من شدة الخوف و الخلعه شنطتي وقعت مني ، كنت حـ أجري بس فجأه كدا باب العربيه إنفتح و نزلت خالتو ماجده جارتنا ، عاينت لي بإستغراب و قالت لي مها يا بتي مالك في شنو ؟؟ بالباب التاني نزل منذر ولدها و جا قال لي خير إن شاء الله !؟
مع إني ما بحب أبكي قدام زول و بكاي ما بالساهل بس بالجد كنت مقهوره و قلبي واجعني شديد ، طوالي قعدت أبكي ليهم ، خالتو ماجده جات ضمتني عليها و قالت لي كر علي يا بتي في شنو قولي لي !؟
ما قدرت أتكلم و اصلاً أنا كدا لو بديت أبكي بحرقه مستحيل أسكت بالساهل و مستحيل اقدر اتكلم ، بحس صوتي رايح و انو في حاجه واقفه لي في حلقي ، كانت كل ما تسألني بشهق و ببكي زياده ، منذر جا و قال لي كدي قولي بسم الله يا مها و فهمينا الحاصل شنو و ناصر وين و كنتِ ماشه وين ؟؟
لمن جاب لي سيرتو دموعي نزلت زياده ، لحد اللحظات ديك خالتو ماجده كانت ضاماني ، قالت ليهو يا حليلها يا منذر من شدة الزعل و البكى ما قادره تتكلم ، قطعت قلبي والله ، كدي إتصل على راجلها و كلمو و خليهو يفهمنا الحاصل ، قال ليها كويس بس أرح أركبوا خلونا نصل البيت و بعدها حنفهم في شنو ، قلت ليهم ما ماشه البيت ، خالتو ماجده قالت لي أرح معاي بيتي طيب شكلك متشاكله مع راجلك ، قلت ليها ماشه أهلي أنا دقيقه وحده ما بقعدها معاهو تاني ، قالت لي ماشه لأهلك زي الزمن دا !؟ عايزا تخلعيهم ولا شنو ، يا بتي أرح معاي بيتي وقت ما ماشه بيتك و الصباح رباح ، بكرا نفهم الحاصل بعدها البحصل كلو خير ، بس ما حـ نخليك براك في الليل دا ، المهم ركبوني معاهم و خالتو ماجده كانت راكبه معاي ورا ، أول ما منذر طلع تلفونو قلت ليهو إياك تتصل عليهو ، قال لي بكون مقلق و خايف عليك ، هو عارفك طلعتي من البيت ؟؟ ما رديت عليهو ، خالتو ماجده قالت ليهو أكيد ما عارف و إلا ما كان خلاها تطلع في الليل دا مهما كان سبب المشكله الحاصله بيناتهم ، المهم لمن وصلنا جنب بيتهم لمحنا عربية ناصر جنب الباب ركب و دورها ، منذر كان عايز ينزل يكلمو فـ قلت ليهو لا يا منذر ما عايزاهو يعرف إني هنا ، قال لي يعني نخليهو يلف كدا الليل كلو ؟؟
أمو قالت ليهو خلاص يا منذر خليهو ، المهم هو ضرب بوري و طوالي بابهم انفتح و دخلنا بينا جوه ، طبعاً أنا كنت حاسه بالحرج منهم و ما عندي نيه أدخل معاهم ، خالتو ماجده حست بي قالت لي البيت بيتك يا بتي أدخلي ساي لا تخجلي لا تنحرجي مننا ، المهم دخلت معاهم جوه ، طبعاً ناس بيتهم كانوا نايمين ، قالت لي نحنا جينا من المستشفى أولادي عندهم عمهم مرقد هناك ، هسي أبونا قاعد معاهو في المستشفى و أنا و منذر جينا راجعين ....المهم دخلتني غرفه كدا و قالت لي هسي بجيك ، قلت ليها ما عايزا حاجه أنا يا خالتو ، قالت لي خليني اجيب ليك حاجه تاكليها أو تشربيها ، قلت ليها لا لا والله ما عايزا أي حاجه يا خالتو ماجده ، قالت لي طيب يا بتي قولي لي مالك مع راجلك ؟؟ طبعاً ما قدرت أقول ليها مع إني ما النوع البسكت ، أنا لو زول غلط في حقي و جاتني فرصه أحكي للناس و اقول عمايلو من دون ما أتردد بحكي و بفضحو ، بس بالجد ما قدرت أحكي ليها رغم إنو العمل ناصر كعب شديد ، لمن شافتني ساكته قالت لي خلاص تصبحي على خير ، قلت ليها نقاش عادي يا خالتو بس انا ما متعوده إنو زول يرفع صوتو علي عشان كدا زعلت و طلعت من البيت بدون علمو ، قالت لي ربنا يهدي سركم يا بتي و كل مشكله ليها حل بس انتِ ما تطلعي و تخلي بيتك ....
