المهم عملنا لقاء مع أسرة عماد ، أمو حالتها تقطع القلب والله ، بس الكويس إنهم أكدوا لينا إنو ما حـ يخلوا حق ولدهم ، أبوهو قال لو القانون ما جا ليهو حق ولدو هو حـ يجيبوا ليهو ، طبعاً هم ما عرفوا إنو مؤتمن طلع من السجن إلا أمبارح ، في واحد قريبهم في الخرطوم لما سمع الخبر إتصل و كلمهم ، المهم بعدها قلت لـ لؤي بما اننا جينا لـ وحده من الولايات فالأفضل رايك شنو نصور و نزور المناطق الممكن تكون سياحيه فيها ؟ متذكر فكرة البرنامج القلتها ليك !؟ قال لي ايوه متذكر ، قلت ليهو دي حـتكون أول حلقه حـ تتصور ، لارا قالت لينا يعني ما حـ نرجع الخرطوم ؟؟
قلت ليها انتِ عايزا ترجعي ؟؟
قالت لي بحماس لاااا ، يا سلاااام حـ نلف و نحوم هنا ؟ ضحكت و قلت ليها ايوه .... أهل عماد أصروا إنو نقعد معاهم كم يوم و ما نمشي طوالي ، قالوا لينا البلد سمحه اقعدوا فيها كم يوم كدا شمو هوا نضيف أحسن ليكم من جوا الخرطوم ، قلنا ليهم أصلاً نحنا ما راجعين طوالي و حكينا ليهم عن برنامجنا ، عمدة القريه حقتهم قال لينا شكراً ليكم والله و نحنا معاكم قولوا لينا بس عايزين تعرفوا شنو و تمشوا وين ؟...قلت ليهو اول حاجه عايزين نعرف العادات و التقاليد في النيل الأزرق و عدد القبائل الفيهو و اسمائها و مدى الترابط بيناتهم و كمان عايزين نعرف عن الحياة في النيل الأزرق ، قال لينا يا سلاااام جيتوا المكان الصح ، لؤي قال ليهو قبل ما تبدا تتكلم لينا خليني بس أجهز الكاميرا و باقي الأجهزة ، قال ليهو خير ، طلعنا من بيوت و مشينا قعدنا تحت شجره كبيييره وارفة الظل في نص القريه ، كنا قاعدين في سراير قالوا لينا دي اسمها عناقريب ، انا و لارا كنا قاعدين في سرير أو عنقريب و العمده قاعد في المقاصدنا و الباقين واقفين ورا الكاميرا و الشفع جزو راكب فوق الشجره و جزو واقفين حولينا و النسوان بتاوقن من جوه البيوت ، المهم بدينا تصوير و هو بدا يحكي لينا عن إقليم النيل لأزرق و عن عاداتهم و تقاليدهم بمختلف قبايلهم ، لمن جينا لفقرة التراث ، جات وحده من نسوانهم شايله صينيه فيها حاجات كدا ، أول حاجه شالتها قالت لينا دي إسمها نقاره ، و البعدها قالت بخسه بعملوا فيها اللبن ، المهم بقت تشيل حاجه و تقول لينا اسمها و طريقة إستخدامها ، المهم لمن خلصنا تصوير الساعه كانت 5 ، قالوا لينا ما بتمشوا بعد دا لأنو الطريق طويل و الضلام خلاص حـ يدخل ، المهم إستسلمنا و قعدنا معاهم ، طبعاً ما قصروا مننا ، صينيه داخله و صينيه طالعه ، لؤي كان مع الرجال و أنا و لارا مع النسوان ، قبل ما أنوم طلعت تلفوني و فتحت الشبكه برضو كانت كعبه شديد ، شلت التلفون و بقيت حايمه بيهو ، في حته معينه لمن اتجه عليها بتلقطع لي شبكه ، مشيت على الجهه ديك و الشبكه شبه ظهرت ، بعد مسافه نزلت رسايل في الواتس ، من سارا و ناس البيت و ورده و أسامه و باقي رسايل القروبات ، طبعاً كان في رسايل من ناصر !!
استعجلت و دخلت الدردشه ....ياداب اتذكرت إني ما حذفت الرساله الرسلتها ليهو ، كان رادي على رسالتي بـ : أنا كمان مشتاق ليك شديد و بإذن الله بكرا أو بعدو حنكون في السودان و لمن نتلاقى في بيتنا حـ نحل كل مشاكلنا برانا 💜+ما قلتي لي ماشه النيل الأزرق ليه ؟؟
