اتصلت على الوالد و كلمتو من أمبارح ، قلت ليهو شنووو !! جادي ؟؟ قال لي أكيد.....قلت اهااا معناها أبوي قبيل كان ناقش الحنك و عارفني مبسوطه ليه ، بس ما جاب لي سيرة الموضوع !!
ناصر قال لي معاي انتِ ؟؟
قلت ليهو أيوه ، قال لي طيب جهزي نفسك انا جاي عليك ، قلت ليهو طيب ، قفلت منو و مشيت الصالون ما لقيت زول ، لمن دخلت المطبخ لقيت رشا هناك ، عاينت لي لقتني بضحك ، قالت لي الجن ولا النفسيات ، قلت ليها احم ناصر جاي بعد شويه ، قالت لي ليه ؟؟🌚
قلت ليها عشان يسوقني !!، قالت لي دا الكنت متوقعاهو أصلاً انتِ ماف زول بخليك تضاحكي كدا زي المجنونه من الصباح غير ناصر ، قلت ليها اتخيلي إنو مكلم أبوي !! قالت لي و أمـي كمان عارفه كلمها قبيل و قبل ما تمشي كلمتني بس ماف زول اتكلم معاك في الموضوع لأنك بتاعة حركات ، هسي لو جينا و إتكلمنا معاك حـ تمثلي و تعاندي و تقولي ما راجعه معاهو و و و...قصصك الكتيره ديك ، رغم انك عايزا ترجعي معاهو ، عشان كدا قلنا ما نشتغل بيك كتير ، قلت ليها يعني كنتوا عارفين و عاملين رايحين فظيعين انتوا !!
المهم مشت كوت معاي و رتبت لي ملابسي في الشنطه ، بعدها إتدوشت و سرحت شعري و ختيت عبايتي جاهزه ، رشا جات و قالت لي تعالي أكلي ليك حاجه قبل ما تمشي ولا ما قادره تأكلي من شدة الفرح ؟؟ قلت ليها هييي أكيد جايه لأني جعانه ، المهم اول ما نزلت تحت ، زيدان قال لـ رشا يعني الأخت دي لسه قاعده !؟😂
قلت ليهو قاعده ليك في راسك ؟؟
رشا قالت ليهو زيدان خليها هي براها زعلانه من قبيل بسبب الليدو ، ما تزعلها تاني ، قال ليها أنا عشان عارف حركاتهم و عارف البت المجنونه دي كويس بقيت ما بشتغل كتير بالموضوع لمن تكون خامه شنطتها و جايه لكن عشان نحنا أهلها بنجاملها و بنطبل ليها ساي ، قلت لـ رشا انتِ عشان عملتي مكرونه بالبشاميل أنا سامحتك لكن اب راس دا ما حـ اسامحو و عرسو ما حـ أحضرو ، قال لي أنا عرسي عاملو لـ ناس بيتنا و أهل البت بس ، يعني أي زول خارج البيت دا ما لازمني 😂
قلت ليهو كويس ...
المهم قعدنا و بقينا ناكل و أنا ساكته ساي ، عايزا أعمل نفسي زعلانه و اتموضع بيهم قبل ما أمشي ، رشا و زيدان كانوا بتونسوا و بشغلوها لي عشان ناصر جاي ، حتى لمن خلصنا أكل كنت ساكته ساي ، زيدان جراني من شعري و قال لي أنا ما بحب الأصنام ، قلت ليهو فكني ياخ ، قال لي أبيت ، قلت ليهو ياخ أنا ما عايزا معاك هزار فك الشعر دا 😡
رشا قالت ليهو البت جاده ! فكها يا زيدان هسي تقوم تنفسن و تتبكى فينا !!