من ناحيه تانيه منذر أول ما نحنا دخلنا إتصل على ناصر و كلمو إني معاهم و قال ليهو خليها معانا لحد الصباح لأنها رافضه ترجع ، ناصر قال ليهو أنا جايكم هسي ....
المهم أنا ما قدرت أنوم و أصلاً ما رقدت على السرير ، ما بتعود طوالي على الأماكن الجديده و أصلاً أنا متضايقه لأني اضطريت أجي معاهم بيتهم ، بعد ربع ساعه كدا جاتني خالتو ماجده داخله ، قالت لي يا بتي راجلك دا منتظرك برا والله قدر ما حنستو عشان يخليك تبيتي هنا رفض و نحنا ما بنقدر نغصبوا على حاجه....
مع إني حالفه ما أمشي بس حسيت بحرج من الناس ديل ، ذنبهم شنو نقعد نتشاكل ليهم في بيتهم و أساساً أنا ما مرتاحه هنا ، قلت ليها طيب جايه ، شلت شنطتي و مشيت معاها ، لمن طلعنا لقيت ناصر واقف مع منذر و ملامح وشو ما بتتفسر ، منذر قال لي معليش بس والله ما قدرت أخليهو لافي كدا في الليل دا و انتِ هنا ، ناصر قال لي أمشي قدامي ، خالتو ماجده قالت لينا الله يهدي سركم يا أولادي ، حاولوا اقعدوا و حلوا مشكلتكم دي و ان شاء الله حـ تنحل ....المهم إتحركت كدا و طوالي دخلت البيت ، أول ما وصلت الهول لقيت توته هناك ، قلت ليها غيتو عليك جنس تمثيل و حركات !! مش قلتي ماشه من هنا و عملتي لي مسرحيه طويله عريضه !! اقسم بالله أرخص منك ما شفت ، ياخ خلي عندك شوية كرامه و إحساس ، لو دي وحده غيرك دقيقه وحده ما كان قعدتها هنا و أساساً ما كانت حـ تجي و تقعد في بيت راجل بحكم انو صاحبها ، ما بعملوا كدا إلا البنات الرخاص الما عندهم وليان ، يعني بنات الشوارع... فجأه كدا أحس ليك بـ ناصر واقف قدامي ، هرشني و قال لي أمشي غرفتك و ديك قعدت تتباكى ، قلت ليهو حـ أمشي ، أساساً أنا ما قاعده ليكم ، لو هي بتقبل بالإهانه و الرخصه أنا ما بقبل بيها لأني بت رجال و انت خليك جااااهز عشان لمن الموضوع دا يصل أهلي تكون مجهز ردودك ، أشوفك حـ تقول ليهم شنو لمن يعرفوا انك جايب بت و مقعدها معانا ، مع إني عارفاك نسونجي و بتحب البنات زي عيونك بس خالص ما اتوقعت منك حركه زي دي ، المهم دي آخر ليله لي في البيت دا و بعدها خلقكم انتوا الإتنين ما حابه أشوفها ، إتحركت كدا و تاني رجعت و قلت ليهو سؤال بس ، انت وقت خايف عليها و شايف انها ما بتقدر تهتم بنفسها براها و هي عامله حادث ليييه ما وديتها بيت أهلك ؟؟! ....لأنك عارف انو دا غلط و غلط كبير كمان ، توته قالت لي مها انتِ عارفه إني ما قاعده معاكم هنا للأبد ، والله كم يوم بس و ناصر هو الأصر علي و أصلاً أنا اليوم كنت راجعه لأهلي في الولايات ، أنا مستحيل اقعد في بيت راجل و ناصر دا لو ما بعرفو و بعرفني حق المعرفه صدقيني دقيقه وحده ما كنت قعدتها في بيتو و هسي هو لو سمح لي أمشي والله حأمشي بدون تردد ، قلت ليها لا لا خليك قاعده و أخدي راحتك أنا الحأطلع ليكم من البيت لأنو عندي أهل يلموني .....قلت كدا و طوالي مشيت غرفتي ، ختيت شنطتي جنبي في السرير ، رقدت و قلت الله يجيب الصباح ، بعد شويه كدا ناصر جا داخل ، عاينت ليهو و رجعت عاينت للسقف زي ما كنت قبل ما يدخل ، أول ما جا قعد في السرير أنا قمت منو ، قلت ليهو ديك غرفتك أمشي نوم فيها و لو ما شالتك أو ما عجبتك بتقدر تمشي و تنوم في غرفة توته بتاعتك ، أصلاً ما فضل شي غير تنوموا في نفس الغرفه و يمكن قبل كدا نمتوا سوا .... طبعاً في اللحظه دي رفع راسو و عاين لي !! قلت ليهو تم المقصر عليك الله ، أخد نفس و قال لي أنا مليون مره شرحت ليك وضعها ، قلت ليهو و كان قدامك كميه من الخيارات بس انت إخترت انك تجيبها بيتك !! مع إنو كان ممكن تقعد في مكانها و تجيها واحده من صحباتها ولا أي مصيبة زمان بتعرفها لأنو استحاله تكون لافه في البلد دي من سنوات و ما بتعرف زول و برضو كان ممكن توديها بيت أهلك و طبعاً دا في حال إنك حاسي إنو دا الصح ...أنا ما عتبانه عليها هي لأني عارفاها عايزا تصل لشنو و لأني عارفه انها لو ما لقت فرصه ما حتقدر تعمل حاجه ، أنا مستغربه فيك انت دا و ما عارفه هدفك من دا كلو شنو !؟؟ يعني الفكره أو الغايه شنو من كونك تجيب صحبتك بيتك !!؟...هه يمكن انت متعود من زمان تجيب بناتك في البيت دا و زولتك دي شكلها جات هنا اكتر من مره و عشتو زي المتزوجين عشان كدا هي بتعرف تفرز طبخك و حافظاك كويس 😊 قال لي بنهره : مهاااا !!
