حسن :ربعى رجلك يا علا
علا وهى بتربع رجليها :ميحلالكش الفرجة على التلفزيون غير وانت نايم على رجلى مع ان الركنة مخداتها كتيرة
حسن :رجلك احن
علا :احن من مخدات الركنة
حسن :لا احن من قلبك
علا :انا قلبى قاسى
حسن :انتى معندكيش قلب اصلا يا علا مش فاهم ازاى بس انتى معندكيش قلب معندكيش مشاعر حتى معندكيش تعبيرات على وشك مفيش غير تعبير واحد ثابت مبيتغيرش
علا :ولما انا فيا العبر كده عايش معايا ليه
حسن :علشان بحبك مش عارف هتفهمى الجملة دى ولا لا بس انا بحبك يا علا
علا :انا هقوم احط العشا انت اكيد راجع جعان
بعد شهر
علا :انت حرارتك مبتنزلش ليه انا اديتك الحقنة والادوية وعملتلك كمادات كتير حرارتك مبتنزلش ليه
حسن :
علا وهى بتمسك ايده وبتعيط :حسن قوم وابقى كويس انا خايفة ..انا خايفة اوى..خايفة عليك..وخايفة من غيرك..علشان خاطرى قوم ..اعمل ايه بس..انا هكلم امل..ايوه يا امل الحقينى
امل بصوت نايم :فى ايه يا علا
علا وهى بتعيط :حسن حرارته مبتنزلش ونايم ومش دريان بحاجة انا خايفة عليه انا سمعت كلامك واديته الادوية اللى قولتى عليها وعملتله كمادات بس حرارته مبتنزلش اعمل ايه
امل :اهدى يا علا الادوية هتاخد وقت على ما تجيب مفعول معاه متقلقيش هو دور برد وسخونية جامدين مش اكتر ميبقاش قلبك خفيف كده
علا وهى بتعيط :يعنى هو هيبقى كويس
امل :يا بنتى وهو واخد رصاصة على الاوفر اللى انتى فيه ده
علا :بعد الشر عليه يا..
حسن بتعب :علا
علا :حسن صحى سلام يا امل..ايوه يا حسن
حسن بتعب :انا عطشان
علا وهى بتديله المياه :خليك انا هسندك..لا متتعبش نفسك انا هشربك..اجبلك مياه تانى
حسن :لا خلاص..ايه ده انتى كنتى بتعيطى
علا :انا لا
حسن :والدموع اللى مغرقة وشك دى ايه
علا وهى بتمسح دموعها بايديها:مش جعان اجبلك شوربة
حسن :لا مش هقدر اكل
علا :خلاص هعملك حاجة سخنة واجى
بعد تلت ايام
علا :برضه مصر تروح الشغل ما تخليك فى البيت يومين كمان
حسن :لا مش هينفع كمان انا بقيت كويس
علا :طيب خدت الدوا معاك
حسن :اه
علا :فى مواعيد الدوا هكلمك افكرك تاخده خلى الموبايل جمبك ماشى
حسن بابتسامة :ماشى
بعد يومين
حسن وهو بينام على رجل علا :قوليلى يا علا لما كنت تعبان انتى كنتى بتعيطى ليه
علا :يا حسن مكنتش بعيط
حسن :متكدبيش يا علا كنتى بتعيطى انا شوفت دموعك على وشك وعيونك حمرا ومناخيرك كمان يعنى عيطى جامد اللى انا عايز اعرفه كنتى بتعيطى ليه مخضوضة من الموقف ولا خايفة عليا ولا ايه بالظبط
علا :مش خايفة عليك لا انا كنت مرعوبة
حسن :يعنى انتى كنتى بتعيطى علشانى تصدقى انا مكنتش متخيل انى فى حياتى هشوفك بتعيطى
علا :انا كمان متخيلتش انك هتشوفنى بعيط متخيلتش انى هعيط تانى لحد ما قولتلى انى معنديش قلب يومها دخلت المطبخ احضر العشا ولقتنى بعيط بعد تلت سنين منزلتش فيهم دمعة واحدة بسبب كلامك عيطت
حسن :مقولتلكيش كده علشان تعيطى انا قولتلك كده لانى تعبت انا حاسس انى عايش فى البيت ده لوحدى وانتى عايشة معايا من غير روح من غير قلب
لحد ما تعبت ولقيتك جمبى بتعمليلى كل حاجة بتأكلينى وبتشربينى ومهتمة بيا جامد اكتشفت ان جواكى حنية الدنيا كلها ومش فاهم مخبياها ليه
علا :علشان الحنية والطيبة مجابوليش غير وجع القلب يا حسن
جابتلى ايه حنيتى غير عياط كل يوم عملتلى ايه طيبتى غير ان كل اللى خوفت اكسر بخاطرهم فشفشو خاطرى مية حتة لحد ما قررت اتغير وبكفاية عياط ووجع لحد كده
اللى مش عاجباك دى مش طبيعتى يا حسن ده اللى كل اللى حواليا حولونى ليه غصب عنى مش بمزاجى فضلو يجو عليا يجو عليا لحد ما انفجرت بس مش فيهم انفجرت فى نفسى واتغيرت بقيت باردة جامدة معنديش قلب زى ما انت قولت مش مهم المهم انى مبقاش حد قادر يوجع قلبى ولا يكسر بخاطرى تانى مبقتش انام كل يوم وعياطى مغرق مخدتى مبقاش قلبى بيوجعنى
حسن :بس انتى عيطى لما قولتلك انك معندكيش قلب
علا :اتوجعت لما انت قولتلى كده قلبى وجعنى لما حسيت انك شايفنى كده انا مش كده الناس خلونى كده انما انا مش كده
