يسعد اوقاتكم
اصدقائى الغاليين اعضاء جروب (مش لوحدك )
المرة دى الموضوع اللى هنحكى عنه هو الخيانة
كل واحد فيكم ينزل بوست عن الخيانة
يحكى فيه اتخان ازاى ومن مين او هو خان مين
ومتنسوش تحطو #خيانة
فى بداية البوست علشان يتقبل
يلا نحكى لبعض قصص الخيانة اللى فى حياتنا
وكل واحد فينا يعرف انه مش لوحده
مش لوحده اللى اتخان
ولا حتى لوحده اللى خان
#خيانة
مع ان قصتى تقليدية انتم اكيد عارفينها
شوفتوها فى فيلم ولا مسلسل
او حتى حصلت مع حد تعرفوه
قصة تقليدية مستهلكة
بس هحكيها لأنها لسه بتحصل
حصلتلى وحصلت ولسه هتحصل لستات كتير
انا اتخطبت خطوبة تقليدية لواحد معرفوش
وفى الخطوبة عرفت انه بتاع بنات
كنت عايزة اسيبه بس اهلى رفضو
قالولى دى تانى خطوبة ليكى مينفعش تسيبيه
ولو على اللى بيعمله كل الشباب بيكونو كده قبل الجواز بكرة لما تتجوزو هيعقل
اتجوزنا وهو خانى بعد الجواز
قولت اطلق قالو مينفعش تبقى مطلقة والناس تاكل وشنا
بكرة لما تخلفى هيشيل المسئولية وهيعقل
ومحصلش خلفت مرة واتنين وتلاتة وهو معقلش ومبطلش يخونى
وبكرة اللى كانو بيصبرونى بيه ده عمره ما جه
انا اتعودت على خيانته ومبقتش بتوجعنى
كأنه مش جوزى كأنه مش بيخونى انا
كأنه ميخصنيش
كتر خيانته ليا موت جوايا اى احساس حلو ليه
حتى الغيرة عليه مبقتش بحسها
عايشة معاه علشان ولادنا يتربو بنا وبس
ومبقتش مستنياه يعقل ويبطل يخونى
بطلت استنى بكرة اللى قالولى عليه
لأنى بقيت عارفة انه عمره ما هيجى
وان اللى بيخون فى الخطوبة بيخون بعد الجواز وبيخون بعد الخلفة
الخاين بيفضل خاين
#خيانة
انا كمان عندى نفس القصة التقليدية لبكرة اللى عمره ما بيجى مع الراجل اللى عمره ما بيتغير وبيبطل خيانة
الفرق اللى بينى وبين صاحبة البوست اللى قريته
انى متجوزنش تقليدى
اتجوزت عن حب
او يعنى ده اللى كنت مفكراه
انه بيحبنى
هو حلفلى كتير انه بيحبنى
عارفين فى مرة حلف على المصحف انه بيحبنى وانه مش هيخونى تانى
وخانى تانى عادى
تانى وتالت وعاشر ومليون
فمبقتش مصدقة انه بيحبنى او انه حتى حبنى فى يوم
انا اتجوزته علشان مكنتش عايزة اتجوز جواز تقليدى
قولت الحب هو اللى هيضمنلى حياة ناجحة وسعيدة
بس لا مش الحب هو اللى بيضمنها
التفاهم والاحترام والأخلاق والصدق هما اللى ممكن يضمنوها
ولا حاجة من دول كانت موجودة فى حياتى معاه
مكنش موجود غير كدب وخيانة ووعود مبتتنفذش ووجع قلب وخوف
وعلشان كده اتطلقت
ولما جيت اتجوز تانى كانت اهم حاجة عندى التفاهم والاحترام والأخلاق والصدق والحب اخر حاجة فى اسس اختيارى
والمرة دى الحمد لله اللى اتجوزته مخدلنيش ومأذانيش ببساطة مخانيش
#خيانة
انا خونت واحدة صاحبتى
او كانت صاحبتى
كنت بحكى كل حاجة هى بتحكيهالى عن نفسها لماما
وهى لما عرفت قالتلى انى خونتها وانى مش امينة على اسرارها وانها مش عايزة تعرفنى تانى
وفعلا بعدت عنى
فضلت سنين كتيرة شايفة انها كبرت الموضوع وبالغت فى كلامها
بس لما اتخطبت ولقيت انى خطيبى بيحكى كل اسرارى وكل حاجة بتحصل بنا لمامته
فهمت احساسها
لأنى حسيت انه خانى
خان الأمان والثقة اللى بنا
وسيبته زى ما هى بعدت عنى
وصدقت انى خونتها
زى ما خطيبى خانى