واصلت و قلت ليهو المشكله انك عارف انو هي بتحبك و واثق من الحاجه دي مع ذلك مشيت و جبتها لا و كمان جبت ليها شنطها!! دي منو البتقبل بالحاجه دي ؟؟ سمعت ليك بزول جاب صحبتو و سكنها معاهو في البيت ؟؟
قال لي هي ما حتسكن هنا ، حـ تقعد فتره لحد ما تبقى كويسه بعدها حأشوف ليها شقه تقعد فيها لأنو سيد الشقه القاعده فيها طردها و أساساً كان في مشاكل في شقتها ، قلت ليهو بالله !! و طردها ليه ان شاء الله!؟؟ يعني انت صدقتها ؟!!
وقف على حيلو و جا علي ، خت يدينو على أكتافي و قال لي ما نفسي تحصل خلافات بيناتنا بسبب الموضوع دا ، أنا ما مستعد أخسرك والله ، انتِ ما عارفه أنا حصل فيني شنو لمن جيت و ما لقيتك و لمن اتصلت عليك كتير بس ما كنتِ بتردي و في الآخر رجعت و اكتشفت إنك مخليه تلفونك هنا ، طلعت للمره التانيه و بقيت أفتش عليك زي المجنون ، قلت ليهو عاين ما تصرف لي عربي كتير ، الليله دي آخر ليله لي في البيت دا و لو بالجد انت ما مستعد تخسرني معناها لازم بكرا البت دي ما تكون موجوده في البيت دا ، ما أنا البقبل بالحقاره و قلة الأدب ، نزلت يدينو من أكتافي و قلت ليهو الحركات دي ما علي أنا ... طبعاً بقى يعاين لي بإستغراب لأني فجأه كدا اتغيرت 180 درجه ، قال لي ما تعملي فجوه بيناتنا ، أنا ما عايز أخسرك ، قلت ليهو بالله !! دا كلو و ما عايز تخسرني ؟؟ معناها لو كنت عايز تخسرني كنت حـ تعمل شنو ؟؟ حـ تقلب البيت بار ؟!، في اللحظات دي عاين لي بحده ، قال لي أنا لحد اللحظه ماسك نفسي و ما عايز أرفع صوتي عليك و أزيد الوضع سوء ، قلت ليهو والله ما كان نفسي اسأل سؤال زي دا و أخت نفسي ضمن خيارات أو في مقارنه مع وحده ، لكن حـ اسألك بما انك قلت ما نفسك تخسرني و ياريت تجاوب من دون حرج و تردد جاوب عادي أصلاً كدا كدا خربانه ....سكته مسافه بعدها قلت ليهو أنا ولا توته ؟؟ ...هه مع إني عارفه السؤال دا صعب عليك و....قاطعني و قال لي أكيد انتِ.... طبعاً حيرني !! ما إتوقعتو يقول لي كدا ! إتخيلت انو حـ يطلع من دون ما يرد علي ، قال لي تاني و تالت و رابع و إلى مالا نهايه انتِ ، قلتها ليك قبل كدا و حأقولها ليك تاني ، انتِ في كفه و باقي الناس في كفه تانيه ....قلت ليهو أطلع و اقفل معاك الباب لأني ما توته البتمشي تقول ليها كلمتين تلاته و ترجعها عادي ، قال لي مها أنا....قاطعتو و قلت ليهو اطللللع ما سامع انت !؟
طلع و قفل الباب بقوه ، قلت نهاي ما حـ اتساهل معاهو عشان يعرف حجم الغلط العملو و عشان يفهم إنو أنا و البت دي ما بنقعد في مكان واحد ، المهم الليل كلو قضيتو بتقلب ، تاني يوم من صلاة الصبح جهزت نفسي عشان أطلع من البيت و أمشي أهلي ، خليتو بعد صلى و دخل غرفتو ، انتظرت شويه لمن الواطه أصبحت شويه بس الزمن كان بدري ، طلعت براحه و طوالي مشيت على الظلط ، انتظرت شويه بعدها جات مواصلات ركبت و مشيت ، طبعاً اليوم دا كان يوم جمعه ، المهم وصلت أهلي ، أمي كانت في المطبخ و أبوي في الهول و زيدان كان ياداب صاحي من النوم و جاي نازل ، طبعاً رشا هي الفتحت لي الباب لمن شافوني بشنطتي عاينوا لي بإستغراب ، زيدان قال لي تاااااني ؟!؟
