مروة :بس انتى غلطانة يا امل
امل :غلطانة ليه بقي
مروة :انتى كده خانقة احمد مش بتحبيه انتى مبتعمليش حاجة في حياتك من غيره وعايزاه هو كمان ميعملش حاجة من غيرك وده غلط لازم يكون في حياتك حاجات تانية غيره وهو كمان مينفعش حياتك كلها تبقي قايمة علي شخص واحد بس كده انتى هتستنى منه هو بس كل حاجة وهتديله هو بس كل حاجة
امل :بس انا بحبه يا مروة احنا كتبنا كتابنا من شهرين وخلاص فرحنا كمان شهر او شهرين بالكتير انا بقيت مراته وهو جوزى وده حقي عليه
مروة :حقك عليه ايه بس انه يبعد عن صحابه زى ما انتى بعدتى عن صحابك يبقي بيفكر فيكى من اول ميصحى لحد ما ينام ويبقي كل كلامه عنك حتى مع اهله زى ما انتى بتعملي لحد ما قربنا نكرهه
ده غلط الاهتمام الزايد ده غلط الشجرة بتموت لو مسقينهاش بس كمان ممكن تموت لو زودنا المياه جامد واحنا بنسقيها قلة الاهتمام غلط بس كمان كتر الاهتمام غلط وبيخنق
امل :كلامك صح بس انتى محبتيش قبل كده متعرفيش يعنى ايه تبقي بتحبي حد وعايزاه يبقي كل حياتك
مروة :حتى لو محبتش
كلامى ده عن علاقتك باحمد او بينا كأهلك او بصحابك حياتك لازم يبقي فيها حاجات كتير بتعمليها وفيها ناس كتير انما انك تعتمدى علي شخص واحد بس هيخنق الشخص ده ويحمله فوق طاقته وكمان هيخليكى ضعيفة من غيره ودايما محتاجاه كأنه ادمان والمدمن بيكون دايما ضعيف يا امل متبقيش مدمنة حد مهما كان هو مين
جنى بتريقة :وانتى بقا بتتكلمى بصفتك اشطر واذكى واحدة فينا وفي الدنيا كلها صح
مروة :لا بتكلم بصفتى اختها يا جنى وبنصحها علشان يهمنى انها تكون مبتغلطش لا في حق احمد ولا في حق نفسها
جنى :وتنصحيها بناءا عليه وانتى عمرك ما حبيتى ولا عندك صحاب ولا حتى صاحبة واحدة بس منين هتجيلك الخبرة علشان تنصحيها او تنصحى اي حد
مروة :من الحياة يا جنى وانتى عيب ومينفعش تتكلمى بالطريقة دى لان اولا انا اختك الكبيرة ثانيا امل هى اللي طلبت نصيحتى وهى اللي تحدد اذا كان كلامى صح وتعمل بيه ولا لأ
فيكون احسن لو مدخلتيش نفسك في حوار ميخصكيش
انا مروة عندى واحد عشرين سنة رابع سنة كلية صيدلة امل وجنى يبقو اخواتى امل اختى الكبيرة وجنى اختى الصغيرة
معنديش صحاب خالص زى ما جنى قالت وعمرى ما حبيت زى ما هى وامل قالو بس كلام امل مضايقنيش اللي ضايقنى كلام جنى لانها قاصدة تضايقنى بيه
كلامها مش بس ضايقنى ده وجعنى سيبتهم ونزلت الجنينة لانى مكنتش متحملة افضل قدام جنى دقيقة واحدة
نزلت الجنينة لقيت مازن ابن عمى قاعد فيها كده كملت مازن بيكرهنى اوى مش عارفة ليه بس هو بيكرهنى فعلا بيكرهنى وقفت مش عارفة اروح فين انا مش عايزة اطلع شقتنا تانى ومش عارفة اقوله يمشي هو لانى عايزة اقعد هنا شوية وفي وسط افكارى دى لقيته بيتكلم
مازن بتريقة :مالك يا فلتة زمانك شكلك مضايق ليه
ايه في امتحانات الميد تيرم مقفلتيش نقصتى نص درجة ولا حاجة
كلامه فكرنى بكلام جنى فضلت ساكتة وماسكة نفسي انى اعيط وانهار قدامه
مازن :ساكتة ليه الموضوع كبير ها منقصتيش نص درجة نقصتى درجة كاملة لا مش معقول
مروة وهى بتعيط :هو انا معنديش قلب كلامكم ده يوجعه ايوه مفيش في حياتى حاجة غير الدراسة ومعنديش صحاب مفكرتوش ان دى حاجة خنقانى انا وحيدة انا وحيدة لدرجة انى بعيط وبقول انى وحيدة لابن عمى اللي بيكرهنى لانى معنديش حد احكيله واشكيله معنديش حد خالص
مازن بتوتر :انتى بتعيطى ليه انا مكنش قصدى انا..
مروة :مازن لو سمحت ممكن تمشي انا محتاجة ابقي لوحدى وفعلا معنديش مكان تانى غير هنا لو سمحت ارجوك امشي
مازن وهو بيطلع من جيبه علبة مناديل وبيحطها جنبها :تمام انا همشي
