يمكن من أكتر العلاقات المرهقه العلاقه البتكون مجهولة التوجه ، بمعنى انك ما عارفها ماشه على وين ولا عارف مصيرها شنو ، كل البتعرفو و متأكد منو انك ما عايز العلاقه دي تموت حتى لو كانت تاعباك و ماخده منك أكتر مما تديك ، مستعد تعمل أي شي عشان تحافظ عليها ، متمني انك تفضل في العلاقه دي و مع الشخص المعين دا بس ما كل ما يتمناه المرء يدركه ، في أحلام بنكون جارين وراها بكل ما أوتينا من قوه و في الآخر بنضطر نتخلى عنها ، في علاقات بنكون متمسكين بيها شديد رغم الوجع البتسببو لينا و في الآخر و من شدة التعب و الإرهاق بنرخي قبضتنا ! كل واحد فينا عندو قدره معينه على التحمل و الصبر و التمسك ، لو نفدت الطاقه دي الواحد حتى نفسو بكون ما قادر يهتم بيها ، في حاجات بتوجعنا شديد بس ما بنكون قادرين نتخلى عنها ، في أشخاص كل ما نحاول نبعد عنهم بنلقى نفسنا قربنا منهم أكتر ، في ناس مهما عملوا بنغفر ليهم و مهما بعدوا و طال غيابهم قلوبنا بتكون منتظراهم !... ناصر و علاقتي بيهو واحد من الأسباب القلبت حياتي و دخلتني في أجواء زعل و إكتئاب ما قدرت أطلع منها ! كل مره اقول خلاص ما عايزا أعرف حاجه عنو و عايزا أنهي العلاقه دي بلقى نفسي خايفه عليهو و بسأل عنو ، ما قادره أسمي الحاجه البيناتنا دي ! البينا أكتر من إنو ينقال عليهو حب أو عشق أو هيام ، البينا حالة نادره ، حالة ما عندها مسمى ، كل البتعبوا و البنقهروا من بعض بسيبوا بعض إلا أنا و ناصر ما قادرين نتخلص من بعض رغم قصصنا و مشاكلنا الكتير ! كأنو صابتنا لعنة حب أو أرواحنا دي إمتزجت مع بعض فـ صعبت علينا التخلي عن بعض !
و أنا سرحانه و بفكر في الكلام دا بعد ما كتبتو على دفتر جات رشا داخله و قالت لي ياااا بت عليك الله أطلعي أقعدي معانا برا ! البيت دا بقيت حاسه بيهو كئيب ، ماف غيرنا أنا و ماما البنتكلم في البيت دا !
قلت ليها رشا أنا تعبانه عليك الله خليني في حالي ! قالت لي دا كلو بسبب ناصر صح ؟ أنا فاهماك و عارفه انك ما قادره تواصلي حياتك و هو هناك وسط الحرب بس لـ متين حـ تقعدي كدا ! قولي الحرب دي لا قدر الله ما وقفت و مرت سنه و سنتين و تلاته و ناصر ما رجع حـ تفضلي عمرك كلو منتظراهو ؟؟؟
عاينت ليها و أنا عيوني مليانه دموع ... قالت لي ما تزعلي مني يا مها بس انا نفسي افهم ، ناصر دا بحبك و متمسك فيك و مستعد يعمل أي شي عشانك طيب كيف نفسو تسمح ليهو يخليك معلقه كدا ؟؟ هو حصل مره اتكلم معاك في علاقتكم الما مفهومه دي و جاب ليك سيرة مستقبلكم مع بعض ؟؟ لو هو خلاص قنع و عايز يفني باقي عمرو فداء للوطن مفروض ما يعلقك كدا ، هو بس عشان ما شايف حالتك و ما عارف انتِ حاسه بشنو و بتمري بشنو ، تقريباً كل الرجال كدا عواليق و ما بدوا أهميه لـ مشاعر البت و بحبوا يعلقوا بنات الناس فيهم ... و هي بتتكلم أنا دموعي جات نازله ، ما قدرت أرد عليها لأني عارفه إنو كلامها صح ، ظاهر إنو ناصر ما مفكر فيني و ما عامل لي حساب و ما هاميهو شي !
اليوم الحرب دخلت شهرها التامن و ماف أي مؤشرات لـ وقوفها ، كل يوم الناس بتموت ، كل يوم عدد النازحين بزيد ، كل يوم بتتهد بيوت ، كل يوم عدد الدعامه بزيد ، كل يوم بترتكب أبشع الجرائم و كل يوم الوضع بزيد سوء ، كنا بنطمنا روحنا و بنردد جملة : بكرا الهم يفوتنا ، نرجع لـ بيوتنا ، بس للأسف لا فاتنا الهم لا رجعنا لـ بيوتنا ، و يمكن أصعب و أقسى فكرة ممكن تخطر على بالنا فكرة إنو الواحد يمكن ما يشوف الخرطوم مره تانيه ، يمكن ما يرجع لـ بيتو القضى فيهو كل طفولتو ، البيت الدافي ، البيت يلي في كل ركن فيهو عندنا ذكريات دافئه و لحظات حنينه ، البيت الإحتضن طفولتنا و مراهقتنا و لمتنا و ضحكاتنا و أحزانا ، و يمكن الأصعب من السفر أو النزوح لمن تمشي و تخلي زول وراك سواء كان حي أو ميت 💔