أمي جات طالعه من المطبخ و جات علي و قالت لي في شنو كمان !؟ مالك خامه شنطتك و جايه بيها من صباح الرحمن ؟؟....أبوي قعد يعاين لي بس و منتظرني اتكلم ، رشا قالت لي يعني متناقشه مع ناصر؟؟
قلت ليهم لا ، مش بكرا ماشين تعارف لأهل البت الحيعرسها إيهاب !؟يلا أنا ماشه معاكم ، أمـي قالت لي بشنطتك دي و من الصباح؟؟ قلت ليها ما عرفت اختار لبس معين و كنت زهجانه فـ خميتهم كلهم و جبتهم عشان رشا تساعدني في الإختيار ، زيدان قال لي حالياً الساعه 6 صباحاً انتِ مستوعبه الحاجه دي !!، قلت ليهم خلااااص رايكم شنو ، تعملوا لافته في الباب و تكتبوا عليها زمن الزياره المفروض الناس تجيكم فيهو !! يعني المشكله وين لو جيتكم الساعه 6 أو 5 ؟؟.... طبعاً قعدوا يعاينوا لي بـ ريب ، قلت ليهم لو ما مصدقين اتصلوا على ناصر و اسألوهو ، قلت ليهم حأدخل أرتاح شويه ، طلعت و خليتهم محتارين بس الأكيد انهم ما اقتنعوا بكلامي و صعب يقتنعوا لأني جاياهم من الصباح و بـ مبرر غير مقنع خالص !! ، قلت في نفسي أنا ما حأقول ليهم و ناصر لو بقدر خلي يقول ليهم هو لمن يتصلوا و يسألوهو ، أشوفو حـ يكذب ولا حـ يقول ليهم الحقيقه ، طبعاً رشا جات لاحقاني ، دخلت و قفلت الباب ، قالت لي دا بسبب الشومه ديك ؟؟...ما كنتِ تخلي ليها البيت يا مها ، قلت ليها مستحيل اقعد معاها في بيت واحد و حكيت ليها الحصل كلو ، قلت ليها أنا ما هينه ولا لينه عشان يحقر بي و يجيبها لي في البيت ، لو اليوم سكت و خليتو يقعد توته بكرا حـ يجيب لي لولو و جوجو ، قالت لي طيب حتقولي لناس أمي ؟؟
قلت ليها خليهو هو يقول ليهم عشان يحس بالإحراج و يعرف الغلط العملو ....و أنا بتكلم معاها كدا تلفوني رن ، زي ما اتوقعت ، ناصر ، رشا قالت لي ردي عليهو ، قلت ليها ما ناقصه وجع راس و العندي قلتو ليهو و أساساً أنا مليت من الكلام المكرر حقو دا ، بقى يتصل كتييير بس ما رديت عليهو ، خلاني و إتصل على رشا ، قالت لي أرد ولا لا ؟؟ قلت ليها على كيفك بس إيـاك تديني ليهو ، المهم ردت عليهو ، قالت ليهو أيوه جات قبل شويه ....لمن عاينت لي عرفت انو طلب منها تديني التلفون ، قالت ليهو طيب ثواني و طوالي مدت لي التلفون و قالت لي بصوت واطي ما عرفت اعمل شنو ، مسكت التلفون و قفلت الخط و حظرتو في تلفونها و تلفوني ، قالت لي واااي حرام عليك يا مها !! قلت ليها خليك ساكته ، شويه كدا أمي جات داخله ، قفلت الباب و جات قعدت جنبي ، ضيقت لي عيونها و قالت لي في شنو ؟؟
قلت ليها ولا شي ، انتوا ما اتصلتوا على ناصر ولا شنو ؟!
