ليلى :عادى يعنى اجرمت فى ايه انا علشان يسيبنى انا من حقى اتمنى احسن حاجة لنفسى وميكنش فى حد احسن منى هو عايز واحدة تكون تحت رجليه ملهاش احلام ملهاش طموح عايز خدامة
هدى :لا يا ليلى هو عايز شريكة ليه فى حياته شريكة تكون معاه على الحلوة والمرة مش تكون معاه فى الحلوة بس عايز واحدة تعيش معاه على قد امكانياته واحدة متحسسوش انه مش مكفيها وانها ناقصها حاجات كتير معاه
هو اكيد مش محتاج واحدة مادية كل همها فلوسه وبس
ليلى :انا مش وحشة اوى كده يا هدى انا مكنش قصدى يحس كده كمان انا اتغيرت
هدى :انا عارفة انك مش وحشة يا ليلى بس معاه انتى كنتى وحشة انتى متغيرتيش غير لما هو سابك مفهمتيش انتى غلطتى قد ايه غير لما هو مبقاش قادر يتحمل
هو عمل الصح لو كان كمل معاكى مكنش هيبقى من حقه يلومك لما تيجى بعد الجواز ومتقدريش ظروفه هو خاف على نفسه
ليلى :خاف على نفسه منى
هدى :خاف على نفسه من انانيتك
ليلى :انا مش انانية ومغلطتش
هدى :لا يا ليلى انتى انانية وغلطتى لو مغلطتيش لو مكنتيش انانية فى تصرفاتك معاه مكنش فسخ الخطوبة خليكى حقانية واعترفى بغلطك علشان تقدرى تصلحيه ومتكرريهوش تانى انما هتدفنى راسك فى الرمل زى النعام وتقولى مغلطتش يبقى هتعيشى وتموتى وانتى بتكررى نفس الغلط
ليلى :متقسيش عليا يا هدى مش كفاية هو قسى عليا وراح خطب بعدى
هدى :انا مبقساش عليكى يا ليلى انا بكلمك لمصلحتك انا لو مش بحبك كنت هسيبك تنكرى الحقيقة انما انا علشان بحبك وخايفة عليكى بواجهك بالحقيقة وبنصحك
مش مهم انه راح خطب ربنا يسعده ويسعدك ويرزقك باللى تكونى مبسوطة ومرتاحة معاه ومتكرريش معاه نفس الغلط
ليلى :انا كان نفسى يرجعلى انا والله اتغيرت
هدى :صعب يرجعلك يا ليلى بعد اللى عملتيه كمان حتى لو رجع كان هيفضل فاكرلك اللى عملتيه قبل كده كنتى هتحسى انه واقفلك على غلطة وحاطك تحت الميكروسكوب
كده احسن تبقى فى علاقة جديدة مع انسان جديد بعد ما عرفتى غلطك واتعلمتى منه..استنى برميل النكد بترن هعمل مكالمة جماعية ..ايوه يا منى
منى وهى بتعيط :انا اترفضت
ليلى :ايه
منى :العريس اللى كان متقدم رفضنى قال صلى استخارة ومش مرتاح
انا معجبتوش اكيد عنده حق انا شكلى مش حلو وشخصيتى مش مبهرة لا شكل ولا شخصية يقبلنى ليه
ليلى :تصدقى بالله انتى برميل نكد فعلا كل المناحة دى علشان المحروس رفضك ما فى داهية
هدى :اهدى يا منى هو علشان رفضك تبقى وحشة
منى :ايوه طبعا اومال رفضنى ليه
هدى :يمكن هو مش خير ليكى او انتى مش خير ليه
منى :ايوه انا مش خير ليه انا مش ممكن اكون خير لاى حد اصلا
ليلى :لا انا مش حمل النكد ده
