يارا :يا عيسى اهدى بس
عيسى :اهدى بجد عايزانى اهدى يعنى معيد عندك دونا عن بنات الكلية لا كلية ايه دونا عن بنات الجامعة كلها ملقاش غيرك يطلب منها رقم ابوها وتقوليلى اهدى مش عايزانى اباركلك بالمرة
يارا :يعنى هو انا اديته رقم بابا انا مش قولتله انى مقرى فتحتى عليك وهو اتأسف وخلاص الموضوع خلص
عيسى :المعيد ده متحضريلوش تانى سكاشن
يارا :واعمال السنة اللى فى ايده هعمل فيها ايه اذكى بيها عن صحتى مينفعش يا عيسى وبعدين هو يعنى هياخد باله منى دى الدفعة فيها ولا ميتين بنت
عيسى :وهو من بين الميتين بنت مشافش غيرك
يارا :المهم انا شايفة مين انا مش شايفة غيرك يا عيسى ولا عايزة غيرك
عيسى :ومش فارقلك انه معيد وبكرة يبقى دكتور وعنده عربية
يارا :وايه يعنى ما انت مهندس ويا سيدى انا عايزة اركب معاك المواصلات المهم تسبنى اقعد جمب الشباك
عيسى وهو بيضحك :يا سلام
يارا :اه والله انا بكلمك جد انا ميهمنيش اركب معاك عربية نتشحطط فى مواصلات اركب وراك على عجلة حتى مش مهم المهم انى ابقى معاك
انا محكتلكش علشان تضايق يا عيسى انا حكتلك بس علشان انا متعودة انى بحكيلك كل حاجة بتحصل معايا بس شكلى غلطت
عيسى :مغلطتيش يا يارا بس غصب عنى انتى متعرفيش انتى عندى ايه انا لو عليا مخليش حد يشوفك غيرى وانتى بتكلمينى عن واحد عايز يتجوزك
يارا :كان يا عيسى كان دلوقتى خلاص هو عرف اللى فيها هيشوف نصيبه مع واحدة غيرى بقى
وبعدين كلها شهرين تكون مايسة اتجوزت ونتخطب انا وانت وامشى بايدى فيها دبلتك
عيسى :ربنا يصبرنى على الشهرين دول لحسن انا خلاص زهقت
يارا :خلاص هانت قربنا فات الكتير ما باقى الا القليل
بعد تلت شهور
فى الكلية
ياسين :مبروك يا ياسمين مبروك يا ياسر
ياسمين :الله يبارك فى حضرتك
ياسر :الله يبارك فيك يا دكتور
ياسين :عقبال كل الباقين عقبالك يا يارا
يارا وهى بترفع ايديها اليمين :لا خلاص يا دكتور انا سبقتهم عقبال اللى متخطبوش بقى
ياسين :ات..اتخطبتى ..مبروك
يارا :اه من اسبوع الله يبارك فى حضرتك
بالليل
يارا :اتنين من دفعتى اتخطبو الكل كان بيباركلم شكلهم كان فرحان اوى
عيسى :ربنا يتمملهم على خير محصلش حاجة تانية فى يومك
يارا :لا..لا محصلش احكيلى انت عملت ايه النهاردة فى يومك
بعد ست شهور
ياسين :يارا اخيرا جيتى انتى كنتى غايبة ليه كمان ليه لابسة اسود
يارا :عندى حالة وفاة
ياسين :مين اللى مات
يارا :عيسى خطيبى بعد اذنك عندى محاضرة
بعد سنة ونص
كامل :لا يا يارا حرام عليكى بقى لامتى هترفضى عرسان ميترفضوش
هنية :يا بنتى احنا لو عيشنالك النهاردة مش هنعيشلك بكرة اخواتك كل واحد فيهم اتجوز وطمنا عليه مفاضلش غيرك خايفين نموت ونسيبك فى الدنيا بطولك
كامل :عايزين نفرح بيكى ونشيل ولادك
يارا :يا بابا انا مش قادرة والله ما قادرة
هنية :ولحد امتى هتفضلى كده لحد ما تضيعى احلى سنين عمرك فى وهم عيسى مات يا يارا بس انتى لسه عايشة يا بنتى
كامل :خلاص انا اديتله ميعاد هيجى وتشوفيه وتقعدى معاه
يارا :من غير ما انا اوافق يا بابا
كامل :انتى مش هتوافقى وانا مش هسيبك تضيعى سنينك لحد ما يجى عليكى يوم تلاقى نفسك فيه لوحدك
هو انسان كويس دكتور فى الجامعة واتقدملك بدل المرة تلاتة يعنى شاريكى وانا مش هضيع منى واحد شاريكى
يارا :يا بابا..
كامل قاطعها :انا خلاص اديته كلمة ايه هتصغرى ابوكى قدامه
يارا :لا طبعا يا بابا بس حضرتك مش هتجبرنى اوافق لو بعد ما اتكلمت معاه رفضته مش كده
كامل :انا مش هجبرك بس انتى كمان اتقى ربنا فيه وفينا وفى نفسك وخدى بالاسباب فكرى فيه بعقلك واستخيرى ربنا وخليكى فاكرة ربنا هيحاسبك عن رفضك ليه لو كان من غير سبب سبب حقيقى يا يارا غير انك رافضة تقتنعى ان خلاص عيسى مات
هنية :بقالنا سنة ونص سايبينك بنقول بكرة تنسى بكرة ترضى بقضاء ربنا انما لا انتى مصرة توقفى حياتك وتعترضى على قضاء ربنا ولو انتى هتغلطى احنا مش هنغلط ولا هنسيبك لنفسك
يارا :حضرتك اديتله ميعاد امتى يا بابا
كامل :بعد يومين
يارا :وانا هكون جاهزة وقتها بعد اذنكم