قالت لي يااا بت هوي نحنا ما هُبل عشان نصدقك الكلام الخارم بارم القلتيهو قبل شويه ، متشاكله مع راجلك ولا شنو ؟؟
طبعاً ما كان في مفر و ماف طريقه عشان اتخارج من أمي ، بعد مسافه قلت ليها ايوه ، قالت لي خير مالكم ؟؟ قلت ليها نقاش عادي ، قالت لي وقت عارفاهو عادي ليه شايله حاجاتك و جايه من صباح الرحمن ؟؟
قلت ليها جيتي دي متضايقاكم يا أمـي ، والله لو كنت عارفاكم حـ تنزعجوا للدرجه دي كنت قعدت في الشارع و ما جيتكم ، قالت لي حركاتك أنا بعرفها كويس عشان كدا عارفه انك بتكبري المواضيع و أكيد جيتي هنا من دون عِلم ناصر ، قعدت تجوط و تقول لي أصلك لو ما خربتي بيتك ما بترتاحي ، أنا أول مره أشوف لي وحده بتحسد نفسها للدرجه دي ! يعني عايزا بأي طريقه تطلعي راجلك غلطان عشان يطلقك و ترجعي هنا و تعيشي زي ما عايزا مش ! طبعاً هي لمن بدت تجوط فيني أبوي و زيدان جوا داخلين و سمعوا كلامها القالتو ، أبوي قال ليها عليك الله ما تجوطي فينا و انتِ قولي لينا في شنو ؟؟
شلت شنطتي و قلت ليهم ماف حاجه و آسفه على الإزعاج أول ما جيت أطلع من الغرفه زيدان جراني من يدي و قال لي ماشه وين ؟؟
قلت ليهو ماشه أقعد في الشارع ، على الأقل ماف زول حـ يحقق معاي أو يحسسني إني مضايقاهو ، قال لي نحنا بس عايزين نفهم منك الحاصل شنو !! يعني كونك تجي بشنطتك دي و من صباح الرحمن معناها في حاجه !! فأحكي لينا عشان نعرف الحاصل شنو !!
أمي قالت ليهو متشاكله مع راجلها و أكيد هي الغلطانه ، بعرفها كويس أنا كما عملت مشاكل و قومه و قعده ما بترتاح..... طبعاً كلامها زعلني شديد و حلفت ما اتكلم و ابرر ليهم ، رشا لمن شافت أمي كترت الكلام معاي ، قالت ليهم مها ما غلطانه و أي وحده مكانها كانت حـ تعمل كدا ، أمي قالت ليها أوعك تدافعي عنها ، قالت ليها بدافع عنها لأني عارفه الحصل ، ناصر جاب صحبتو و قعدها ليها في البيت للسبب دا هي اتناقشت معاهو و خلت ليهو البيت و ليها حق طبعاً ، منو بتقبل إنو يجيبو ليها وحده غريبه صفتها انها صديقه لراجلها و يقعدوها ليها في البيت !! يعني الواحده ضرتها المعرسه راجلها و ليها حق عليهو ما بتقبل بيها فـ ما بالكم لمن يجيب صحبتو !!
طبعاً كلهم إتلفتوا علي !
أمي قالت لي صحي ؟؟...ما رديت عليها ، عيوني إتملت دموع ، زيدان قال لي دي منو و جابها لشنو يعني ؟؟
رشا قالت ليهو البت عامله حادث و هو جابها بيتو ، أمي قالت ليها دا ما عذر ليهو !! كيف يعني يمشي يجيب ليهو بت من وين ما معروف و يقعدها في بيتو ! زريبه هي ؟! و بعدين البت دي ما عندها أهل ! ما بتخجل تجي و تقعد في بيت راجل و متزوج كمان !!
أبوي قال لي حأتصل عليهو و أفهم منو الحاصل ، المهم طلع تلفونو و اتصل عليهو ، بعد سلم عليهو و سألو عن حالو و كدا ، قال ليهو تمام منتظرك....قفل و قال لينا قال حـ يجي علينا خلال اليوم دا ، ساعتها حـ نشوف الحاصل شنو ، أمي قالت ليهو طول ما البت ديك قاعده هناك بتي ما حترجع ليهو ، زيدان قال لي هو طردك من البيت ولا شاكلك ؟؟ بعد مسافه قلت ليهو لا ، أمي قالت ليهو يعني تنتظرو لمن يطردها !!...أبوي قال ليهم خلاص ما تجوطوا فينا ، الزول دا قال ليكم جاي معناها جاي و تاني ماف داعي للجوطه دي كلها....
بعد أهلي طلعوا من الغرفه بقيت حايمه فيها يمين ، شمال و بفكر الحيحصل شنو !...قلت يمكن ناصر جاي يطلقني !!
