غالية :بص يا حسام انا عارفة انك بتكرهنى بس مش لازم كل ما تشوف وشى تبين انك بتكرهنى تمام
حسام :انتى عرفتى منين ان انا بكرهك
غالية :من تصرفاتك كلامك تعبيرات وشك هو انا بس اللى عارفة ده طوب الارض عارف مج النسكافية اللى فى ايدك ده عارف انك بتكرهنى وانا مبقولكش حبنى كل اللى بقوله مش لازم تبينلى ده فى كل تصرفاتك انت ابن خالتى يعنى هنشوف بعض كتير ومفيش طريقة نمنع بيها ده لاننا اهل فحاول انك تتقبل فكرة انك مضطر تشوفنى وتتعامل معايا طول العمر
يا سيدى متعاملنيش بحب عاملنى بزوق ابتسم فى وشى وقولى اذيك وخلاص مليش عندك اكتر من كده
سارة :غالية انتى هنا طيب مصحتنيش ليه
غالية وهى بتحضنها :كنت لسه هدخل اصحيكى يعنى عارفة اننا جاينلكم النهاردة وتنامى لدلوقتى مفيش دم خالص كده
سارة وهى بتضحك :ما انتى عارفة انه مفيش ..المهم خالتى فين
غالية :مع خالتى كريمة فى المطبخ تعالى نروح نرخم عليهم
بعد تلت شهور
غالية :يعنى حسام ساب محل الدهب ومشى وقال ان الجوازة دى متلزموش
سارة :اه انا اتفاجأت برد فعله مش هنكر ان دمى اتحرق لما العروسة وامها نقو حاجات اغلى من اللى متفقين عليها وحكمو رايهم ان كل اللى نقوه هيجى عصبتنى فكرة انهم بيحطونا قدام الامر الواقع دى بس ان حسام يلغى الخطوبة والجوازة كلها دى صدمتنى كبر الموضوع هو
غالية :لا بالعكس هو عمل الصح دى ناس مبتلتزمش باتفاق وبتتعامل باسلوب لوى الدراع اللى هو فى اخر لحظة وانتو فى محل الدهب يقولو احنا عايزين اكتر من اللى اتفقنا عليه
سارة :بابا قال لحسام هكملك انا فلوس الشبكة وعدى اليوم بس حسام مرضيش
غالية :انا لو مكانه والفلوس فى جيبى حتى مش هرضى باسلوب لوى الدراع ده كمان واضح انهم ناس مادية ومستغلة الحركة اللى عملوها وحشة اوى بجد
اخوكى عمل الصح لو كان سكت على الحركة دى النهاردة كان هيضطر يسكت على حركات نقص كتير بكرة وهيبقى الغلط غلطه هو اللى وافق من الاول على ناس ملهمش كلمة
سارة :بابا مضايق البنت كانت بنت صاحبه
غالية :المفروض صاحبه هو اللى يكون محروج من والدك مش العكس طب وخالتى
سارة وهى بتضحك :خالتك فرحانة انتى عارفة انها عايزاكى لحسام
غالية وهى بتضحك :وانا عايزة اتنين مليون جنية احقق بيهم احلامى عادى يا سوسو كلنا بنعوز حاجات فى الدنيا ومش كل اللى بنعوزه بيحصل اخوكى بيكرهنى وانا مبطيقهوش نتجوز علشان نقتل بعض من اول يوم حتى مش هنلحق نجبلكم احفاد تفرحو بيهم
سارة وهى بتضحك :لا يبقى الله الغنى انا عايزة عيال يقولولى يا عمتو..استنى حسام شكله رجع هو وصلنا ومطلعش معانا هخرج الحق الخناقة من اولها سلام
عبدالله :ينفع اللى عملته النهاردة ده
حسام :وانا عملت ايه يا بابا
عبدالله :حرجتنى مع عبدالعزيز صاحبى قولتلك هكملك انا فلوس الشبكة لو ممعكش فلوس تكمل
حسام :ومين قال انى معييش فلوس تكمل بس هو ينفع دول بيلوو دراعنا يا بابا ومش انا اللى واحدة وامها يمشو كلامهم عليا وعمى عبدالعزيز سكت يعنى موافق على كلامهم او ملوش راى ولا كلمة على اهل بيته
عبدالله :يا ابنى مش كده هما عايزين يفرحو ببنتهم ويطمنو عليها
حسام :وهى الشبكة اللى هتفرحهم وتطمنهم عليها ما انا ممكن ابيعهالها بعد ما اتجوزها اللى يطمنهم على بنتهم انهم يدوها لراجل بيفهم فى الاصول وهما مبيفهموش فى الاصول بدليل انهم رجعو فى اتفاق رجالة شكلهم طماعين يا بابا
سارة :غالية قالت كده
حسام :وانتى لحقتى تحكلها اللى حصل
سارة :الله مش بنت خالتى واكتر من اختى
كريمة :قالت ايه غالية يا سارة
سارة :قالت ان حسام عمل الصح ده لوى دراع وعدم التزام باتفاق وانه لو سكت النهاردة يبقى لازم يسكت على حركات نقص كتير بكرة وهيبقى هو اللى غلط لما قبل من الاول وقالت انهم شكلهم ماديين ومستغلين وقالت ان المفروض ابو العروسة اللى يتحرج من بابا مش العكس..اه وقالت انها لو كانت مكان حسام والفلوس فى جيبها حتى مكنتش هترضى برضه
كريمة بابتسامة :بنت اختى مفيش فى عقلها يا بخته اللى تبقى من نصيبه
سارة وهى بتضحك :قصدك يا بخته اللى ترضى بيه
حسام :يا سلام على ايه كل ده فيها ايه ست غالية زيادة عن باقى البنات
سارة :لا فيها كتير غالية عاقلة وجدعة وعينيها مليانة وطيبة وحنينة انت بس اللى مش شايفها كويس يا حسام
عبدالله :انتو بتتكلمو فى ايه وناسين المصيبة اللى حسام عملها
كريمة :حسام مغلطش يا عبدالله ومش علشان الجوازة مكنتش على هوايا بس اللى عملوه ده مينفعش كمان شكلهم بيت حريمه هما اللى ممشينه وانا مقبلهاش على ابنى لا انا ابنى راجل وسيد الرجالة كمان
ولو على صاحبك فالمفروض هو اللى يعتذرلك يمكن وقتها يبقى فيها كلام تانى
حسام :لا تانى ولا تالت هى خلصت على كده ربنا يسهلها مع واحد غيرى انما انا هى متلزمنيش بعد اذنكم
