فريد :يا استاذة...يا انسة...يا مدام...يا مدااااام
دينا وهى بتقف :حضرتك بتندهلى
فريد :اه السماعات...
دينا قاطعته :وليه بتقول يا مدام
ايه اللى اوحالك انى ممكن اكون مدام
ده شكل ده مدام هل ده شكل مدام قدامك
فريد :انا قولت قبلها يا استاذة ويا انسة وانتى مرديتيش
كمان انتى مكنتيش قدامى علشان اشوف انتى انسة ولا مدام
انتى ماشية قدامى فانا مش شايفك من اصله
دينا :حتى لو
متقوليش مدام لما ابقى مدام ابقى قولها
فريد :لا اله الا الله
الحق عليا انى كنت عايز اديكى السماعات بتاعتك وقعت من شنطتك
دينا وهى بتاخدها منه :شكرا علشان رجعتلى سماعاتى
بس مش شكرا على يا مدام اللى قولتها دى
مش مسامحاك لا
فريد وهو بيضحك :خلاص بسحبها يا انسة
تمام كده
دينا بابتسامة :تمام
بعد اذنك
فريد :معلش ممكن اسألك على حاجة
دينا بصوت واطى :لا بلاش شغل شقط
متصدمنيش فيك شكلك محترم
فريد :حضرتك بتقولى حاجة
دينا بصوت واطى :قال حضرتك يبقى محترم اكيد
فريد :انا مش سامعك على صوتك شوية معلش
ممكن اسألك على حاجة
دينا :اتفضل
فريد :هو فين بيت بلال عثمان
دينا :قصدك بلال ابن الحاج عثمان الوالى
فريد :اه
دينا :تفضل ماشى الشارع ده طوالى لحد ما تقابل صيدلية الشفاء العاجل
فريد وهو بيضحك :صيدلية ايه
دينا :الشفاء العاجل هى الصيدلية اسمها كده
صيدلية قديمة مفتوحة من يجى اربعين سنة بنفس الاسم ونفس اليافطة
واحتمال يكون فيها نفس الأدوية من اربعين سنة مجابوش غيرها
المهم يعنى الشارع الفرعى اللى جنب الصيدلية فيه بيت الحاج عثمان الوالى
اسأل اى حد فى الشارع على بيته هيشاورلك عليه
فريد :هما بيت كويس
محترمين يعنى
دينا :ايوه طبعا عيلة الوالى من اكبر العيلات هنا
والبلد كلها بتحبهم
عيلة مفيش منها فى الاحترام والاخلاق ومحدش عمره سمع عنهم اى حاجة وحشة
فريد :وشباب العيلة كويسين
دينا :كل عيلة فيها الحلو والوحش
بس زى ما قولتلك هما محدش عمره سمع عنهم حاجة وحشة ابدا
فريد :وبلال ابن الحاج عثمان
معروف عنه ايه فى البلد
دينا :ابن الحاج عثمان هيكون ايه ميتخيرش عن ابوه
راجل ومحترم وابن اصول
فريد :يعنى...
دينا قاطعته :يعنى انا لازم امشى وقفتنا طولت وكده ميصحش
بعد اذنك
فريد :اتفضلى
بعد اسبوعين
فريد :مبروك
دينا :الله يبارك فيك...انت اللى رجعتلى سماعاتى من اسبوعين صح
فريد :اه اللى اشتغلتيه ومقولتيلوش ان بلال يبقى ابن عمك
دينا :انت مسألتنيش انا اعرفه منين
غير انى قولتلك ان عيلة الوالى عيلة كبيرة فى البلد
اى حد هتوقفه تسأله كان هيبقى واحد من العيلة غالبا
خصوصا فى الشارع اللى كنت بتسألنى فيه ده
الجزء ده من البلد اغلب العيلة عايش فيه
انت عرفت منين انه ابن عمى
فريد :سألت واللى يسأل يعرف
دينا :هى مش كانت اللى يسأل ميتوهش باين
فريد :ما هو لما يسأل هيعرف ولما يعرف مش هيتوه
دينا :وجهة نظر تحترم
بعد اذنك
فريد :لحظة طيب انا دى تانى مرة اشوفك فيها ومعرفش اسمك لسه
دينا :واللى قالك انى بنت عم بلال مقالكش اسمى
فريد :لا كنت عايز اعرفه منك
دينا :دينا كمال الوالى
بنت عم العريس
فريد :وانا فريد مهاب اخو مروة العروسة
دينا :تشرفنا
علشان كده كنت بتسألنى على بلال علشان متقدم لاختك
فريد :سألت ناس كتير عنه وكلهم قالو زى ما انتى قولتى واحسن كمان
زى ما قولتى البلد كلها بتحبكم
دينا :مبروك لمروة ربنا يتمملهم على خير وعقبال الفرح
فريد :ربنا يخليكى
عقبالك انتى كمان يا انسة دينا
شوفتى خدت بالى ومقولتش مدام اهو
مسامحانى على المرة اللى فاتت ولا لسه وهفضل عايش بذنبك
دينا وهى بتضحك :لا مسامحاك
انا بسامح اول مرة بس
فريد :رايحة فين
دينا :هروح اقف مع اهلى
وقفتنا طولت وكده مينفعش
فريد :طيب ما نخليه ينفع
دينا باستغراب :قصدك ايه
فريد :هقولك بعدين
دينا بصوت واطى :صدمة كبيرة طلعت شقيط مع ان شكلك محترم صحيح الكتاب مش دايما بيبان من عنوانه لا
فريد :انتى بتقولى ايه بصوت واطى انا مش سامعك
دينا :مبقولش حاجة
بعد اذنك
فريد :اتفضلى