رشا لمن جاتني تاني قالت لي قالوا ليك تعالي أشربي الشاي ، قلت ليها طيب ، المهم نزلت تحت و قعدت أشرب معاهم الشاي ، طبعاً ماف زول تاني فتح معاي الموضوع ، طبعاً ناصر ما جانا إلا الساعه وحده ، أبوي و زيدان إستقبلوهو بحفاوه و قعدوا معاهو في الصالون ، بعد ما ضيفوهو أبوي فتح معاهو الموضوع و ناصر طوالي حكى ليهو ، أمي قالت ليهو أنا بتي دائماً لمن تجينا أو أحس انها متشاكله معاك طوالي بشاكلها و بطلعها غلطانه حتى قبل ما اعرف السبب و اليوم برضو لمن جات شاكلتها قدرتي لأني عارفاها كويس بتاعة حركات و متهوره و بتزعل بسرعه لكن المره دي و من دون كذب انت الغلطان والله و غلطك كبير ، قال ليها معاك حق يا عمتي ، رشا قالت ليهو معليش يا ناصر بس مها ما حترجع معاك طول ما البت ديك قاعده في بيتك ، قال ليهم حالياً هي ما في البيت ، أمي قالت ليهو والله.....أبوي رفع ليها يدو عشان تسكت ، قال ليهم ماف داعي للكلام الكتير ، الولد جا و حكى لينا الحاصل و البت مشت من بيتو و الموضوع إنتهى و ما اظن إنو ناصر يعمل حاجه زي دي تاني و أكيد هو لو ما انجبر ما كان جابها بيتو و هو زول ما صغير عشان نقعد نحقق معاهو في كل تصرف ، زيدان قال الموضوع ما خطير و أصلاً اتحلى و هسي مها لو عايزا ترجع معاهو ماف مشكله.... طبعاً كلهم قعدوا يعاينوا لي و أنا ساكته ساي ، بعد مسافه قلت ليهم أنا قاعده لأنو بكرا ماشه معاكم لأهل البت العايزها إيهاب ....أبوي قال لـ ناصر عندك مانع ؟؟
قال ليهو لا ...المهم أنا قمت و مشيت منهم و رشا جات لاحقاني و ديلك حلفوا عليهو ما يمشي إلا يشرب معاهم الجبنه ، المهم بعد مسافه لبست لي عبايه و قلت لـ رشا أرح معاي اشتري إندومي و بارد ، قالت لي برا الشمس سخنه ما ماشه ، قلت ليها عليك الله ياخ بشتري ليك معاي ، قالت لي برضو ما ماشه ، قلت ليها كويس أصبري لي ، المهم في الآخر طلعت براي و ديلك كانوا نايمين في الصالون بعد ما شربوا الجبنه ، ما عارفه ناصر مشى ولا لسه قاعد ، المهم طلعت مشيت جبت إندومي و بارد ، الشمس كانت سخنه شديد ، بقيت ماشه بإستعجال عشان أصل ، أول ما قربت من البيت كدا فجأه رفعت راسي و شفت .....غسان طالع من بيتهم !!💔
هو ذاتو اتفاجأ لمن شافني ! حسيت رجليني اتصبوا في مكانهم ! ما كنت قادره اتحرك من مكاني ! في كسر من الثانيه اتذكرت كل ذكرياتنا سوا من الطفوله !...بقى ماشي علي و هو بعاين لي بنظرات إندهاش ، كأنو ما مصدق إنو دي أنا ، لمن وصلني و وقف قدامي أنا دموعي غصب عني نزلت !...قال لي مها ؟؟!؛
كيفك ؟؟
ما رديت عليهو ، كان لسه بفحص فيني بعيونو و هو مستغرب ، تقريباً غبنا عن بعض حكاية 3 سنوات ، قال لي أخبارك شنو ؟؟
ما رديت عليهو ، قال لي سمعت إنك عرستي !!....برضو ما اتكلمت معاهو ، لمن رفعت راسي و عاينت وراهو شفت ناصر واقف جنب بابنا و بعاين لينا ، غسان ذاتو إتلفت و شافو ، قال لي دا راجلك ؟؟ .....إتحركت من جنبو و أنا بمسح في دموعي و بلوم في نفسي لأني بكيت قدامو ، أكيد هسي بكون قال إني حتى و بعد ما عرست ما نسيتو ، لمن وصلت ناصر ما عاينت ليهو ، هو طوالي زح لي من جنب الباب عن سكات ، دخلت جوه و ما عاينت وراي ......
