بعد شويه حبوبه جاتني و هي بتتكلم بالتلفون ، قالت : والله حيرتني البت العويره دي ! اي ياها هاك ليها ، مدت لي التلفون قالت لي دي أمك ، لمن مسكت منها التلفون و قلت ليها أمـي ، قالت لي مهاوي ، بسم الله يا بتي مالك !! خبر سمح زي دا تزعلي و تبكي ليهو قدر دا ؟؟ مالو الحمل ! جايباهو بالحرام لما تتعابطي كدا و تبكي !؟؟
قلت ليها ما عارفه بس ما عايزا يا أمي ، قالت لي يا بت هووووي بطلي أمورك دي !! ...ما عرفت اقول شنو تاني ، مسحت دموعي و بقيت ساكته و هي بتنصحني و بتتكلم معاي و تقول لي إنو شعور حلو و ماف أعظم من إحساس الأمومه و شنو ما بعرف ، لمن خلصت قالت لي أديني أمي ، مديت التلفون لـ حبوبه شالتو و طلعت ، قعدت في غرفتي مسافه لحد ما جات سارا و قالت لي يلا الفطور ،، طلعت و قعدت آكل معاهم و أنا ساكته و حبوبه تعاين لي ساي ، شكلها سارا موصياها تخليني على راحتي و ما تتناقش معاي ، المهم أكلنا بكل هدوء ، بعد ساعه كدا أمي من شغلها جات بيت حبوبه ، ضمتني عليها شديد و قالت لي أخيراً حأبقى حبوبه ، سارا مشت جابت ليها مويه و قالت ليها عاد بتك من عرفت الخبر وشها جاب ألوان و من قبيل حالفه ما تتكلم مع زول ، حبوبه قالت ليها أنا البت دي حيرتني !! قدر ما حاولت أفهمها ما قدرت !!
أمي قالت لي مهاوي دي شنو الحركات البايخه دي !! قلت ليها ياخ أنا ما جاهزه !! حبوبه قالت لي يعني كنتِ متوقعه شنو ؟؟ في وحده معرسه بتتفاجأ بالحمل و تقول ما عايزاهو ؟؟ مالك ولدوك أمبارح ولا معرسه صغيره ؟؟
سارا قالت ليها أمي ! براحه عليها ، قالت ليها ما براحه ولا شي ، أساساً البت دي ماف شي خاربها غير الدلع ، تصرفاتها كلها غلط في غلط و عايزا الناس تتساير معاها ، جملة ما عايزا دي كان تقوليها لـ راجلك ما بعد ما يظهر الحمل ، اتزهجت و قلت ليها انتوا قبل الحمل مريحننا يعني ولا مخلننا في حالنا ؟؟
كل يوم زعطننا و ماعطننا بجملة ما بقيتوا تلاته ! لسه ماف حاجه كدا ولا كدا !!...كرهتوني ياخ ....أمي نهرتني و قالت لي بطلي قلة أدب ، اقسم بالله الضرب الما ضربتك ليهو لمن كنتِ صغيره أضربك ليهو هسي !! انتِ عويره ولا شنو ؟؟
سارا قالت ليهم أهدوا يا جماعه و حاولوا تتفهموها ، حبوبه قالت ليها نتفهمها يعني نخليها تجهض ؟؟
قالت ليهم لا تتفهموا هي ليه بتقول ما عايزا الحمل دا ، أنا من قبيل قاعده و بفكر و بحلل هي ليه ما قبلانه و في الآخر اتوصلت إنو السبب في دا إنو هي شايفه نفسها صغيره عشان كدا نافره من فكرة الحمل و الولاده ، ميمي دا إتدلعت شديد و لحد عمرها دا كلنا بندلع فيها و دا أداها إحساس انها لسه صغيره و ما تنسوا انو هي عمرها كلو ما اتحملت مسؤوليه ولا إنجبرت تتحمل حاجه فوق طاقتها أو تكون مجبوره عليها ، عاينت لـ حبوبه و قالت ليها متذكره أنفال بت إمتنان ؟؟ لمن عرسوا ليها عمرها كان 14 و لمن ولدت كانت نافره من ولدها و حلفت ما يتخت جنبها ، لأنو عقلها ما قادر يستوعب أنها طفله و جابت طفل فـ ميمي نفس الشي ، حبوبه قالت ليها هسي مها دي عمرها 14 ولا طفله ؟؟؟
