عمار :لو سمحتى
اسماء :نعم
عمار :هو انتى ممكن تقومى تقعدى فى ترابيزة تانية
اسماء :افندم
عمار :يعنى المكان مليان ترابيزات فاضية انتى ممكن تختارى ترابيزة تانية تقعدى عليها
اسماء :والله وانت كمان ممكن تعمل كده
عمار :انتى هيفرقلك ايه الترابيزة دى من غيرها
اسماء :وانت هيفرقلك ايه دى من غيرها
عمار :هو فى الحقيقة هيفرقلى مش هعرف اقعد على ترابيزة غيرها
اسماء :والله .. ماشى انا هسيبلك الترابيزة اقولك هسيبلك المكان كله
عمار :انتى اضايقتى انا اسف..طيب بصى احنا ممكن نتشاركها ونقعد سوا
اسماء :لا ملوش لزوم هسيبك فى حفلة الذكريات دى لوحدك
عمار :حفلة ذكريات
اسماء :اه حفلة ذكريات ما انت اكيد مش جاى تقومنى من على ترابيزة قاعدة عليها الا لانك اكيد بتفتكر بيها حد اكيد مش هتعمل كده من الباب للطاق يعنى ولا لان الترابيزة دى بتطل على الشارع
عمار :معاكى حق يا..هو انتى اسمك ايه
اسماء :ليه
عمار :مش متعود اكلم حد من غير ما اعرف اسمه
اسماء :اسمى اسماء
عمار :ايه
اسماء :اسماء
عمار :انتى لدغة
اسماء :ايه الاكتشاف العظيم ده
عمار :لا بجد انتى لدغة بتنطقى السين ثاء كده شوية
اسماء :وعرفتها لوحدك ولا حد قالك
عمار :مش قصدى ارخم والله بالعكس دى حاجة حلوة انك تكونى لدغة
اسماء :فى شوية ناس ظريفة كده مش محسسنى انها حاجة حلوة بالعكس بيعلقو كأنها مشكلة المفروض اتصرف فيها ومش فاهمة اتصرف اعمل ايه الحقيقة
انا هقوم واسيبلك ترابيزة الذكريات تقعد عليها براحتك
عمار :خليكى بقالنا شوية بنتكلم اهو متمشيش
اسماء :ليه
عمار :مش عارف.. يمكن مش عايز ابقى لوحدى عايز حد اشاركه الذكريات
بعد شهرين
عمار :جبتينا مكان جديد ليه
اسماء :انت بتروح هناك علشان تفتكرها كده عمرك ما هتنساها لازم تبعد عن ذكرياتكم علشان تنسى
عمار :انسى ايه بس يا اسماء انتى مفكرة ان الترابيزة بس هى اللى بتفكرنى بيها صورنا سوا الفويسات اللى كانت بتبعتهالى الشات اللى بنا انا بقراه مرتين تلاتة فى اليوم كل يوم وبسمع الفويسات طول الوقت تقريبا
اسماء :ورينى كده الشات اللى بينكم..ايه ده انت جايبلى الشات اللى بينك وبين مامتك ليه انا عايزة الشات اللى بينك وبينها
عمار :ما هو ده الشات اللى بينى وبين سلمى انا كنت مسميها ماما
اسماء :يا ريتك ما قولتلى مسميها ماما وبتسمع الفويسات اللى كانت بتبعتهالك كده كتير
عمار :وانتى مكنتيش بتعملى كده مع رامى
اسماء :اعمل ايه اسميه بابا لا طبعا انا محدش فى الدنيا ياخد مكان ابويا عندى
عمار :والفويسات
اسماء :كنت بمسحها اول باول هى والشات
عمار :ليه كده يا عديمة الرومانسية
اسماء :موبايلى مكنش عليه مساحة وكانو واخدين حجم كبير
عمار :فمسحتيهم ببساطة كده
اسماء :ايوه انت بتحسسنى بالذنب ليه انا كنت مفكرة انه هيفضل فى حياتى طول العمر مش هيمشى وميفضليش منه غير محادثة شات وشوية فويسات وحتى وقتها كنت همسحهم
عمار :ليه
اسماء :علشان انسى
عمار :انتى محكتليش حاجات كتير عن حكايتكم مع انى حكتلك كل حاجة عن سلمى
اسماء :بسيطة احكيلك بص يا سيدى انا وهو كنا اصحاب زيك انت وسلمى بس مكناش صحاب من كام شهر زيكم وبعدين ارتبطنا لا احنا كنا اصحاب بقالنا تلت اربع سنين وبعدين قلبت معانا بحب بس الحب لوحده مكنش كفاية يخلينا نكمل سوا انا ورامى كنا مختلفين فى كل حاجة مفيش حاجة واحدة كنا متفقين عليها الحاجة الوحيدة اللى اتفقنا عليها هى اننا بنحب بعض بس انما اى حاجة تانية اختلفنا عليها حتى ابسط الحاجات
عمار :والاختلاف ده مظهرش غير لما ارتبطم ما هو اكيد كان موجود من الاول
اسماء :كان موجود طبعا بس لما نكون مختلفين عن بعض واحنا صحاب حاجة ولما نكون مرتبطين وبنفكر نتخطب ونتجوز حاجة تانية هو كان عايز واحدة تتطبع نفسها بطبعه يعنى تبقى زى المياه بتاخد شكل الكوباية اللى بتتحط فيها وانا كنت زى التلج اللى خلاص خد شكل معين ومش هيغيره
عمار :بس التلج ممكن يتغير ممكن يتنحت
اسماء :ممكن بس علشان تنحت التلج محتاج تبذل مجهود كبير علشان تنحته للشكل اللى انت عايزه ومتكسروش ورامى مكنش هيبذل كل المجهود ده هو كان عايز قصة حب سهلة وانا كنت محتاجة حد يقبلنى زى ما انا ويبقى مستعد يتعب علشانى
مع الوقت وكتر اختلافنا وخناقنا قرار اننا نسيب بعض واننا غلطنا لما ارتبطنا بقى قرار مشترك منى ومنه
عمار :وخرج من حياتك من وقتها
اسماء :لا عملنا حاجة اغبى من اللى عملناها لما قررنا نرتبط
قررنا اننا هنرجع صحاب زى الاول ورجعنا فعلا بعد كام شهر هو حب وجه حكالى ما احنا اصحاب بقى ولما ارتبط بيها عرفها عليا كان عايزنا نبقى اصحاب
عمار :لا متقوليش مش للدرجة دى
اسماء :والله حصل هو رامى اصله كان حلوف شوية فى اى حاجة ليها علاقة بالمشاعر فى امور القلب فهمه كان على قده وانا كمان اتغابيت وعملت فيها متفتحة وايه يعنى لما اتعرف عليها وانا مش تقليدية ولا رجعية وطبعا اكتشفت ان الكلام ده كله بلح وانى كان المفروض ابعد مش من لما حب وارتبط لا من اول ما ارتبطنا انا وهو وفشلنا غلطة واتصلحت
عمار :انتى صلحتيها
اسماء :لا مش انا نيرة دى البنت اللى هو ارتبط بيها
هى عمرها ما نسيت ان انا وهو ارتبطنا وحبينا بعض واصلا هى كانت غيورة يعنى فكرة وجودى فى حياته كصحاب كان صعب تتقبلها ما بالك بقى باننا مش بس اصحاب لا انا كمان الاكس بتاعته
اشتغلتلى فى الازرق بقى تريقة عليا من تحت لتحت على اى حاجة فيا لبسى كلامى اللدغة بتاعتى وطبعا انا مبسكتش وقدام رامى تقول انا كنت بتهزر وهى اللى قفشت وبتاع
هو فى الاول كان بيحاول يراضينا احنا الاتنين وبعدين بقى بياخد صفها هى مش لانها كانت بتقنعه انها ملاك برئ بيتعامل معايا بطبيعته وانا اللى بقفش وانا اللى مش ناسية اننا كنا بنحب بعض لا لانه حبها حبها بجد
حبها فصدقها ومبقاش فارقله غير رضاها وراحتها فهمت انى وضعى سخيف اوى وانى مليش مكان فى حياتهم ولا هما ليهم مكان فى حياتى
فبعدت قولت لرامى انها كانت قاصدة كل حاجة بتعملها وان مش انا اللى مش ناسية اننا كنا بنحب بعض هى اللى مش ناسية وحقها تغير انا اللى غلطانة انا اللى مكنش المفروض اكون موجودة بس خلاص انا هصلح غلطى واختارت ابعد
عمار :وهو سابك تبعدى بسهولة كده
اسماء :لا حاول يمنعنى بس محاولته مكنتش قوية هو فهم اننا مش هينفع نفضل فى حياته سوا ووقت الجد لو اتخير هو هيختار نيرة لانه بيحبها وزى ما قولتلك هو كان عايز قصة حب سهلة عايز حياة سهلة وانا وجودى كان مصعب حياته وقصة حبه
عمار :وهى اصلا عرفت منين انكم كنتو بتحبو بعض وارتبطو انتى قولتلها
اسماء وهى بتضحك :لا رامى اللى قالها مش قولتلك حلوف وفهمه على قده فى المشاعر
عمار وهو بيضحك :لا ده رهيب بجد رهيب ده لو عايز يولعها نار ويقلب حياته جحيم مش هيعمل كده
اسماء :بص هو رامى طيب وصريح ملوش فى اللف والدوران ودى كانت حاجة مميزة فيه الرجالة غالبا مبتبقاش كده
يعنى هو قال تعرف منه احسن وعلشان ميبقاش بيخبى عليها والكلام ده كان يبقى قشطا وبيس لو كنت انا خرجت من حياته وبقيت ماضى مش لسه فيها بصفتنا صحاب
من الاخر هو الموضوع كان كله غباء كده من اوله لاخره ولا عمره كان هيكمل مهما طال اخرته كانت بعد وفراق
عمار :اوقات كتير كنت بفكر مش كان هيبقى احسن لو فضلنا انا وسلمى صحاب
اسماء :انسى صدقنى عن تجربة مينفعش مش حبيتو بعض وارتبطو خلاص ودع صداقتكم بقى للابد لو فشلتو فى ارتباطكم وقتها بتبقى خسارة مضاعفة انت بتخسر حبيبك وصديقك بتبقى حتى مش لاقى حد تشتكيله لان اللى كنت بتشتكيله هو نفسه اللى انت سيبته فانت بتحس انك خلاص مبقالكش حد
عمار :ده كان بالظبط احساسى لحد من شهر من بعد ما عرفتك وانا مبقتش لوحدى وبقى عندى حد اشكيله
اسماء :انا مبسوطة بكلامك بس فى مشكلة واحدة
عمار :مشكلة ايه دى
اسماء :انك بتشتكى بس انما مبتحاولش تنساها ماسك فى ذكرياتك معاها بايدك وسنانك
عمار :مين قال كده
اسماء :انت بجد بتسأل الساعة اللى فى ايدك هى اللى قالت مش دى كانت هدية منها الشات اللى بينكم اللى بتقراه كل يوم فويسات الواتس اللى تلاقيك حفظتها من كتر ما بتسمعها الترابيزة اللى مبتقعدش غير عليها لانكم كنتو بتقعدو عليها سوا بقى بتعمل كل ده ومتوقع انك هتنساها ابقى تعالى تف على قبرى لو حصل
عمار وهو بيضحك :اكيد مش هعمل كده انا جدع على فكرة ومبتفش على قبور صحابى
اسماء وهى بتضحك :ماشى طمنتنى..بس يا عمار بجد كده مينفعش لازم تحاول تنساها وتتجاوز حكايتك معاها
عمار :وهو انا كل اللى هيخرجو من حياتى هنساهم انا خرج من حياتى ناس كتير اوى يا اسماء لو نسيتهم هفتكر مين هيفضلى مين افتكره
انسى صاحبى اللى مات وانا فى ثانوى ولا انسى صحابى اللى طلعو اندال وباعونى انسى سلمى ولا انسى امى
اسماء :انت مامتك..