من ناحيه تانيه ناصر كان لسه واقف و بعاين لـ غسان ، قام غسان رجع و سلم عليهو و قال ليهو أنا غسان جارهم ساكن في البيت داك ، ناصر سلم عليهو بس ما اتكلم معاهو و غسان طوالي مشى لمن حس إنو ناصر ما مُرحب بيهو ، في نفس اللحظه دي فهم ناصر إنو دا غسان الكانت قاصداهو رشا لمن قالت لـ مها إنو غسان جا من السفر و كيف إنو مها اليوم داك لمن رشا جابت سيرتو إتضايقت و رفضت تاكل و اتذكر إنو قبل كدا سمع رتاج و مها بتكلمو عنو لمن جا عشان يقول لـ مها إنو خالتها سارا جات ، هو مع انو زعل بس ما حقق مع مها و اتجاهل الموضوع لأنو عارف لو سألها حتقول ليهو ماف حاجه ، بس هسي فهم الحاصل بعد ما شافهم سوا و دموعها كانت أكبر دليل بالنسبه ليهو .....
دخلت و أنا خاته يدي على قلبي ، مزاجي إتعكر و اتضايقت حد الضيق ، حتى الإندومي مسخت لي بس مع ذلك عملتها و دخلت بيها جوه و قفلت الباب علي ، قلت ناصر حيكون قال شنو لمن شافني واقفه مع غسان !؟ يا ربي غار علي ولا الموضوع بالنسبه ليهو عادي !!
فتحت الشبكه و دخلت الواتس ، قلت يمكن مرسل لي بس ما لقيت منو ولا شي ، لا مكالمه لا رساله ، قلت عنو ، أصلاً ما فارق معاي ، بقيت لافه في الميديا ، من انستا لـ يوتيوب لـ تيك توك لحد ما آخر شي دخلت الفيس ، لقيت ناصر منزل بوست قبل دقيقه كاتب فيهو :
بعد تجارب كتيره و تفكير مكثف أخدت قرار إني ما حـ اعمل أي حاجه عشان زول حتى لو كنت بحبو و ميت على الأرض البمشي فيها ، قررت إني ما اتعب نفسي و ما أبذل أي جهد في سبيل إني أراضي و أطبطب حتى و أنا زعلان ، ما حـ اتعب نفسي مع زول ما مقدرني و مهما عملت و قدمت ليهو حـ يشوف إني ما عملت شي ، بما إني على كل الأحوال لو ضحيت أو لا مصنف على إني ولا شي و ما قدمت شي و الشخص دا ما خاتي لي إعتبار فالأحسن أربع يديني و ما اعمل شي 💔
حسيت إنو بتكلم عني و من كلامو دا واضح إنو زعلان شديد ، إتصلت على رتاج و بعد سألتها بقت كيف و كدا قلت ليها جايه أشكي ليك ، قالت لي أحكي في شنو ؟؟
طوالي وريتها الحصل كلو من طق طق للسلام عليكم ، قالت لي هنا بالجد ناصر غلط بس والله ما حبيت إنو الموضوع وصل لأهلك ما عارفه بس الحاجه دي حتكون ضايقت ناصر لأنو جا و اضطر يبرر لأهلك الحاصل في بيتكم ، قلت ليها يعني كنتِ عايزاني أقعد معاها في بيت واحد و أنا عارفه هي عايزا تصل لشنو ؟؟...يااااخ هو لو كان معرسها عديل ما كنت حأقبل اقعد معاها في مكان واحد فما بالك يجيبها لي بحجة إنها صحبتو !! متخيله انتِ !!؟
قالت لي ما عارفه أنا ذاتي تهت معاكم ، المهم يعني ناصر ما سألك لمن شافك واقفه مع غسان و بتبكي !؟؟ قلت ليها ما سألني بس حسيتو قاصدني في آخر بوست نزلو ، قالت لي ايوه شفت البوست قبل شويه ، احترت و قلت ناصر دا مالو ، المهم يا مها لو عايزا نصيحتي قبل ما الوضع يسوء إتصلي عليهو و فهميهو عشان ما يفهمك غلط ، قلت ليها افهمو شنو يا رتاج و هو ما سألني دا منو !! مستحيل والله أرسل ليهو ساي كدا و اقول ليهو غسان دا ولد جيرانا ، اهااا و بعدها ؟؟
قالت لي ما عارفه شوفي الصح و أعمليهو....
