ماف أقسى من الخذلان البجي بعد عشم كبير ، خاصة لمن يجيك من أقرب الناس ليك حـ يخليك تفقد الثقه في كل الناس الحوليك ، إحساس الخذلان زي إحساس زول قست عليهو الأيام و جارت عليهو الدنيا و أدتو كفوف من كل الإتجاهات فـ جرى و هو كلو لهفه و عشم لـ إنسان معين بالنسبه ليهو ملاذ و ركن الآمان و حضن دافي عشان يحتمي بيهو من جور الدنيا و قساوة الأيام و يقوي نفسو بيهو فـ يقوم نفس الشخص دا يصفعو كف !
الكسره و الخلعه و الألم الحـ يحس بيهو لحظتها عمرو ما حـ ينساهو ، الأيام بتمضي و المواقف بتنتهي بس أثرها عمرو ما حـ ينتهي لأنو ما حـ ينتسي ، ممكن الواحد يقدر يسامح أي إنسان إلا الشخص الخذلو ، ممكن يقبل أي إعتذار إلا الإعتذار البكون سببو خذلان ، لأنو في فرق كبير بين إنك تعتذر لي لأنك زعلتني و خليتني أغضب و بين إنك تخذلني ، الزعل ممكن يحتاج لإعتذار من الطرف التاني ، أو لـ صمت ، أو لـ شوية وقت ، بس الخذلان ماف شي بخفف مرارتو لا وقت لا صمت لا إعتذار !
في خذلان بوصلك لمرحله انك تتمني عدم معرفتك للزول دا و يخليك تقول ياريتني ما قابلتو في حياتي كلها ، ياريتني ما اتعاملت معاهو ، ياريت ما جمعنا شي و ربطنا ببعض ، في خذلان من شدة مرارتو و وجعو بخليك تتمنى لو كان قلبك قزازه عشان تكسرها ، أو لو كان ورقه عشان تشرطها ، أو لو كان حجر عشان ما تحس !
_ ما فاهمه أنا ! ما قادره استوعب كيف يعني ناصر أخوي طلقك ! ليه يطلقك أصلاً ! فهموني بس يا يخوانا الحصل شنو ! يعني أياً كان نوع الحاصل بيناتكم أكيد ما حـ يوصلكم للطلاق ! ناصر أخوي و أنا بعرفو كويس ، مستحيل يطلقك يا مها !
= كيف مستحيل يطلقها و هو طلقها و انتهى يا ورده ! لا انتِ لا مها ماف وحده تزعل مني بس الحصل دا شي متوقع ، أمك من زمان عايزا تعرس لأخوك و الطلاق دا نحنا كنا متوقعنوا ، أصلاً هم و زي ما قالت أمك مستقبلهم ضبابي و ما بقدروا يتفاهموا ، الحاجه الوحيده الما قادره افهمها ليه ناصر طلقها في التوقيت دا تحديداً ؟! يعني في الزمن الكان مفروض فيهو يطلقها و تنتهي علاقتهم هو رفض يطلقها و إختفى فتره عشان ماف زول يجيب ليهو سيرة الطلاق و هسي بعد رجع اتعامل معاها كويس شنو الغيرو فجأه ولا أصلاً كان مفكر يطلقها على أي حال من الأحوال !
_ دا الما قادره أفهمو يا رشا ، ليه ناصر طلقها بالسهوله دي ! لا لا أكيد في حاجه ! و المشكله إنو أختك ما راضيه تتكلم و تحكي لينا الحاصل شنو بالتفصيل !... مها ، عليك الله أحكي و قولي لينا الحصل شنو بينك و بين ناصر ؟؟
= خليها يا ورده الفيها مكفيها ، ما عارفه اقول شنو بس الحصل دا أفضل ليك يا مها ، لأنو ناصر دا انتِ ما شفتي منو شي غير البكى و الزعل ، بعاملك بمزاجو لمن يحس إنو عايز يبعد ببعد و لمن يخطر على بالو يرجع برجع و تاني ببعد ! يعني علاقه غير مستقره ، كلها إرهاق و مشاعر متذبذه و زعل و نفسنه ، مرات الخير يكمن في الشر ، و أنا متأكدة انك حـ تلقي الأحسن منو ، أنسيهو و عيشي حياتك ، أصلاً هو ما يستاهلك
