مريم :انت هتيجى امتى
رامى :يومين تلاتة كده
مريم :بس انا زهقت
رامى :اسيب شغلى واجى يعنى ميعرفوش يشتغلو يا ماما يحتاسو والشغل يقف
مريم :ولا انت محسسنى انك وزير البترول ليه كمان كان لازم يعنى تبقى مهندس بترول ما كنت بقيت مهندس كمبيوتر ولا مهندس اتصالات وفاتحنالك سايبر وكالنا من وراك الشهد
رامى وهو بيضحك :سايبر يعنى يطلع عينى خمس سنين فى هندسة علشان افتح سايبر هو ده اقصى طموحك يعنى
مريم :اهو على الاقل كنت هتفضل هنا وهشوفك كل ما اعوز
رامى :يعنى انتى عايزة تشوفينى
مريم :اه كلام الموبايلات ده مبياكلش معايا ميغننيش عن وجودك قدامى وكلامى معاك وش لوش وبعدين لو كنت مخطوبة كان زمانى مشغولة بيه وناسياك اساسا انما انا سينجل فموراييش غيرك بقى
رامى :يعنى انتى لما تتخطبى هتسقعيلى
مريم :اينعم
رامى :تصدقى يا مريم انك عديمة الدم وبتقوليهالى صريحة كده انك هتنفضيلى بعد ما تتخطبى
مريم :وانا اقدر برضه يا مورا ده انت الاصل انا بس اكيد هنشغل بيه واحل عن سماك بقى
رامى :ومين قالك انى عايزك تحلى عن سمايا هل انا قولتلك انى عايزك تحلى عن سمايا يا ستى متحليش عن سمايا خليكى منوراها
مريم :انت ابن ناس يا مورا والله بس عارف انا حاسة انى عايزة اتخطب اوى او ارتبط اى حاجة بس يبقى فى حد فى حياتى يعنى قلبى ناقح عليا اوى
رامى :يعنى ايه قلبك ناقح عليكى دى
مريم :عايزة اتحب يعنى عايزة حد يقعد يركز فى تفاصيلى واركز فى تفاصيله بقى وكأننا موراناش حاجة غير بعض
رامى :ومفيش حد فى اللى حواليكى ينفع
مريم :لا اللى حواليا ايه انا عايزة حد جديد حد مختلف اللى حواليا دول انا اعرفهم عايزة حد معرفوش وجه جديد كده يدخل حياتى يقلبهالى فوقانى تحتانى ويروشنى كده
رامى :ومينفعش حد تعرفيه يعمل كده
مريم :وليه حد اعرفه ما الدنيا واسعة ومليانة ناس يجيلى حد جديد بقى يعنى انت مثلا لما تيجى تحب هتحب واحدة عارفها ولا هتخطف عينك وقلبك واحدة جديدة عليك
رامى :والله يا مريم انا شايف ان old is gold
يعنى القديم ده انتى عارفاه عارفة مميزاته وعيوبه بينك وبينه ذكريات كتيرة متتنسيش
مريم :طيب ما هو لو دخل حياتى شخص جديد هعرف مميزاته وعيوبه وهبنى معاه الذكريات اللى متتنسيش
رامى :فى كام سنة هتعملى كده هياخد وقت على ما ده يحصل هتقضى وقت طويل بتعرفيه عليكى بتعرفيه حاجات زى كرهك لايس كريم الفانيليا مع انك عمرك ما كلتيه وانك عندك حساسية من الفراولة وانك مبتحبيش السمك وانك بتشوفى اللون البمبى لون مستفز وبارد تفاصيل هتتعبى وانتى بتعرفيهاله وتفاصيل يمكن تنسى تعرفيهاله وعلى ما يعرفها لوحده يمكن يكون حصل بينكم مشاكل كتير
مريم :المشاكل دى طبيعى تحصل فى اى علاقة حتى لو عارفين بعض من سنين السنين ولو على حكاية انى هتعب على ما اعرفه عليا دى عادى اعرفه عليا ويعرفنى عليه ولو فضلنا سنين نعرف بعض ايه المشكلة
رامى :وعلى ايه الفرهدة دى ما تاخدى حد عارفك وعارفاه احسن
مريم :اه على كده انت هتخطب واحدة فى قرايبك
رامى :لا
مريم :ليه مش عارفهم وعارفينك
رامى :لا الفكرة مش فكرة عارفهم وعارفنى الفكرة ان مفيش واحدة فيهم شغلت قلبى مفيش واحدة فيهم خلتنى اقول لنفسى بس لقيتها هى دى
مريم :ايوه تخيل تعيش وتموت من غير ما تقابل حد يخطف قلبك منك محبطة الفكرة انا حسيت باحباط وانا بتكلم
رامى :ما يمكن قابلتيه وانتى مش عارفة
مريم :اكيد لو قابلته هعرف
رامى :تعرفى ازاى وانتى مغمضة عينك وسدا ودانك ومستنياه يجيلك بصورة معينة مش متقبلة انه ممكن يجيلك بصورة مختلفة عنها
مريم :حتى لو سديت ودانى وغمضت عينيا هعرف لانه لو الشخص الصح هيخطف قلبى رغم كل ده
رامى :وانتى قلبك متخطفش لسه يا مريم
مريم :لا يا مورا متخطفش وبين ضلوعى لسه