المهم بعد قفلت منها بقيت أفكر ارسل ليهو ولا لا ، في الآخر قررت ما أرسل ليهو ، لو فهمني غلط أو الموضوع بهمو كان سألني بس بما إنو ما سأل معناها ما مدي الموضوع أهميه ، طبعاً اتذكرت إني حاظراهو فـ طوالي فكيت الحظر.....المهم في اليوم البعدو مشينا مع خالي للتعارف ، أمي بعد تحانيس خلت رشا تمشي و أصلاً رشا من أنا قلت ماشه دقت جرس و قالت لأمي ليه هي تمشي و أنا تقعدوني في البيت ، ..أهل البت كانوا ساكنين في بحري ، المهم إستقبلونا بحفاوه و إيهاب عرفهم بينا كلنا نفر نفر و هم كمان عرفونا بنفسهم و ورونا هم من وين و كدا ، طبعاً البت في الحقيقه طلعت أحلى من الصور ، لمن أهلنا الكبار اتفقوا مع بعض فجأه كدا قلبوا التعارف خطوبه ، قالوا خير البر عاجله ، المهم اليوم دا كلو بطولو و عرضو و لحد ما نحنا رجعنا البيت لا ناصر إتصل علي لا أنا اتصلت عليهو ، خالي قال لي مالو ما جا قلت ليهو مشغول ، المهم أنا جد جد زعلت و قلت إنو ناصر متضايق مني لأنو بسببي اضطر يطلع توته من البيت و يشوف ليها مكان تاني تقعد فيهو ، عشان كدا ما رجعت بيتي في اليوم التالت ، مشيت شغلي و جيت متأخره قاصده ، عشان كدا قلت ليهم أنا تعبانه حأرجع بيتي بكرا ، أبوي قال لي غير مشكلة البت ديك في حاجه تانيه ؟؟ قلت ليهو لا ، أمي قالت ليهو مفروض يجي هو و يرجعها معاهو !!..... طبعاً ناصر كان مرسل لي من الصباح رساله محتواها : اليوم راجعه ولا لا ؟ عشان لو جايه أجي اسوقك.... طبعاً واضح إنو قال كدا عشان أهلي ما يقولوا ليه ما جا ساقني بس لسه حاسه إنو زعلان من الحصل ، قلت ليهو لا ما راجعه ، رد علي بـ 👍 و بس ، طبعاً دا كان قبيل الصباح لمن كنت في الشغل ، ...قلت لأهلي هو كان جاي بس انا قلت ليهو تعالني بكرا ، أمي ضيقت لي عيونها و قالت لي سمح بكرا قريب....
طبعاً بقيت أفكر بكرا حأتحجج ليهم بشنو ، المهم بكرا لمن جا مشيت الشغل و قلت ليهم لمن أرجع ناصر حـ يجي يسوقني ، المهم و أنا في الإستديو و قبل ما نبدا تصوير كنت بدردش مع ورده ، قالت لي حلقتكم انتِ و ناصر كانت فظيييعه نزلوها أمبارح في اليوتيوب ، طبعاً أنا يارا أدتني خبر لمن الحلقه نزلت و كان مفروض انزل رابط الحلقه في حساباتي عشان الناس تتابعها و يزيد عدد متابعين القناة تبع ناس برنامج دردشات ، قلت ليها حأحضرها بعدين ، قالت لي انتوا ثنائي رهيب والله مع انكم زمان كنتوا ما بتطيقوا بعض بس حلوين والله 😂😭😂...ضحكت بس ، قالت لي بالمناسبه انتِ ليه ما ماشه مع ناصر ؟؟
قلت ليها وين ؟؟؟
قالت لي كيف يعني وين ؟؟ أمي و أبوي و ناصر بكرا ماشين العمره! انتِ ما عارفه ولا شنو ؟؟
قلت ليها ما مشكله بمشي المره الجايه ، قالت لي مها في شنو ؟؟ متناقشه مع ناصر !؟...قلت ليها حتى ولو كان مفروض يكلمني ، كتر خيرك والله ..... طبعاً زعلت شديد ، قالت لي هسي حأتصل و اتكلم معاهو ، قلت ليها لا ماف داعي ، ...حأقفل الشبكه بعد دا عندي شغل....قفلت الشبكه و أنا دموعي كانت في طرف عيوني بس ما بكيت ، صورت نفسي صوره حلوه كدا و ختيتها في الإستوري و كتبت عليها : متأكده حتكون أجمل حلقه لأنو ضيفة الحلقه مميزه شديد 💜
من ناحيه تانيه :
توته إتصلت على ناصر ، قالت ليهو في حاجه أنا لازم اقولها ليك ، قال ليها قولي في شنو ؟؟ قالت ليهو أنا من يوم عرفت حاسه بالذنب والله لأني ما اتكلمت ، انت عارفني كويس ما بقدر اشوف حاجه بتأذيك و أسكت ، ما بتحمل اعرف حاجه بتضرك و أعمل نفسي عميانه ....قال ليها توته ما تحرقي دمي قولي في شنو !؟
قالت ليهو أنا لمن كنت في بيتكم ....قال ليها قولي ياخ في شنو ؟؟
في اللحظه ديك ناصر كان في مكتبو و أبوهو جاهو داخل قال ليهو تعال عايزك ضروري ، توته لمن سمعت صوت أبوهو قالت ليهو خلاص أمشي هسي ، بحكي ليك بعدين ، قال ليها تمام و قام طلع مع أبوهو....
يتبع.....
