اية :اسراء انتى كويسة...انا عارفة انك مش كويسة قوليلى يا حبيبتى بتفكرى فى ايه جواكى ايه
علشان خاطرى يا اسراء متسكتيش كده اتكلمى عيطى زعقى اعملى اى حاجة بس متسكتيش كده
اسراء :بفكر فى ليه يا اية
ليه هو عمل فيا كده ليه دخل حياتى واتشقلب لحد ما خلانى احبه ومستنية اليوم اللى يتقدملى فيه
ولما اليوم ده يجى يتقدم لصاحبتى
لما هو مش بيحبنى حفى ورايا ليه
خلانى احبه ليه من الاول
لما هو مبيحبنيش ومش عايزنى
عمل كل ده ليه من الاول
ما كان سابنى فى حالى
مسابنيش فى حالى ليه
وهى ليه عملت كده
ده انا صاحبتها انتى شاهدة عليا
انا عمرى اذيتها عمرى خدت منها حاجة بتحبها
ده انا لما كانت بتعجبها بلوزة عندى ولا شنطة كنت بجيبلها زيهم هدية
تعمل فيا كده ليه تكسر قلبى ليه تغدر بيا ليه
يستاهل تبيعنى وتشتريه
اية :لا ميستاهلش
اسراء :ولما هو ميستاهلش هى عملت فيا كده ليه
انا استاهل منهم كده ده انا عمرى ما زعلت حد منهم كنت باجى على نفسى علشانهم
فى الاخر يشترو بعض ويبيعونى انا
اية :هما ميستاهلوش تبقى فى حياتهم
انتى اغلى واحلى من كده بكتير وتستاهلى ناس احسن منهم
وهما يستاهلو بعض
ربنا هيعوضك
اسراء وهى بتعيط :انا زعلانة منهم اوى يا اية وزعلانة على نفسى اوى
قلبى بيوجعنى اوى
جوايا حزن كبير بسببهم انا مكنتش استاهل منهم كده والله ما كنت استاهل
ربنا يعوض عليا
يعوض عليا سنين الصداقة اللى هى رميتها ورا ضهرها
ويعوض عليا مشاعرى واحلامى اللى حلمتها بحياة هو شريكى فيها
ربنا هيعوضنى عن كل ده صح يا اية
هيعوضنى ولا انا مستاهلش
اية وهى بتحضنها :لا يا حبيبتى هيعوضك وانتى تستاهلى
اسراء :ربنا زعلان منى
انتى قولتيلى ان علاقتى بيه حرام وانا كملت قولت اللى النهاردة حرام بكرة يبقى حلال
بكرة يتقدملى
واهو متقدمليش ومفضليش غير ذنوب كلامى معاه وارتباطى بيه
وقلب مكسور وكرامة مجروحة
انا حاسة انى خسرت كل حاجة
خسرت رضا ربنا وخسرتهم وخسرت نفسى
اية :ربنا غفور رحيم يا حبيبتى استغفريه من قلبك وانوى انك عمرك ما هتعملى كده تانى وهو هيقبل توبتك
والتائب من الذنب كمن لا ذنب له يعنى ولا كأنك عملتى حاجة
وهما خسارتهم مكسب فى مليون داهية انتى ربنا نجاكى منهم
وانتى مخسرتيش نفسك انتى غلطتى فى حق نفسك صلحى غلطاتك وركزى فى حياتك متضيعيش وقتك ولا طاقتك فى التفكير فى اتنين ميستاهلوش
انتى اولى بوقتك وطاقتك ومشاعرك انتى اولى بنفسك يا اسراء
اسراء :هحاول وانتى هتساعدينى صح
اية :طبعا صح انا دايما هكون جنبك يا حبيبتى
الاء :كويس انى شوفتك انا كنت طالعالك
رنيت عليكى مرديتيش فقولت مبدهاش بقى اجى اعزمك بنفسى على خطوبتى
اية :خطوبتك على مين على اللى سرقتيه من صاحبتك
الاء :ده على اساس ان ياسر ده شنطة هسرقه منها
ده راجل وعنده عقل وقلب يختار بيهم لنفسه وهو اختارنى انا
اية :بجد احب احييه على اختياره ليكى
اختيار مناسب
اصل اسراء كتيرة على واحد زيه
انما انتى تستاهليه وهو يستاهلك
لايقين على بعض اوى بجد
الاء :انا مسمحلكيش...