قال ليها أبيييت أشوفها حـ تعمل شنو ، جرا لي شعري و بالجد الجره كانت شديده ، صرخت و قلت ليهو ياخ حرام عليك ، إتخلع و فك شعري و قال لي آسف ما قاصد ، طلعت منهم و مشيت الحوش ، جا لاحقني و قال لي بقيتي بكااااايه و زعيله ، فجأه سمعنا صوت الجرس ، زيدان مشى فتح الباب و قال أووو ابو النسب ، طوالي ناصر جا داخل ، سلم عليهو بحراره و قال ليهو إتفضل ، أول ما دخل شافني و أنا عيوني مليانه دموع ، عاين لـ زيدان و قال ليهو دقيتوها ولا شنو ؟ زيدان قعد يضحك ، رشا جات و قالت ليهو دا الشوق يا ناصر و مشت سلمت عليهو ، قال ليهم لا لا دي ما دموع شوق الشابه دي شكتكم لي يا أشرار شكلكم مزعلنها ، زيدان قال ليهو ربنا يعظم أجرك يا ناصر و يعينك ....طوالي قعدت أحمر لـ زيدان ، رشا قالت ليهو اتفضل جوه يا ناصر ، دخلوا جوه و أنا كنت واقفه في مكاني ، ناصر جاني راجع و باسني على جبيني و ضماني عليهو بسرعه و زحى مني شويه ، قال لي أشري لي بس الزعلك منو ؟؟ 😂
قلت ليهو عارفاكم كلكم بتضحكوا علي ، قال لي أبداً أبداً ، قلت ليهو أنا فاهمه ، ضحك و قال لي بقيتي زي الشفع ، المهم أرح ندخل جوه ....ساقني و دخلنا جوه ... زيدان قال ليهو ان شاء الله إشتريت ليها مصاصه ؟؟
كان عايز يضحك بس لمن شافني بعاين ليهو كتم الضحكه و قال ليهو انت ما عايز المياه ترجع لـ مجاريها صح !؟
المهم قعدنا نتونس شويه و رشا كانت عايز تخت ليهو أكل قال ليها ما عايز فـ جابت ليهو عصير ، بعدها قال لي نمشي ؟؟
قلت ليهو ثواني ألبس عبايتي ، رشا قالت لينا عليكم الله أقعدوا شويه ! أرح نلعب ليدو ، قلت ليهم بصوت عالي لا ما عايزين ، كلهم قعدوا يعاينوا لي ، رشا قالت لي مستعجله عشان تمشي ! قلت ليها ايوه عشان انتِ و أخوك كرهتوني ، زيدان قال لي عذرك مقبول ،يلا اتخارجي 😂
ناصر قال ليهو أنا بعد دا حـ اشتبك معاك ، رشا قالت لينا عليكم الله أقعدوا و أمشوا بعدين ، هسي تعالوا نتونس و نلعب ، مشت جابت مكسرات و جات ، فتحنا الليدو و بدينا نلعب ، طبعاً أنا في الليدو كنت في النص و زيدان عندو كلبين ، واحد قدامي و واحد وراي بـ 3 خطوات ، كان عايز 3 عشان يكتلني فـ بقيت اقول يا رب لا يا رب لا يا رب لـ....فجأه جاب تلاته ، بقيت اصرخ و اقول ليهو لااااا ما عااايزا ما عايزا والله 😭😭 قال لي ما بعرف طوااالي حأشوت ليك كلبك دا برا ، ناصر قال ليهو زيداااان خليها ، زيدان قال ليهو عشانك بس يا أبو النسب ، خلاني و مشى التلاته بالكلب القدامي فـ لعبت و جبت 3 و من دون تردد كتلتو طوالي ، قال لـ ناصر ياريتني ما سمعت كلامك 😂
