شروق :يعنى هى بتخلى كريم يقول لمحمد حاجات كلها كدب علشان يتخانق معاكى
مش كفاية انها مرضيتش تاخده يعيش معاها علشان مش عايزة تشيل مسئوليته وهى امه
داليا :يمكن تكون وقتها عملت كده علشان تضغط عليه علشان يرجعلها
شروق :اسخم واسوء
يعنى ترمى ابنها علشان تجبر ابوه يرجعلها
بتستغله وعاملاه كارت ضغط
دى لا يمكن تكون ام
دلال :انا مش صعبان عليا غير كريم
الولد كل اللى عايزه يرجع تانى يعيش بين ابوه وامه
شروق :انتى عايزة تشلينى
ابوه ده اللى هو جوزك
وامه دى اللى كانت مسودة عيشت محمد لحد ما خلته طلقها وبقى يطيق العمى ولا يطيقها
هتعملى ايه انتى بقى هتطلقى منه علشان يرجعلها ولا هتخليه يتجوزها عليكى قولى قولى واشجينى
دلال :ولا دى ولا دى
محمد مستحيل يرجعها على ذمته انا ساعات بحس انه متضايق من وجود كريم فى الدنيا علشان مخليه غصب عنه فى علاقة بينه وبينها لانها ام ابنه
داليا :اكيد مش لدرجة متضايق ده ابنه فى الأول وفى الأخر بس هى فعلا انسانة لا تطاق مش فاهمة محمد اتجوزها ليه اصلا
دلال :كان بيحبها هى فى الأول عرفت تخليه يحبها وميركزش مع عيوبها مراية الحب كانت عامية
شروق :واهى بعد الجواز كسرت مراية الحب دى فوق دماغه وخلته يشوفها على حقيقتها
عايزة ايه انتى بقى
داليا :اهدى يا شقاوة مش كده
شروق :لا اركنى انتى شوية يا دودو مش وقت دبلوماسيتك
علشان انا عايزة اعرف اخرها ايه ناوية على ايه
دلال :مش ناوية على حاجة يا شروق
انا من امتى كان فى ايدى حاجة اعملها
شروق :لا طبعا فى ايدك ده جوزك دافعى عن حقك فيه كلى اللى يفكر يقرب منه باسنانك
دلال :اكل مين باسنانى اكل كريم الطفل اللى عنده خمس سنين
ليه علشان بيكرهنى ما طبيعى يكرهنى مش فاهم انى خدت ابوه من امه
ده حقه
شروق :انتى مخدتيش ابوه من امه ابوه مطلق امه من سنتين
ابوه اللى اكبر منك بعشر سنين ومطلق وعنده ابن
ابوه اللى انتى كتير عليه مكنش املة ابوه علشان تاخديه من امه
دلال :ده طفل يا شروق مش هيستوعب كل ده
هو كل اللى يعرفه انه لولايا كان زمانه عايش مع ابوه وامه هى مفهماه كده
داليا :دلال معاها حق
ده طفل وطبيعى هيصدق امه
وانتى عايزاها تعمل ايه يا شروق
تعامله وحش علشان يكرهها اكتر
شروق :تعرف محمد باللى بيحصل ده
دلال :وهو يعنى مش عارف
ما هو اكيد عارف بس علشان انا ساكتة هو عامل انه مصدقه ومريح دماغه
ولو كدبته واثبت انه اللى بيقوله مش حقيقى هيزعقله ويمكن يضربه وانا مش عايزاه يعمل فيه كده
كريم بجد صعبان عليا
داليا :ومحمد مش صعبان عليكى
دلال :لا لأن محمد اختارها يا داليا انما كريم لا اختارها ولا اختاره
الولد كل اللى عايزه بيت طبيعى يعيش فيه مع ابوه وامه
شروق :الولد اللى بتتكلمى عنه ده عمره ما كان عايش فى بيت طبيعى بين ابوه وامه
