يقين :يعنى انتى جاية هنا هربانة منهم
فريدة :جاية هنا هربانة من نفسى من ذكرياتى معاهم من سنين عشرة بنا رموها هما فى الزبالة هربانة من صدمة عمرى اللى اتصدمتها فيهم كلهم انا اتبعت بالرخيص اوى يا يقين
يقين :مين اكتر حد فيهم صدمك باللى عمله سهى ولا كريم ولا سيف ومى
فريدة :كلهم سيف سكت ومى بررتلهم اللى هما عملو وغلطتنى وكريم خانى مع سهى وسهى خانتنى مع كريم
اوقات بفكر انا ليه اتصدمت فى كريم واحد مكنش عاجبه فيا حاجة مى دمها اخف منك سهى شخصيتها اقوى منك انتى قصيرة اوى كده ليه انتى عيونك ضيقة اوى انتى مبتصبغيش شعرك احمر زى سهى ليه
يقين :هو عرف منين انك مبتصبغيش شعرك
فريدة :هو اصل..لما ارتبطنا انا وهو
هو اقنعنى ومى وسهى كمان اقنعونى انه عادى يشوفنى بشعرى احنا مرتبطين لازم اكون بثق فيه وعلشان ميبصش بره فانا اوقات يعنى مش دايما كنت بكلمه فيديو وانا بشعرى
يقين :وفى الاخر عمل ايه ما هو بص بره صحابك دول من شياطين الانس انتى ربنا نجاكى منهم
طيب شعرك وشافه علشان مرتبطين شعر سهى شافه ازاى قبل ما يرتبط بيها ويسيبك
فريدة :سهى كانت بتلف حجاب بيبين نص شعرها واوقات كتير بتلفه من غير دبابيس يعنى تقريبا شعرها كله ييبان وهى كانت بتهتم بيه بتفرده لان شعرها مش ناعم وبتصبغه كل شوية تغير لونه
يقين :طيب انا فاهمة صدمتك فى كريم وسهى بس مش فاهمة ازاى صدمتك فى مى وسيف زى صدمتك فيهم
فريدة :لانهم صحابى ومحدش فيهم وقف فى صفى كلهم غلطونى انتى اهملتى حدودك كتير خنقتيه بيها مى قالتلى كده
يقين :حدودك كتير فى ايه ما انتى كنتى بتسمعى كلامه فى كل اللى بيطلبه
فريدة :لا مش كله كريم بعد ما خلانى اكلمه وانا بشعرى فيديو بدء يطلب منى انى ملبسش بكم وبدء يحاول يتكلم معايا كلام فيه تجاوزات كتير انا رفضت كنت حاسة انى هبقى رخيصة اوى فى نظره وفى نظر نفسى لو قبلت
هو وهما كمان قالولى انتى اللى محبكاها وعاملة فيها شيخة وهو يعنى من حقه يحس انى بتاعته وناخد على بعض
يقين :ده يستاهل ياخد على دماغه وهما كمان
ايه القرف ده وهو تعب لانك رفضتى انه يحترمك ويحترم اهلك فراح ارتبط بسهى طيب هو كان مخنوق من حدودك فى تعاملك معاه ده اللى برر بيه خيانته ليكى هى بقى بررت بايه
فريدة :قالت انها حبته غصب عنها واصلا هى كانت بتحبه قبلى ومقالتش علشانى وسكتت وكتمت حبها فى قلبها بس لما هو ميكنش سعيد معايا وكده كده هيرتبط بغيرى ليه متكونش هى بعد كل الوجع والتضحية اللى اتحملتهم علشانى
يقين :ومى وسيف اقتنعو بالهبل ده
فريدة :مى دلدولة سهى عاملة زى ضلها مبتقولش لا على اى حاجة تقولها سهى
سيف بقى كريم مسيطر عليه سيف مكانلوش صحاب كان لوحده كريم عرفو علينا بقى واحد من شلتنا بقاله اصحاب كتير بعد ما كان مكانلوش ولا صاحب واحد
سيف مكنش هيخسرهم علشانى هما تلاتة وانا واحدة لا وواحدة من التلاتة دول مى اللى هو مرتبط بيها سيف مقالش حاجة هو سكت مغلطنيش بس برضه مدافعش عنى معمليش حاجة خالص
بعدها انا لقيت بنت بتسأل عندى فى الكلية لو فى حد عايز يسكن فى شقة لانهم هى واصحابها خدو شقة وفاضل مكان لقتنى بقول لنفسى ليه لا لو سكنت كده هشوفهم اقل وكمان يمكن تفكيرى فيهم وفى اللى عملوه فيا يقل وبس جيت هنا وشوفتك واتعرفت عليكى
يقين :عارفة يا فريدة انتى ربنا بيحبك
فريدة باستغراب :بيحبنى انا ازاى انا غلطت كتير اوى وقصرت فى حق ربنا كتير اوى
يقين :لو مكنش بيحبك مكنش خلصك منهم وخلاكى تشوفيهم على حقيقتهم مكنش خلاكى ترفضى تغلطى اكتر من كده مع كريم
فريدة :انا وقتها مكنتش برفض خوف من ربنا انا كنت حاسة انى هنزل من نظره ومن نظر نفسى كمان كنت خايفة على اهلى هما ميستاهلوش اعمل فيهم كده
يقين :دى كلها اسباب ربنا سبحانه خلاكى تفكرى فيها علشان يحميكى ربنا دايما جمبك ومعاكى يا فريدة
فريدة وفى دموع بتتجمع فى عينيها :حتى لو انا مستاهلش
يقين :ربنا كريم اوى واحن علينا من امهاتنا واقربلنا من نفسنا المهم دلوقتى انك تحمدى ربنا على انه نجاكى منهم وانه ادالك فرصة تتوبى
فريدة وهى بتعيط :هيقبل توبتى انا غلطت كتير اوى يا يقين انا مش فاكرة اخر مرة صليت فيها كان امتى انا عمرى ما كان عندى مصحف بتاعى اكون بقرء فيه قرءان انا وحشة اوى انا مش زيك
يقين :انتى تقدرى تبقى زيى واحسن منى كمان
وبعدين انا مش حلوة اوى زى ما انتى متخيلة انا كمان غلطت انا كمان قصرت فى حق ربنا
فريدة :غلطتى غلطات زى غلطاتى
يقين :لا غلطات مختلفة عنها بس غلطت وتوبت واستغرت كلنا بنغلط يا فريدة بس الشاطر اللى يرجع عن غلطه ويتوب ويستغفر ويبدء من جديد
فريدة وهى بتمسح دموعها بايديها :وانا هبدء من جديد مع ربنا ومع نفسى كمان من النهاردة انا هعمل فريدة جديدة
يقين وهى بتطبطب على كتفها :ايوه هو ده عاش