عمار :الله يرحمها
اسماء :الله يرحمها..بص مامتك اكيد متتنسيش صاحبك الله يرحمه كمان ميتنسيش ده حقهم عليك انك تفتكرهم وتدعيلهم بالرحمة
انما صحاب اندال تنساهم طبعا واحدة حبيتها وارتبطت بيها واكتشفت هى انكم مش مناسبين فجاة كده بعد ما ارتبطو كأنها كانت نايمة وصحيت مرة واحدة دول تنساهم فورا على طول دراعك وترميهم بره حياتك اتعلم تفتكر اللى يستاهلو انك تفتكرهم بس
عمار :اوقات بفكر ان يمكن انا اللى خنقتها بحبى واهتمامى والكتير اوى اللى كنت مستنيه منها انا كنت عايزها تعوضنى عن غياب امى فتكونلى ام تعوضنى عن انى مليش اخوات فتكونلى اخت وعايزها تكونلى صاحبة وحبيية
يمكن انا اللى استنيت منها اكتر من اللى هى تقدر تديهولى
اسماء :كلامك مش غلط بس برضه ده مش غلطك لوحدك انت كان باين عليك ان ده اسلوبك فى الحب وهى قبلت انكم ترتبطو كمان احنا لو مش هنعوض بعض عن اللى ناقصنا اومال بنرتبط ليه بقى ولا حتى بنبقى صحاب ليه
هى بدرى بدرى تعبت وحتى مقالتش تعبت لا قالت انا حاسة اننا مش مناسبين لبعض كأنكم اتخطبتو لبعض صالونات ومحدش فيكم كان يعرف التانى مش كنتو صحاب لمدة شهور وارتبطو لمدة شهور برضه وهى وافقت تتخطبو محدش جبرها توافق ولا تتسرع هى كانت بتتحجج بتخلع بطريقة شيك مش اكتر
انت مغلطتش يا عمار انت من حقك تلاقى اللى تكونلك كل حاجة انت محتاجها تكونلك ام واخت وصاحبة وحبيبة وزوجة خصوصا لما تكون انت هتقدرلها كل ده وخصوصا كمان لما تكون مستعد تردلها كل ده وتبقالها كل اللى هى محتاجاه
غيرك بيبقى عايز البنت تكونله كل ده وهو حتى مش هيقدر تعبها علشانه ولا مستعد يتعب علشانها
ده اللى انانى بجد ده اللى بيخنق ويضغط البنت اللى معاه انما انت لا انت كنت مستنى منها حقك وهى اللى مقدرتش تديهولك
الحب مش مجرد كلمة بحبك والخطوبة مش دبلتين والجواز مش فستان ابيض وبدلة فرح
كل حاجة من دول التزام منك تجاه شخص
شخص بيبقاله حقوق عليك شخص لو مش هتقدر تديله حقوقه وتوفيله حقوق قلبه عليك يبقى مترتبطش بيه متقولش كلمة بحبك لو انت مش قدها متخطبش ومتتجوزش لو مفكر ان التزاماتهم التزامات مادية بس وناسى ان فى التزامات معنوية بتعادل الالتزامات المادية فى الاهمية ده لو مكنتش اهم
انا ممكن انام من غير عشا مادام نايم جمبى انسان بحبه وصاينى وصاين قلبى انما مقدرش انام جمب واحد كاسرلى قلبى حتى لو منيمنى فى قصر على ريش نعام
عمار :يا ريت كانت كل البنات بتفكر زيك
اسماء :ويا ريت كل الشباب تقدر كل ده فى شباب كان معاهم بنات مفيش منهم وعادى جم عليهم وظلموهم ومقدروهمش
دلوقتى الخيانة مبقتش مرتبطة بالرجالة بس وقلة الاصل مبقتش مرتبطة بالبنات اللى بتخلع لما تعرف واحد اغنى او يرجع ابن خالتها من الخليج