لأنهم كانو دايما بيتخانقو لأن امه عمرها ما عرفت تكون زوجة ولا عرفت تكون ام
لو كان فضل عايش معاهم كان هيطلع معقد بسببهم
دلال :عارفة وعلشان كده هو صعبان عليا اكتر
لأن عمره ما كان عايش عيشة طبيعية بين ابوه وامه وعمره ما هيقدر يعيش عيشة طبيعية بينهم
لا هى بتضحى علشانه ولا محمد بيضحى علشانه الإتنين بيضحو بيه بمنتهى السهولة
داليا :محمد استحمل سنين علشان كريم
هو كان طلقها وردها لما عرف انها حامل
تلت سنين استحملهم علشانه
دلال :كان لازم يستحمل اكتر كان لازم يستحملها العمر كله علشان ابنه
شروق :لا انتى كده ظالمة محمد
حتى لو هى اختياره واختياره طلع غلط
مينفعش يعيش بقية حياته بيدفع تمن اختيار واحد غلط فى حياته
ولا ينفع يكمل معاها وهى بالشكل ده علشان كريم لأن لو طلاقهم اذاه فوجودهم سوا كان هيأذيه اكتر
دلال :ده طفل يا شروق كل اللى عايزه ابوه وامه
داليا :لو دلوقتى مش هيتأذى بكرة هيتأذى يا دلال مينفعش يكبر وهو شايف ابوه وامه بيهينو بعض وحياتهم كلها خناق كده هيطلع معقد
دلال :وهو دلوقتى هيطلع رائد فضاء ما هيطلع معقد وكارهنى وكاره ابوه اللى طلق امه وحرمه منها
شروق :بكرة يكبر ويعرف ان هى اللى رفضت تاخده يعيش معاها
دلال :فيتعقد اكتر واكتر
يا رب ما يفهم يا رب يفضل كده
داليا :مسيره يكبر ويفهم يا دلال وكمان يفضل كده اللى هو ايه
كارت فى ايد امه بتلعب بيه علشان تخرب بيتك علشان مفكرة ان محمد كده ممكن يرجعلها
وده مستحيل يحصل لأن محمد عنده انه يموت اهون من انه يرجع يعيش معاها فى بيت واحد
فحتى لو بيتك اتخرب محمد مش هيرجعلها
وابنها اللى هى بتستغله ده مش هتاخده يعيش معاها وهيرجع تانى يعيش معاكم فى بيت عمك وكل واحدة فى البيت تحن عليه شوية وبعدين يتجوزو وميفضلش غير مرات عمك اللى مش هتقدر تهتم بيه
وساعتها اصلا انتى هيكون وضعك ايه هتعيشى فى بيت فيه طليقك
ولا هيروح محمد يعيش فى مكان تانى
ولا هيتجوز تالت ويا عالم اللى يتجوزها تعامل كريم ازاى
دلال بحزن :لا انا ليا مكان اروحه ولا كريم كمان
علشان كده انا مش ممكن ائذيه مستحيل اكون السبب فى انه يحصله حاجة تزعله
شروق :يا حبيبتى انا مش عايزاكى تزعليه وهو والله صعبان عليا ونفسى امسك جيهان دى ارنها علقة واقولها مش قد الجواز بتتجوزى ليه مش عايزة ولا عارفة تكونى ام بتخلفى ليه
وازاى يا عديمة الدم والاحساس تستغلى ابنك بالشكل ده
بس كريم لازم يفهم ان اللى بيعمله غلط
دلال :الوضع اللى كريم فيه كله غلط فى غلط مجتش على اللى هو بيعمله
انا مش هعمل حاجة تخليه يكرهنى اكتر من كده مش هصعب حياته اكتر ما هى صعبة
داليا بتأثر :مش عارفة اقولك ايه
بس انتى جميلة اوى يا دلال وطيبة يا ريت كنتى انتى اللى امه مش هى يا ريت مكنتش دى حياته
دلال :ويا ريت مكانتش دى حياتى
