حد فيكم يعرف الحكمة العظيمة اللى بتقول
" الأسوء من ان لا تحصل على ما تريد هى ان تحصل عليه "
محدش فيكم يعرفها
عادى محدش يعرفها غيرى اصلا لأن انا اللى مألفاها
انا اتجوزت الإنسان اللى بحبه
ودى كانت أكبر غلطة انا عملتها فى حياتى
وكانت اسوء حاجة حصلتله هو فى حياته
طبعا عايزين تعرفو ليه هحكيلكم
منذر :تقدرى تنامى انتى فى الأوضة اللى المفروض انها اوضتنا وهنام انا فى اوضة الأطفال
وبعد ما تخلص زيارات اهلنا واصحابنا لينا هننقل حاجتى لأوضة الأطفال
نيللى :ليه
منذر :علشان لو نقلناها من دلوقتى وحد شافها هيسألو ليه وهيستغربو
نيللى :لا انا قصدى ليه ننقلها اصلا
وليه مننامش فى اوضة واحدة
منذر :انتى عبيطة ولا بتستعبطى
انتى مفكرة اننا زينا زى اى اتنين متجوزين
ده انا مش طايقك اصلا ولولا بابا ولولا عمى الله يرحمه
كان زمانى دافنك فى تربة على اللى عملتيه
غورى من وشى يا نيللى انا حتى وشك مش طايق اشوفه
وسابنى ودخل اوضة الأطفال
وانا دخلت اوضتنا اللى هو عايزها تبقى اوضتى لوحدى غيرت الفستان وفردت شعرى ورشيت برفان
وفضلت اقلب فى الهدوم اللى جيبتها للجواز لحد ما لقيت اللى هيجيب من الأخر وهيخليه يسامحنى على اللى عملته
ورغم انى كنت مكسوفة وانا ماسكاه فى ايدى
علشان مفتح من كل حتة ومفيهوش حتة قماش ماسكة اختها
كله نقر وفتحات تهوية
الا انى لبسته ومبصتش فى المراية علشان لو شوفت شكلى بيه هتكسف ومش هروحله وانا لبساه
شجعت نفسى وعديت من واحد لعشرة وخبطت على باب اوضة الأطفال اللى هو قرر انها هتكون اوضته
منذر :فى ايه
نيللى :ممكن...ممكن ادخل
منذر :شكلها ليلة مش فايتة...ادخلى
نيللى وهى بتفتح الباب :انت مش...انت مش جعان مش هتتعشى
منذر وهو بيبصلها من فوق لتحت :ايه اللى انتى عاملاه فى نفسك ده
مش كفاية رخص بقى
المفروض يعنى انى لما اشوفك كده اضعف ويحصل اللى انتى عايزاه مش كده
بس هو حتى لو حصل اللى انتى عايزاه
تفتكرى ده معناه انى بحبك وشايفك مراتى وسكنى وحلالى وكل الكلام الحلو ده
لا هيبقى معناه انى شوفت واحدة من غير هدوم جيالى لحد عندى تعرض عليا نفسها وافتكرت انها مراتى يعنى مش حرام اعمل معاها اللى انا عايزه فقولت لنفسى مش مشكلة
بس حتى لو مش حرام فانا مش عايز
عارفة ليه علشان انتى مش مالية عينى انا مش شايفك ست اصلا
اللى لبساه ده حلو بس علشان انتى اللى لبساه فانا قرفان منه ومنك
لو تشوفى نفسك بعيونى هتكرهى نفسك بجد
انا مش شايفك ست يا نيللى
فمتفكريش ان الحركات دى هتجيب معايا نتيجة
انا كده هقرف منك اكتر وهشوفك رخيصة اكتر واكتر
نيللى وهى بتحاول تاخد نفسها وتتكلم :انا...انا اسفة
منذر :اطلعى بره
وطلعت بره رجعت الاوضة وفضلت اعيط
انا عملت كل اللى عملته ده علشان نبقى سوا علشان يحبنى
وفى اول ليلة لينا سوا تحت سقف واحد بدل ما اشوف فى عيونه شوق ورغبة وحب
مشوفتش غير قرف ونفور وكره
انا كده بحكيلكم اول يوم جواز لينا ومحكتلكوش بداية حكايتنا استنو هحكيلكم من الأول
انا نيللى عندى اتنين وعشرين سنة منذر يبقى ابن عمى