المهم بقيت ألعب بحماس و ناصر نهاي ما كتل لي لاعب ، يعني حتى لو جاتو فرصه يكتلني بخليني و بتسداها في رشا أو زيدان و هم لمن يكونوا عايزين يكتلوني ناصر بحنكهم عشان يخلوني و كدا المهم في النهايه أنا فزت أول وحده ، قعدت أنطط و أكاوي في رشا و زيدان ، ناصر كان بعاين لي و بضحك ، بعديني طوالي فازت رشا ، باقي ناصر و زيدان ، قلت يا رب يفوز ناصر ، زيدان قال لي كويس يا بياعه ، المهم بقوا يلعبوا و اللعبه سخنت و أنا بدعي إنو ناصر يفوز و شغاله ليهم أكيد حـ يفوز ناصر بس للأسف فاز زيدان ، قلت ليهم ما مشكله أنا بشركو معاي في المرتبه الأولى ، زيدان قعد يضحك قال لـ ناصر كان ممكن انت تكون الأول ، في الوقت الكان مفروض تحجج فيهو كنت بتكتل فينا أنا و رشا عشان الشافعه دي تحجج قبلينا و تفوز و في الآخر انت خسرت 😂
قال ليهو ما مشكله المهم إنها فازت ، رشا قالت انت عارف يا زيدان هي لو ما فازت حـ تعمل شنو فـ ناصر مفتح ، اختصر السكه و ريح نفسو من وجع الراس الكان ممكن يحصل ، ناصر قال لي أخوانك عايزين يفتنوا بيناتنا 😂 قلت ليهو أيوه أنا عارفاهم ....المهم ناصر قال نمشي بعد دا ، دخلت لبست عبايتي سرعه سرعه و شلت شنطتي و جيت نازله ، ناصر و زيدان سبقوني برا ، رشا قالت لي المره دي حاولوا تخففوا من المشاكل ، تعبنا نحنا ، ضربتها على كفتها و قلت ليها و انتِ حاولي تدي حسام رقم أبوي في أسرع وقت ، قالت لي اليوم حـ أديهو الرقم ، قلت ليها بالتوفيق ، المهم طلعت معاي....
✨ من ناحيه تانيه :
زيدان و ناصر اول ما طلعوا الشارع ، زيدان قال لـ ناصر ما بطبل لأختي ولا بشكرها ليك ، عارف إنها عنيده و بتنفعل بسرعه و ما بتدي القدامها فرصه عشان يشرح ليها و ممكن تفسر على كيفها و على الأساس دا تاخد موقف ، بس هي صدقني بريئه شديد و قلبها أبيض و ما بتعرف تتصرف براها ، ايوه قد تظهر للناس انها قويه و عكس كدا بس هي صدقني لينه و ما بتستحمل أي شي ، مش رشا دي أصغر منها !؟ صدقني أنا بخاف عليها أكتر من رشا لأنو رشا في مواقف كتيره بتثبت و بتعرف تتصرف أما مها لو ما لقت واحد مننا قدامها أمورها بتجوط و بتتوتر و بتقعد تبكي ، أنا والله لو علي أكون ملازمها على طول لأني عارفها كويس ، هي نشأت و نحنا محاوطنها من كل الإتجاهات ولو قالت اخخ بس بتلقانا كلنا حوليها ، هي ما أصغر وحده بس كبرت و إتربت على العطف و الحنان و لأنها حساسه كان ليها النصيب الأعظم من الحب و الدلع و العطف ، المهم يعني انت حاول تفهمها و تطول بالك شويه و لو جاطت بسبب حاجه و إنفعلت فيك أسكت خليها ، أول ما غضبها يخف براها حـ تجي و تعتذر منك لأنك ساعة غضبها ما اتعاملت معاها بنفس الطريقه الإتعاملت بيها معاك ، إلتمست ليها العذر و فضلت انك تسكت ، هي زي الأطفال بتزعل بسرعه و بتتراضى بسرعه ، لاحظ انها لمن جات هنا كانت زعلانه شديد و أدتنا إحساس إنها مستحيل ترجع ليك تاني بس هسي شوف كمية الفرحه الفي عيونها لمن جيت عشان تسوقها ، نست أي حاجه و حتمشي معاك من دون تردد ، هي لو ما حاسه انك الشخص المناسب ليها صدقني ما حـ تتنازل كدا و تجاملك و تجي معاك ، في بيتكم ما عارف البحصل شنو بيناتكم من مشاكل بس لو غلطت أمسحها لي في وشي ، و هسي أنا فهمتك طبعها ....ناصر خت يدو على كتف زيدان و قال ليهو ما بتوصيني عليها 💜 أنا عارفها كويس عشان كدا لمن تزعل و تجيكم من دون ما تكلمني بعذرها و أساساً بقيت أفهمها ...
