ايلين :انتى كويسة جرالك حاجة
سارة وهى بتقوم تقف :اه انا تمام
ايلين :بجد مش حاسة بوجع احنا ممكن نروح مستشفى لا يكون حصل كسر
سارة :متقلقيش دى خبطة بسيطة اخرها شوية كدمات
ايلين وهى بتعيط :انا اسفة..انا مكنش قصدى..انا اسفة اسفة
سارة :اهدى طيب انتى بتعيطى ليه ده انتى اللى خبطانى المفروض انا اللى اعيط طيب انتى بتعيطى ليه اعملك ايه طيب هو يوم ابيض من اوله
ايلين :
سارة وهى بتحضنها :اهدى انا كويسة متقلقيش مش هموت ويدخلوكى السجن ردى طيب انتى بتعيطى وبس..مش وقتك يا سيد..بيرن تانى لو مردتش هيقلق..ايوه يا سيد
سيد :ايه ده انتى بتعيطى
سارة :لا مبعيطش
سيد :سارة متكدبيش انا سامع صوت عياط بتعيطى ليه حصل ايه انا جايلك
سارة :يا سيد مبعيطش مش انا اللى بعيط وانا لو بعيط هيبقى ده صوتى ما انت عارف صوتى لما بعيط بيبقى عامل ازاى
سيد :اومال مين اللى بتعيط
سارة :واحدة خبطتنى بعربيتها فى الزفتة الجامعة ومش عارفة بتعيط ليه ومبتردش عليا
سيد بخضة :خبطتك انتى كويسة انا جايلك
سارة :يا سيد انا كويسة وقردة وزى الحصان هكلمك لما ارجع المفروض نحترم وجع البنية تقول ايه هى مفلوقة من العياط وانا بكلمك اقفل بقى
سيد :خلاص بس كلمينى على طول ولا اجى اخدك من الجامعة
سارة :لا متجيش انا هعدى عليك وانا مروحة اقفل بقى
سيد :ماشى خلى بالك من نغسك
سارة :وانت كمان سلام.. اسفة انى رديت عليه وانتى بتعيطى كده بس لو مرديتش كان زمانه قلق وجالى سيد اكتر حاجة يكرهها انه يكلمنى ومردش
ايلين وهى بتخرج من حضنها وبتمسح دموعها :مين سيد
سارة :هديتى اهوه وبطلتى عياط الحمد لله
ايلين :مرديتيش مين سيد
سارة :سيد يبقى خطيبى او استنى بتضايقه خطيبى دى هو يبقى جوزى احنا كاتبين الكتاب
ايلين :يعنى انتى متجوزة
سارة :بصى كاتبين الكتاب يعنى متجوزة اه بس لسه عايشة مع اهلى
ايلين :وليه عايشة مع اهلك لما انتى متجوزة انتو متخانقين
سارة :لا خناق ايه بعد الشر ربنا ما يجيب خناق يا ستى كاتبين الكتاب بس لسه معملناش فرح لما نعمل فرح هبقى اروح اعيش معاه
ايلين :وهتعملو الفرح امتى
سارة :لما اخلص من الزفتة دى
ايلين :زفتة
سارة :قصدى يعنى لما اتخرج من الجامعة بقيتى تمام اهو كنتى بتعيطى ليه بقى معقول اتخضيتى للدرجة دى
ايلين :ليه بتقولى عن الجامعة زفتة
سارة :بتوهى علشان متجاوبيش تمام حقك بس مادام بقيتى كويسة هخلع انا بقى
ايلين :انا ممكن اوصلك
سارة :لا مش هينفع
ايلين :ليه بس
سارة :هو غير ان عربيتك مش هتدخل فى الشارع اللى انا ساكنة فيه من كتر ما هو ضيق فانا مش عايزاكى توصلينى
ايلين :هوصلك لاقرب مكان ينفع اوصلك ليه كمان دى اقل حاجة اعملهالك بعد ما خبطتك بعربيتى وعيطت وحضنتينى
سارة :هو بالنسبة لانك خبطينى فدى حاجة مش مقصودة فمش مستاهلة تعمليلى حاجة او تعوضينى وبالنسبة لانك عيطتى وحضنتك فدى جدعنة وولاد البلد مبياخدوش على جدعنتهم مقابل
ايلين :انا اسفة مش قصدى اضايقك والله
سارة :مش مشكلة بعد اذنك
ايلين :انتى اسمك ايه
سارة :انا سارة بدرس بيزنس السنة دى اخر سنة
ايلين :وانا ايلين اخر سنة بس بدرس ميديا
سارة :لايق عليكى تبقى مذيعة شبه البنات المنورة اللى تقفيل لبنانى اللى بيطلعو فى التلفزيون
ايلين باستغراب :يعنى ايه تقفيل لبنانى
سارة :هو..اشرحهالك ازاى دى..يعنى شبه موزز لبنان
ايلين وهى بتضحك :يعنى انا تقفيل لبنانى وشبه موزز لبنان
سارة :اه واحلى كمان انتى طبيعى انما هما بقى عاملين عمليات تجميل بعدد شعر راسهم واهو دكاترة التجميل بياكلو من وراهم الشهد
ايلين وهى بتضحك :انتى دمك خفيف اوى
سارة :تعيشى يا قمر..سيد بيرن ..هخلع انا بقى سلام ايوه يا سيد خلاص خارجة اهوه
