فاطمة :عايزة ايه يا عاليا جاية ليه
عاليا :كده برضه يا عمتى زعلانة انى جيت امشى يعنى
فاطمة :بنت احمد متلفيش وتدورى مادام جيتى من الجامعة عليا يبقى وراكى موضوع وموضوع كبير فهاتى من الاخر وقولى فى ايه
عاليا :وادى عيب ان عمتك تبقى فهماكى وعرفاكى من غير ما تتكلمى
طيب هو بصراحة انا محتارة وعايزة اتكلم معاكى فى اللى محيرنى
فاطمة :وانتى ايه اللى محيرك
عاليا :هو انا غلطت لما وافقت على عمر وهو دبلوم وانا فى الجامعة
فاطمة :لا انتى غلطتى علشان وافقتى عليه علشان ظروفة المادية كويسة جدا وشكله حلو
عاليا :ما هى دى حاجات مهمة يا عمتى
فاطمة :هى حاجات مهمة مقولتش حاجة بس فى حاجات تانية مهمة برضه انتى مفكرتيش فيها
عاليا :زى ايه
فاطمة :زى التوافق زى التفاهم زى الاهتمامات المشتركة زى الاحترام والتقدير زى الحب
عاليا :ومين قال ان الحاجات دى مش موجودة بنا
فاطمة :وهى لو موجودة كنتى احتارتى
عاليا :انا محتارة علشان فرق التعليم
فاطمة :لا يا عاليا انتى محتارة علشان المعاملة مش عاجباكى
هو خدك علشان انتى فى كلية علشان تبقى خطيبته فى كلية وانتى خدتيه علشان شكله حلو والبنات هيحسدوكى عليه
ده اساس ضعيف مينفعش تتبنى عليه علاقة المفروض تستمر العمر كله
عاليا :ما انتى اتجوزتى عمى طه وهو معاه اعدادية وحتى مش دبلوم
فاطمة :وانتى بتقارنى عمك طه بعمر
عاليا :يفرق ايه عنه
فاطمة :لا الفرق كبير فرق السما من الارض بين عمر وعمك طه
وفرق السما من الارض اكتر بينك وبينى
لا هو يطول يبقى عمك طه ولا انتى زيى يا عاليا
عاليا :نفرق ايه عنكم
فاطمة :انتو وافقتو ببعض علشان تتباهو ببعض هو يتباهى انه خد واحدة فى كلية وهو دبلوم وانتى تتباهى بخطيبك اللى شكله حلو اللى معاه فلوس كتير وبيجبلك اللى انتى عايزاه
انما انا وعمك طه اتجوزنا علشان نود بعض ونرحم بعض علشان نكون سوا فى الحلوة والمرة مش فى الحلوة بس يا بنت اخويا
عاليا :ما تحكيلى حكايتكم من الاول
فاطمة :مش كنتى جايالى علشان انتى تتكلمى وانا اسمعك
عاليا :غيرت رايى اتكلمى انتى وانا هسمعك
احكيلى من الاول بقى وبالتفصيل لانى بحب التفاصيل جدا
فاطمة :طه كان فاتح سوبر ماركت فى شارعنا منين ما كنت انزل من بيتنا واعدى من قدامه احس بعينيه متابعانى حتى لو مش شيفاه فانا حاسة بعيونه ورايا لحد ما يختفى طيفى عنه
بس هو عمره ما فتح بؤه معايا بحرف واحد
وانا فى اول سنة فى الجامعة اتقدملى وانا رفضت بس جدك الله يرحمه علشان كان بيحب طه قاله ان لسه بدرى عليا
بعدها بسنة رجع تانى كرر طلبه وبرضه رفضت وجدك قاله انى مش عايزة حاجة تشغلنى عن دراستى
بس هو استسمح جدك فى انه يتكلم معايا بنفسه وجدك وافق
