هند :مبروك الخطوبة
علياء :الله يبارك فيكى
هند :شوفت الصور اللى كنتى منزلاها حالات على الواتس فستانك كان جميل والصور تحفة هو خطيبك بس هو اللى يعنى
علياء :سكتى ليه يعنى ايه
هند :انتى احلى منه
علياء :طيب ما ده الطبيعى مش انا البنت
هند :لا قصدى انه تخين حبتين مش كنتى استنيتى لحد ما تلاقى واحد ارفع شوية
علياء :معلش اصله كان نازل عليه sale انتى محسسانى انك بتكلمينى عن بلوزة ولا فستان ليه
هند :انا كل قصدى انى لو مكانك مكنتش وافقت بيه
علياء :وانتى مش فى مكانى وهو متقدملكيش ولا عبرك من اصله
هند :انتى شكلك زعلتى انا كل اللى بقوله انك تستاهلى واحد احسن منه
علياء :هو احسن واحد فى الدنيا
هند :خلاص اللى يريحك
علياء :ما هو طبعا اللى يريحنى اومال اللى يريحك انتى
هند :مش اسلوب ده انا بس بقولك رايى
علياء :ورايك ده انا مطلبتوش ولا يلزمنى اعرفه فتقدرى تحتفظى بيه لنفسك
هند :انا همشى ده انتى لا تطاقى
علياء :انا برضه عموما ماشى سلام
مروان :تفتكرى هى معاها حق
علياء بخضة :يا نهار ابيض ده انا نسيت انى بكلمك فى الموبايل انت سمعت كل اللى هى قالته
مروان :اه تفتكرى هى معاها حق فى اللى قالته
علياء :لا طبعا هى معهاش حق
مروان :انتى متستاهليش حد احسن منى
علياء :انت احسن واحد فى الدنيا
مروان :انتى شايفة كده فعلا
علياء :ايوه طبعا انتى فكرتنى بقول كده علشان اسكتها وخلاص لا انا مبقولش غير اللى مقتنعة بيه واللى فى قلبى على لسانى
مروان :يعنى انتى قلبك شايف انى احسن واحد فى الدنيا
علياء :اه
مروان :تعرفى انتى اللى احسن بنت فى الدنيا وتستاهلى احسن واحد فى الدنيا زى ما هى كانت بتقول
علياء :متاخدش على كلامها هند ده طبعها مش فى حكاية خطوبة بس لا فى اى حاجة لو شافت واحدة لابسة فستان مهما كان حلو هتنتقدها تقولها مثلا لونه مش لايق عليكى مبينك تخينة مبينك رفيعة كده يعنى
كأن محدش بيعرف يلبس ولا يختار غيرها ومحدش حلو ولبسه بيليق عليه غيرها
مروان :ايه ده يا ساتر مصحباها ازاى دى
علياء :لا احنا مش اصحاب مننفعش اصحاب
هى بس تعرفنى وجربت تقولى اللى بتقوله للبنات على لبسى ومع انى كل مرة بكشملها وبرد عليها رد يخرصها الا انها مبتحرمش ومبتبطلش تعلق على حاجات تخصنى
وادينى كل مرة بقولها اللى فيه النصيب ومبخليش فى نفسى حاجة
يكش تفهم انها مش اخر حتة من نوعها وتتعامل عادى مع خلق الله
مروان :سيبك من كل ده المهم انك شايفة انى استاهلك
علياء :ايوه طبعا
بعد تلت شهور
مروان :علياء انا اسف
علياء :اسف على ايه على انك عرفت واحدة تانية وانت خاطبنى
ولا اسف على انك قولتلها نفس الكلام الحلو اللى بتقولهولى ويمكن قولتلها هى كلام اكتر
ولا اسف على انك كنت بتشتم عليا معاها علشان تبينلها انك تعيس وتعبان معايا علشان قال يعنى متحسش انك واحد خاين بيخون خطيبته بمزاجه
انت مفكر انها صدقت اللى قولتهولها عليا انت مفكر انها مش عارفة انك بتكدب عليها
اسف على انك خونتنى ولا اسف على انك قليت منى وهنتنى ولا اسف على انك غدرت بيا وطعنتنى فى ضهرى وانا مديالك الامان اسف على ايه ولا على ايه يا ابن خالتى
مروان :
علياء :ما ترد اسف على ايه فى دول
مروان :اسف على كل دول انا مش عارف انا عملت كده ليه او ازاى هى ازاى عرفت تخلينى اعمل كده
علياء :عرفت تستغل قلة ثقتك بنفسك وانك مهتصدق ان واحدة زيها تبصلك وتبينلك اهتمام هتجرى جرى عليها
انت مفكر انها بتحبك طيب ما انت قدامها بقالك كتير هى مبصتلكش غير لما بقيت خاطب اصل فى بنات كده بتحب تاخد المرتبط النقص اللى فيها بيرتاح لما بتعمل كده
هى مبعتتليش صور للشات اللى بينكم علشان بتحبك هى بعتتهملى علشان اسيبك فتحس هى بالانتصار
مروان :بس انتى مش هتسيبيها تنتصر عليكى صح
علياء :لا طبعا مش هسيبها تنتصر عليا
مروان :الحمد لله يعنى انتى مش هتسيبينى
علياء :بالعكس انا علشان انتصر عليها هسيبك علشان تعرف هى بنفسها انك مش فارقلى وانك اصلا مش مكسب لاى حد
وعلشان انت تعرف انك بعت الغالى بالرخيص
مروان :لا بالله عليكى متعملى كده انا اسف والله العظيم انا اسف
علياء :اسفك مش مقبول ولا فارقلى ولا يلزمنى اسفك انت نفسك لا فارقلى ولا تلزمنى
روح قولها علياء بنت خالتى اللى مبقتش خطيبتى بتقولك مبروك عليكى
مروان :علياء متضيعيش اللى بنا علشان غلطة
علياء :غلطة انت شايف ان كل اللى عملته ده غلطة
ماشى اقولك كل اللى انت عملته ده غلطة وانت متستاهلش انى اعديها واسامح وانسى
مروان :علياء علشان خاطرى متهديش اللى بنا
علياء :مبقالكش خاطر عندى واللى بنا انت اللى هديته وخليته بسوى التراب
مروان :قولتلك انى اسف اعمل ايه اكتر من كده
علياء :متعملش لان مفيش حاجة هتعملها هتفرقلى ومتتاسفش لانى مش قابلة اسفك
امشى يا مروان امشى وانسى انى كنت فى يوم اكتر من علياء بنت خالتك