عايشين فى نفس البيت شقة فيها جدى وستى وشقة لينا انا وامى واخواتى لأن بابا الله يرحمه مات من تلت سنين وشقة لعمى احمد ابو منذر وشقة لعمى محمد وولاده
طول عمرى بحبه وهو عمره ما شافنى غير اخته الصغيرة
او اخته الصغيرة اوى لأنه أكبر منى باتناشر سنة
انا مش شايفة انهم كتير انا بحبه هو لا عايزة واحد من سنى ولا عايزة واحد اكبر منى بسنتين تلاتة
انا بحب منذر وبس
ورغم انى بحبه اكتر من نفسى الا انى عمرى ما قدرت اعبرله عن حبى ده
لا عرفت اقوله انى بحبه ولا عرفت الفت نظره ليا
فضلت سنين بحبه فى صمت لحد ما لقيت ان جدى وستى عايزينه يتجوز منة بنت عمى محمد
هى اصغر منه بخمس سنين هما شايفين ان سنها كبر ولازم تلحق تتجوز وتخلف
ومنذر كمان كبر ولازم يلحق يعمل بيت وأسرة
وقتها انا كنت هتجنن يعنى ايه منذر يتجوز واحدة غيرى يعنى ايه منذر يحب واحدة غيرى
طيب وانا
انا اللى بقالى سنين بحبه وبتمنى يحبنى ولو ربع ما بحبه
قبل ما يحصل اللى انا خايفة منه ومنذر يتجوز منة
قررت انى هتصرف
واتصرفت ويا ريتنى ما اتصرفت
يا ريت متكرهونيش بعد اللى هحكيه ده
انا والله مش وحشة اوى كده
انا بس كنت غبية ومعرفتش افكر ولا اتصرف صح
وبحبه وعلشان بحبه عملت كده مكنتش هستحمل يبقى لواحدة غيرى والله ما كنت هستحمل كنت هموت من الغيرة
ساعتها انا جيبت موبايل جديد وخط وعملت شات على الواتس بين الواتس بتاعى والواتس اللى عملته بالخط اللى على التليفون التانى
كنت ببعت لنفسى كلام حلو وكلام حب كتير اوى
وكمان كنت ببعت...اللى هقوله ده اكبر حاجة غلط وحرام
انا عملتها فى حياتى اوعو تعملو زيى
وحاولو يعنى متكرهونيش اوى انا والله طيبة وعبيطة وعلشان عبيطة غلطت غلطة كبيرة زى دى
كنت ببعت صور لنفسى بشعرى وبلبس بيت
اتكسفت ابعت صور لنفسى بلبس مكشوف
وانا اساسا مكنش عندى لبس مكشوف
علشان انا عندى اخين واخت فلبسى قدام اخواتى الشباب ليه حدود
فالصور اللى بعتها كانت بشعرى وبتشيرتات نص كم
وربع كم بس والله ده كان اخرى
وبعد ما فضلت شهر ونص شهرين ببعت لنفسى وبرد على نفسى
خدت الموبايل الجديد وطلعت شقة عمى
وغفلت مرات عمى ودخلت اوضة منذر وحطيت الموبايل تحت مرتبة سريره
الجزء اللى جاى ده هو الجزء اللى منذر كرهنى بسببه
واللى انتم كمان احتمال تكرهونى بسببه
انا روحت لعمى وقولتله ان منذر بيبعتلى على الواتس بقاله شهرين وعلقنى بيه وخلانى احبه وابعتله صور لنفسى بشعرى وبلبس بيت
وانه طلب منى كمان نخرج لوحدنا من وراهم
بس انا مرضيتش وانى ندمانة على الصور اللى بعتهاله وانى خايفة يعمل بيهم حاجة
وقولت لعمى انى لما كنت بقول لمنذر انى اخاف حد يشوف الصور اللى ببعتهاله قالى انه حاططهم على تليفون غير اللى معاه ومخبيه فى اوضته ومستحيل حد يشوفهم غيره
عمى خد منى رقم الموبايل
ورن ولقى الموبايل تحت المرتبة وعليه المحادثة وشاف كل الكلام اللى المفروض انه بينى وبين منذر
وخلى منذر يجلنا على البيت وواجهه قدامى
مكنش فى الصالون غير انا وعمى ومنذر