عاليا :علشان يقولك انه مش هيشغلك عن دراستك
فاطمة :كنت مفكرة زيك كده
بس لما جه واتكلمنا اكتشفت انه عارف انا برفضه ليه
عاليا :هو قالك ايه بالظبط
طه :بصى انا لا هلف ولا هدور ولا عايزك تقوليلى كلام مزوق علشان متزعلنيش
انا عارف انك مش رفضانى علشان خايفة اشغلك عن مذاكرتك وانك لو كان اتقدملك مهندس ولا دكتور ولا مدرس كنتى قبلتى بيه
وحقك انتى تستاهلى احسن واحد فى الدنيا وانا عارف انى مش احسن واحد فى الدنيا
عاليا :انت انسان كويس يا طه راجل وجدع وابويا بيحبك وبيشكر فيك وفى اخلاقك
طه :انما حاكم كلامك الحلو ده اكيد هيجى وراه انما
عاليا :انما احنا مننفعش بعض
طه :ليه انا هسيبك تكملى علامك فى كليتك ولو عايزة تشتغلى بعدها انا موافق
عاليا :مش فكرة تعليم وشغل
طه :اومال ايه لما انا محترم وراجل وجدع وهسيبك تكملى علامك وتشتغلى حتى لو عايزة وقادر افتح بيت واكفيه واخلى مراتى مش ناقصها اى حاجة يبقى انتى رفضانى ليه
علشان العلام علشان مكملتش علامى زيك هو بمزاجى انا غصب عنى مكملتش اهلى مشافوش ان العلام له لازمة كفاية اكون بعرف اقرء واكتب واعد الفلوس
بس انا عارف ان العلام حلو وكنت اتمنى اكمل تعليمى وان شاء الله ناوى اعلم عيالى احسن علام ناوى اخليهم احسن ناس فى الدنيا واوصلهم اعلى المراتب
فاطمة :ان شاء الله تقدر تعمل ده
الحكاية مش حكاية تعليم يا طه
الحكاية حكاية تفاهم وان يكون فى بنا لغة حوار نتكلم بيها سوا
طه :وانتى كان حد قالك انى مبعرفش اتكلم
فاطمة :لا مش كده بص تخيل لو قعدت مع واحد امريكانى هتعرف تتكلم معاه
طه :لا
فاطمة :ليه
طه :علشان انا مبعرفش اتكلم امريكانى
فاطمة :بالظبط مفيش بينكم لغة حوار تتفاهمو بيها سوا
طه :بس انتى مبتتكلميش امريكانى انتى بتتكلمى مصرى زيى
فاطمة :بس افكارنا مش واحدة احلامنا مش واحدة يا طه مش هيكون فى مواضيع مشتركة نتكلم فيها سوا ولو جربنا نتكلم هنلاقى ان ليك دماغ وانا ليا دماغ تانية خالص هيبقى كل واحد فينا عايش فى ملكوته لوحده مع اننا عايشين فى بيت واحد
طه :شكلك عندك حق فى حكاية لغة الحوار اللى قولتى عليها دى
كلامك كبير عليا مش فاهم نصه
كل اللى فهمته انك عايزة واحد تتكلمى معاه وانك مش هتعرفى تتكلمى معايا
وانك مش شبهى ولا انا شبهك
عاليا :كده يبقى انت فهمت كل اللى انا اقصده من كلامى
طه :لا ما هو انا بعرف اشغل عقلى برضه وعندى مخ مش فردة جزمة
فاطمة بحرج :انا مكنش قصدى
طه :ولا قصدك مش فارقة
عموما ربنا يرزقك باللى تعرفى تتكلمى معاه
فاطمة :ويرزقك باللى تستاهلك وتقدر تسعدك
طه :قولتلك خلاص مبقتش فارقة اقوم انا امشى اكيد وراكى مذاكرة انا معطلك عنها
سلامو عليكو
فاطمة :وعليكم السلام
