جميلة :انا زهقت ما تيجو نطلب اكل
حلا :ايه علاقة الاكل بالزهق لا بجد ايه علاقة الاكل بالزهق
ايه علاقة الاكل بمشاعرك
ليه دايما بتربطى كل مشاعرك بالأكل
فرحانة بتاكلى مضايقة بتاكلى مش عارفة مالك برضه بتاكلى
جميلة :كنت عايزة اتعب نفسى وافكر فى رد لسؤالك
بس افتكرت حاجة مهمة وهى انى مش باكل من تلاجتكم
ولا باخد منك مصروف فمش مضطرة ارد على رخامتك دى لا
حلا :مش ترخيم والله انا بجد مش فاهمة سر حبك ده للاكل
زين :عادى زى ما انتى مبتحبيش الاكل وبتاكلى علشان تعيشى علشان متعيشيش على المحاليل
ربنا خلقكم كده دى طبيعة كل واحدة فيكم
الاء وهى بتضحك :ربنا رزقنا باتنين عكس بعض
واحدة بتاكل اى حاجة قابلة للأكل فى الدنيا
وواحدة بتاكل بالعافية ولو عليها تعمل بناء ضوئى زى النباتات
حلا : الموضوع اكبر من كده جميلة بتعبر عن مشاعرها بالأكل
غريبة بجد
جميلة :على الاقل بعبر عن مشاعرى مش زى ناس
زين :اه بدءنا نخبط فى بعض وهتتخانقو
لا الله يباركلكم انا مش ناقصنى خناق
انا ومحمد متخانقين قبل ما ينزل وانا على اخرى اصلا
ومش مانعنى اطلق منه غير انى مش عايزة ابعد عنكم
هتتخانقو هتطلق منه وهطفش ومش هتعرفولى طريق
حلا وهى بتضحك :ايه كلام الأمهات ده
جميلة وهى بتضحك :قلبتى على ماما اوى فعلا
ويا ترى فى الاخر هنلاقيكى عند خالتى
كريتيف جدا المكان بتاع كل مرة ده
الاء وهى بتضحك :اديهم هيحلوو عليكى يا زنزون
زين وهى بتضحك :يا ستى مش مهم يحلوو عليا بس ميتخانقوش انا قرفانة لوحدى وحقيقى مكتئبة
الاء وهى بتبص على الشقة :باين على الشقة
نضيفة ومترتبة وريحتها حلوة لسه ماسحة صح
جميلة :والمطبخ بيبرق وانا بعملى سندوتشين على ما تيجو لاحظت ان المطبخ فلة ومفيهوش مواعين والثلاجة متروقة
زين :غسلتها
حلا :غسلتيها
زين :اه وغسلت شوية هدوم بسيطة كده ونشرتهم
بس معملتش اكل
جميلة وهى بتضحك :ليه ما كنتى عملتى الاكل بالمرة
وخدتى حيطان الشقة وشين بياض
زين وهى بتضحك :انتى بتتريقى على اكتئابى يا جذمة
جميلة :بالعكس انا بحسدك عليه
اكتئابك اكتئاب منتج ما شاء الله عليكى
انا بكتئب مببقاش قادرة اعمل حاجة
حتى الصلاة بجبر نفسى اصليها علشان مبقاش مقصرة فى عبادتى
علشان اكتئابى ميزيدش لسبب كمان وهو انى مبعملش الحاجة اللى ربنا خلقنى علشانها وهى انى اعبده
انتى متخيلة اكتئابى بيخلينى عاملة ازاى مكسلة اتحرك ادخل الحمام حتى
انتى عارفة والله العظيم ساعات ببقى مكسلة استحمى
ممكن أفضل يومين بقنعنى ادخل اخد دوش
علشان مبقاش مكتئبة وكمان معفنة
الاء :انا فهماكى جدا
انا ساعات ببقى كده
واهلى مبيفهموش انى كده مضايقة ومخنوقة ومش طايقة نفسى وبيزعقولى علشان مبساعدش فى شغل البيت ومبقعدش معاهم وقتها
فببقى مكتئبة ومتهزقة كمان
جميلة :فى اهل ميعرفوش يعنى ايه تكونى مكتئبة ومعندكيش طاقة لأى حاجة ولا لأى حد
طول ما وجعك مش عضوى تاخديله برشام ولا حقن
يبقى انتى زى الفل وبتدلعى وقومى يلا روقى الشقة واغسلى المواعين
حلا :ايوه بالظبط
تصدقى علشان الكلمتين العاقلين الحلوين دول يلا نطلب
كلامك كيفنى وجوعنى كمان تخيلى
جميلة وهى بتضحك :دى اقل حاجة عندى
ها بقى هنطلب ايه