هدى :يا منى يا حبيبتى بقولك يمكن هو اللى مش خير ليكى ويمكن انتى هو انتى لازم تاخدى الجزء الوحش بس من كلامى وتنكدى بيه على روحك وتجلدى بيه نفسك يا بنتى عادى ايه يعنى رفضك ما انا قبل حمزة فى اربعة رفضونى اللى علشان عايزة اشتغل واللى علشان مسافر وانا مش عايزة اتجوز واحد مسافر واللى كان عايز ملكة جمال لبنان واللى كان عايز واحدة خارصة ملهاش شخصية وفى بتاع خمسة ستة انا اللى رفضتهم تفتكرى علشان حد رفضنى يبقى انا وحشة او حد انا رفضته يبقى وحش عادى احنا الاتنين كويسين بس ملناش نصيب فى بعض
هو انتى كل ما عريس يرفضك تقلبيها مناحة بس لما انتى اللى ترفضيهم يبقى عادى وحقك ما هو حقهم برضه
وانتى لما تتجوزى هيبقى نصيبك فى واحد هو عايزك وانتى عايزاه
ليلى :ايوه انشفى كده على نفسك ومش كل مرة تعيطلنا
هدى :منى يا حبيبتى انتى احلى واحدة فينا
ليلى :مين دى اللى احلى واحدة فينا اومال انا ايه
هدى وهى بتضحك :ربنا رزقنى باتنين هيشلونى واحدة شايفة نفسها ملكة جمال العالم وواحدة معندهاش بجنية وربع ثقة فى نفسها المهم يا منى انتى حلوة وجدعة وذكية وطيبة تمام ومش علشان عريس ولا اتنين رفضوكى تشكى فى نفسك وتفتكرى انك مش حلوة وانك مفكيش ميزة انتى حلوة وزى القمر وجمالك ومميزاتك هيشوفهم ويقدرهم صاحب النصيب ولحد ما يجى بكفاياكى جلد فى نفسك وتقليل منها علشان انا طهقت
منى :ايه ده بالراحة طيب احنا مصاحبينها ليه دى يا ليلى
ليلى وهى بتضحك :علشان بتحللنا مشاكلنا كمان مش عاجبك كلامها دى بتشكر فيكى اومال انا اعمل ايه دى كانت بتقطمنى بكلامها من شوية
هدى وهى بتضحك :انتو مبيطمرش فيكم حاجة على فكرة
كمان يا اخت ليلى انا قطمتك لانك كنتى عمالة تطبلى لروحك جامد عكس الاخت منى اللى بتقطم فى روحها
وانا عندى قاعدة مهمة بتقول لما انتو تخبطو فى نغسكم بكلامكم انا اطبطب عليكم بكلامى انما لما انتو تطبطبو على نفسكم بكلامكم يبقى انا اخبط فيكم بكلامى مينفعش احنا الاتنين نطبطب كده المشكلة عمرها ما هتتحل ولا ينفع احنا الاتنين نخبط كده هتكرهو نفسكم اساسا
وعلى فكرة انا نفسى اطبلك بس انتى مش سيبالى فرصة
منى وهى بتضحك :هى مش سايبة فرصة لاى حد الحقيقة
بس انا برضه مضايقة يرفضنى ليه انا بعيط بقالى ساعة بسببه
ليلى :تصدقى بالله ده ربنا نجده من كئابتك يا برميل النكد
عايزانى اخبط فى نفسى يا هدى وابقى زيها لا يا ستى انا كده على وضعى جامدة جمودية التنين ومفيش منى اتنين فى مصر
هدى وهى بتضحك :والله انتى اوفر فى ثقتك فى نفسك وهى اوفر فى قلة ثقتها فى نفسها واقفلو بقى انا اروح اكلم زوجى قرة عينى برقبتكم يا اوفر منك ليها
منى :اه كتبتى الكتاب بقى وهتذلينا
ليلى :احنا نتخطب انا وانتى مينفعش نفضل سينجل ونسيبها تتنمر علينا كده
هدى وهى بتضحك :ايوه انا هتنمر عليكم يا سينجل يا بائسة يا وحيدة منك ليها هقفل انا وكملو انتو كلام ما انتو سينجل زى بعض بقى
ليلى :اه يا شريرة
منى :تصدقى انك صاحبة مش جدعة
هدى وهى بتضحك :سلام يا سناجل