اية قاطعتها :متسمحيليش ايه
متسمحيليش اهينك
ما انتى اللى هنتى نفسك لما سمحتى لنفسك تقربى من واحد صاحبتك بتحبه وواعدها بالجواز
سمحتى لنفسك توافقى عليه وتخسريها علشانه
سمحتى لنفسك تغدرى بيها وتطعنيها فى ضهرها
الاء :هو حبنى وانا حبيته
اية :ده على اساس ان انتى ولا هو تعرفو يعنى ايه حب اصلا
انتم متعرفوش الا يعنى ايه غدر يعنى ايه خيانة يعنى ايه قلة اصل
وبكرة تفهمى كويس انتى عملتى فى نفسك ايه
بكرة تشوفى انك بعتى الغالى اوى علشان الرخيص
اقولك حاجة يا الاء ياسر حاول قبل كده يقرب منى وانا صديته لأنى مليش صحاب رجالة وتعاملى معاهم فى حدود
كنت مفكراه مش قصده حاجة وبيتعامل على ان اصحاب اسراء صحابه عادى
بس دلوقتى فهمت انه لا
هو بيرمى صنارته على اى واحدة
وفى بنات زيى غاليين مبيبلعوش الطعم
وبنات زيك بيبلعوه
وبيلفو حبل الصنارة حوالين رقبتهم لحد ما يخنقهم
مش انتى وافقتى وهتتخطبيله
حلو ده أكبر واحسن عقاب ليكى
اتجوزيه وانتى حاطة ايدك على قلبك ومستنية يعمل فيكى اللى انتى وهو عملتوه فى اسراء
ولا عمرك هتشوفى معاه راحة ولا سعادة ولا امان
لأنه زيك ملوش امان
الاء :مش هيحصل هو بيحبنى هو قالى انه بيحبنى وميقدرش يستغنى عنى
اية :ما هو قال نفس الكلام لاسراء
الاء :لا هو محبش اسراء
انتى صاحبتى زى ما انتى صاحبتها مينفعش تاخدى صفها على حسابى انا معملتش حاجة تأذيكى يا اية
اية :لما تصدمينى فيكى بأنك تخطفى واحد انتى عارفة ان صاحبتك بتحبه ومستنية يتقدملها
واحس انى معرفكيش كده تبقى مأذيتينيش
لما اشوف دموع اسراء وقهرتها على نفسها بسبب غدرك بيها واقول انك كان ممكن تعملى فيا كده زى ما عملتى فيها تبقى مأذيتينيش
لما بسببك هحرص من الناس اكتر لأنى هخاف اعرف حد تانى زيك تبقى مأذيتينيش
انتى مفكرة انى هصاحبك تانى بعد اللى عملتيه
واجى خطوبتك كمان
وتيجى بقى انتى خطوبتى لما اتخطب
مفكرة انى هأمنلك تشوفى خطيبى ولا جوزى هأمنلك تدخلى بيتى من اصله
مفكرة انى مش هخاف تعملى فيا اللى عملتيه فى اسراء
لا يا الاء انتى اذيتينى واذيتى اسراء واذيتى نفسك
بس انتى حرة فى نفسك وتستاهلى نتايج اختيارك
لكن انا واسراء مكناش نستاهل اللى عملتيه فيها
امشى يا الاء
زى ما نسيتى سنين صداقتك مع اسراء ورميتيهم ورا ضهرك
انسى سنين صداقتك بيا وارميهم ورا ضهرك هما كمان
لأننا مش هينفع نكون صحاب تانى خلاص
الاء :انا مش عايزة اخسرك
اية :وانا ميشرفنيش انى اكسبك
امشى بقى انا مش عايزة اقولك كلام يوجع اكتر من كده
ومفيش ليكى جوايا دلوقتى غير كلام زى الزفت
خلاص يا الاء انا دلوقتى مش شايفاكى غير انك اللى خطفت من اسراء صاحبتى الانسان اللى هى بتحبه
ومش هشوفك غير كده
انسى انى ارجع تانى اشوفك الاء صاحبتى
وحقيقى انا مش عايزة اشوفك تانى اصلا