دلوقتى بقى فى بنات ورجالة بتعمل كده اللى مستعدين يكسرو قلبك اكتر من اللى مستعدين يجبرو قلبك
بقينا بنقول وعود مبنفكرش هنقدر نوفى بيها ولا لا
بندخل فى علاقات مش مستعدين نتعب فيها علشان تكمل
المهم انا عايزاك تمسح الشات اللى بينكم والفويسات كمان
عمار :طيب واحدة واحدة يعنى امسح الشات وبعدين ابقى امسح الفويسات
اسماء :عمار الاتنين يتمسحو دلوقتى لو أجلتها يبقى لا هتمسح حاجة ولا هتنسى عمرك
عارف انت ايه مشكلتك انك بتفكر فيها على انها سلمى اللى انت حبيتها وخطبتها وعشت معاها ايام حلوة
لو فكرت فيها على انها سلمى اللى سابتك اللى مقدرتش تديلك اللى انت محتاجه سلمى اللى اتخلت عنك بسهولة هتلاقى نفسك بتمسح الشات والفويسات وبتمسحها من حياتك باستيكة
افتكر الوحش اللى هى عملته علشان تنسى افتكر هى ليه مش فى حياتك دلوقتى
عمار :طيب خدى امسحى انتى وبالمرة امسحى صورها
اسماء :لا انت اللى لازم تمسحهم بنفسك بايدك تمسحهم يا عمار
عمار :ماشى ادينى مسحت شات الفيس وادى الواتس والفويسات كمان اتمسحت وادى صورها فى فيديوهات اسيبها
اسماء :لو عندك مساحة على موبايلك سيبها احنا هنهزر امسح كل حاجة يا عمار حتى رقم موبايلها
عمار :خلاص مسحت كل حاجة تاخدى تتأكدى بنفسك
اسماء :لا انا بثق فيك
عمار :تعالى نبص على الجانب الايجابى بقى عندى مساحة كبيرة اوى على موبايلى بعد ما مسحت كل ده
اسماء بابتسامة :لا الجانب الايجابى الحقيقى انك هيبقى عندك مساحة اكبر فى حياتك انت كده بتفضى مساحة فى قلبك وحياتك بتخرج منهم واحدة متستاهلهمش علشان تديهم لواحدة تستاهلهم
عمار وهو بيضحك :انتى فى الموف اون معندكيش ياما ارحمينى الواحد لو بيتكلم معاكى حتى لو مش مرتبط اصلا هيحس انه عايز يسيب واحدة ويتجاوز حكايته معاها ويكمل حياته وميوقفهاش عليها
اسماء وهى بتضحك :لا داعى للتصفيق دعونا نعمل فى صمت
عمار :طيب مش عايز احرقلك دمك والله بس سؤال بالنسبة للوقت اللى كنت بقعد اقرء فيه الشات واسمع الفويسات واتفرج على صورها وفيديوهاتنا سوا اعمل فيه ايه
اسماء :اعمل اى حاجة اخرج مع اصحابك اقعد مع والدك اقرء حاجة اتفرج على حاجة كده يعنى
عمار :تمام
اسماء :مش مرتاحة لتمام بتاعتك دى انت مش مضمون ده انت ممكن تراقبها فيس ولا انستا اقولك كلمنى كل ما تحس انك عايز تقرء الشات اللى بينكم او تسمع الفويسات او اى حاجة من الحاجات دى كلمنى
عمار :بس دى اوقات كتير اوى هتتحملى مش هتزهقى منى
اسماء :هتحمل وحتى لو زهقت مش هبطل اسمعك احنا اصحاب وده حقك عليا
عمار :انتى صاحبة جدعة اوى على فكرة
اسماء :عارفة على فكرة