حمزة :رنيت عليكى كنتى وايتينج وطبعا مش محتاج اخمن انك كنتى بتكلمى صحابك
هدى :بس قلبتهم بسرعة علشانك علشان تعرف انك غالى عليا
حمزة :عارفة اوقات بحس بغيرة منهم خصوصا لما افكر يا ترى لو خيرتك بينى وبينهم هتختارى مين فينا
هدى :وانت تخيرنى بينكم ليه الاختيار نفسه غلط يعنى هو انا ينفع اخيرك بينى وبين صحابك او بينى وبين اخواتك
مفيش مقارنة بينكم اصلا يا حمزة هما اصحاب عمرى وانت حب عمرى جوزى وابو ولادى مستقبلا انا مش محتاجة اختار بينكم
حمزة :وافرضى الظروف جبرتك تختارى انتقلت بشغلى لمحافظة تانية او حتى سافرت بره هتختارى مين
هدى :هختارك طبعا ومكان ما انت تكون انا هكون بس انا كده متخلتش عنهم انا كده ظروفى اتغيرت ودى حاجة مش بايدى
حمزة :المهم انك وقتها هتختارينى
هدى وهى بتضحك :انت مبسوط
حمزة وهو بيضحك :الصراحة اه
هدى :يعنى مش كفاية انى اختارتك دونا عن رجالة الدنيا كلها لازم اختارك دونا عن بنات الدنيا كمان
حمزة :اه..هو ده مش طبيعى او دى انانية يعنى
هدى :لا هو كل واحد بيحب بطريقته وواضح ان دى طريقتك فانا تمام طالما مش هيجى عليك يوم وتقولى اقطع علاقتى بيهم
حمزة :لا مش للدرجة دى يعنى انا بس عايزك دايما تحسسينى ان مفيش حد فى الدنيا اهم منى
هدى :بس كده انت تؤمر يا غالى يا حبيبى يا ابو عيالى
حمزة وهو بيضحك :ايوه هو ده عايزك تطبليلى كتير
هدى :اطبل واغنى وارقص كمان هو انا عندى اغلى منك
حمزة :ماما قالتلى انك كلمتيها النهاردة بقالك فترة بتكلميها باستمرار حلوة الحركة دى منك
هدى :ده حقها عليا انا اساسا اتأخرت فى انى اعمل كده بس لما انت فرحت يعنى كنت عايزنى اعمل كده مقولتليش ليه
حمزة :خوفت لاكون بضغط عليكى او تضايقى
هدى :لا طبعا ده مش ضغط ومش هحس بضيق انا اكيد فيا عيوب واكيد برضه ممكن اقصر فى حاجات او اغلط من غير قصد وقتها انت تنبهنى لغلطى او لتقصيرى وعادى انك تقولى الحاجة دى هتبسطنى لو عملتيها وانا لو اقدر اعملها هعملها مفيش حد كامل يا حمزة بس احنا ممكن منشوفش عيوبنا ووقتها بنحتاج حد ينصحنا ويساعدنا نتغير للاحسن
اى حاجة اعملها وتضايقك نبهنى واى حاجة تبقى هتفرحك لو عملتهالك عرفنى
حمزة :ومش هتعتبرى ده تنظير عليكى وانى مش بحبك زى ما انتى
هدى :ما هى دى فى ايدك انت يا تنصحنى بطريقة كويسة افهم منها انك بتكلمنى لمصلحتى يا تكلمنى بطريقة وحشة احس منها انك بتقلل منى وبتنتقدنى لمجرد النقد وخلاص
حمزة :تمام فهمتك بس انتى برضه تقدرى انى ممكن اسلوبى يخونى شوية
هدى :هعمل كده بص طول ما احنا بنتكلم يبقى اى سوء فهم هنوضحه واى مشكلة هنعديها الدنيا هتخرب بنا لما نبطل نتكلم ونشيل جوانا من بعض وخلاص انما طول ما احنا بنتكلم فاحنا كده تمام
حمزة :ان شاء الله نفضل دايما تمام
هدى :ان شاء الله احكيلى عملت ايه النهاردة فى يومك