عارف يا حسن انا كنت الطف حد فى حياتى واحن حد على نفسى ابويا من يوم ما وعيت على الدنيا مسافر بيشتغل بره وبيرجعلنا اجازات وامى راجل البيت فى غيابه فمش فاضية تحن على حد ولا تطبطب على حد واصحابى وقرايبى هما اللى كرهونى فى طيبتى وجعونى كتير لحد ما كرهت الوجع وكرهت طيبتى وقررت انى مش هتوجع تانى
لحد ما انت جيت شوفت فيك علا القديمة شوفت فيك قلب ابيض وروح طيبة بس زايد عليهم شخصية قوية بتعرف توقف كل واحد عند حده شخصية قوية تحمى القلب الابيض من الوجع انما انا شخصيتى كانت ضعيفة ولما قويت قسيت على الكل واولهم نفسى
بس انا مش عايزاك تشوفنى كده الدنيا كلها تشوفنى كده لكن انت لا
حسن :ليه انا لا
علا :علشان انا بحبك وجودك لغبطنى مبقتش حبا علا الجديدة وزودت حنينى لعلا القديمة ما هى اوقات بتوحشنى بس لو كنت فضلت علا القديمة مكنتش هعيش لحد ما تشوفنى ونتجوز يا حسن كان زمانى ميتة من كتر وجع قلبى وقهرتى على نفسى من عمايل الناس فيا
حسن :مش لازم تبقى علا القديمة لانها غلط زى ما قولتى القلب الابيض لازمله شخصية قوية علشان تحميه من الوجع وميموتش من القهرة بس كمان مينفعش تفضلى علا الجديدة اللى معندهاش قلب فى حياتك ناس تحبيهم وتديهم طيبتك وحنيتك يا علا زيى وزى ولادنا اللى ربنا هيكرمنا بيهم وزى اهلك الدنيا فيها الحلو والوحش وحرام تاخدى الحلو بذنب الوحش انا مستاهلش انك لما تحبينى تقوليلى انك بتحبينى انك تبينى لهفة عليا وخوف واشتياق
علا :تستاهل يا حسن انت اكتر حد يستاهل فى حياتى اقولك حاجة
حسن :قولى
علا :انت احسن حاجة حصلتلى فى حياتى يا حسن
حسن بابتسامة :مش يمكن ربنا عوضك بيا عن كل الوحش اللى شوفتيه واتوجعتى بسببه قبل كده مش يمكن ربنا رايد يقولك انى بحبك وحتى لو حواليكى ناس مش مقدرين طيبتك فانا مقدرها مش يمكن ربنا باعتنى ليكى سبب علشان تتغيرى للاحسن
علا بابتسامة :مش ممكن ده اكيد
حسن :متخليش الوحش اللى فى الناس يغيرك اوى كده يا علا ربنا بيحب الطيبين والمؤمن القوى خير عند الله من المؤمن الضعيف يعنى خليكى طيبة بس مش ضعيفة حبى الناس وساعديهم واللى ميستاهلش ابعدى عنه بس متبقيش قاسية على قلوب طيبة وبتحبك متبقيش شمال اوى بعد ما كنتى يمين اوى خليكى فى الوسط الوسط حلو اللى يحبك حبيه واللى يستاهل انك تديله على دماغه اديله على دماغه اتفقنا
علا بابتسامة :اتفقنا ..او يعنى هنتفق انا هحاول انفذ اللى انت قولته ده هحاول ابقى طيبة بس مش ضعيفة هحاول مبقاش قاسية ومعنديش قلب انما يبقى عندى شخصية قوية تحمى قلبى من الوجع هعمل زيك يا حسن هخليك قدوتى انا عايزة اتغير وعلشان كده اتكلمت معاك دلوقتى لانى عايزة اتغير انا مش مرتاحة وانا كده
حسن :لانك طيبة وحنينة وكنتى بتتصرفى عكس طبيعتك طبيعى متكونيش مرتاحة
علا :وانت هتساعدنى
حسن :هساعدك والاهم انك تساعدى نفسك ربنا بيساعد اللى بيساعدو نفسهم ربنا بيساعدهم وبيوفقهم
علا :وانا هساعد نفسى انى اتغير بس المرة دى هتغير للاحسن مش للاسوء زى المرة اللى فاتت
قسوة القلب تخلق من الطيبة جبروت كام قلب قاسى وحجر زمان كان مفيش اطيب منه بس من كتر ما اتوجع قسى
كام حد بارد زمان كان مفيش احن منه بس من كتر ما انكسر خاطره مبقاش يفرق معاه حاجة ولا يفرق معاه حد
الناس القاسية بيبقو زى الطاعون بيغيرو اللى حواليهم بيحولوهم لقاسيين زيهم
لما بتجيب اخرك بتنفجر بس ممكن انفجارك يكون جواك انت فيغيرك ويحولك لشخص تانى غيرك
متجيبش اخرك متسبش الناس تيجى عليك لحد ما تتغير وتبقى زيهم او حتى اسوء منهم
دافع عن نفسك متسيبش حد يكسر خاطرك ولو بالهزار اللى يقولك بهزر قوله مبحبش الهزار ده واللى يقولك كلمة تضايقك وقفه عند حده
الطيبة مش معناها انك تسيب الناس تظلمك وتوجعك ده كده ضعف مش طيبة
الطيبة انك تعامل الناس كويس وتعامل حلو اللى يستاهل انك تتعامل معاه حلو خليك فاكر انك مينفعش تعامل كل الناس زى بعض وفى ناس متستاهلش انك تتعامل معاهم اساسا
القلب الابيض نعمة من ربنا بس القلب الابيض لازمله شخصية قوية تحميه من الوجع والا كتر الوجع يقسيه ويحوله لقلب اسود فدافع عن نفسك واحميها علشان قلبك يفضل ابيض💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر
