Expedallion Crusader: JAGUAR

CHAPTER 2

Mariin kong hawak ang manibela habang seryoso sa pagmamaneho. Nakita ko sa rear view mirror ng kotse ko na nakadikit na halos sa akin ang kalaban ko kaya mas binilisan ko pa ang takbo.

Hindi ako pwedeng matalo. Hindi pwede!

Ilang sandali pa ay napangiwi ako ng makarinig nang pagkalabog. Nakita kong binabangga ng kalaban ko ang kotse ko.

"Fuck you! Kapag nagka-gasgas tong C-x75 ko. Patay ka sa akin!" Sigaw ko dito.

Pinihit ko pakaliwa ang manibela upang iwasan sana ang pagdikit ng sasakyan nito sa akin. Pero ang demuho. Sinasadya niyang banggain ako.

Ang ganitong strategy sa pangangarera ay hindi na bago sa akin. Isa ito sa madalas na ginagawa upang mawala sa focus ang kalaban mo.

Nang makapasok na kami sa final laps ng laban ay rinig ko na ang ingay ng mga nanunuod ngayon dito sa arena. Mas binilisan ko na ang pagpapatakbo ko. Hanggang sa una akong nakarating sa finish line. Kasabay nito ay umalingaw-ngaw na sa buong paligid ang malakas na boses ng emcee na nag anunsyo ng pangalan ko.

"And the winner is Jaguar C-X75 ng Expedallion Crusader!"

Natapos ang match ko ngayong gabi na ako ang nanalo. Dahil dun ay tumungo na ako sa garahe kung saan pansamantala kong pinaparada ang kotse ko kapag ganitong katatapos lang ng laban. Lumabas ako sa C-X75 ko at diretsong naglakad papunta sa meeting room namin dito sa Death Race. Saktong pagpasok ko sa loob ay naabutan ko si Mazda na prenteng nakaupo sa sofa habang umiinom ng wine. Nasa tapat naman niya si Lotus na nakasimangot. Seryoso itong nakatitig sa cellphone niyang hawak.

"Dalawa lang kayong nandito?" Tanong ko.

Umupo ako sa tabi ni Lotus.

"Umalis na si Mclaren at Maserati. Yung iba nandun sa waiting room. Naghihintay ng match nila." Sagot ni Mazda.

Tumango tango ako. Ikatlo palang ako sa lumaban kaya marami pang susunod na match.

"Congrats, Jag." Bati ni Lotus sa akin.

Ngumisi lang ako.

"Muntikan ka na dun. Hindi ka kasi nag fo-focus dyan." Sabat ni Mazda.

Nakangiwi akong napadekwatro ng upo.

"Nasa focus ako. Huwag mo kong itulad kay Bugatti."

Tumawa si Lotus at maarteng pinag ekis ang mga braso.

"Ang bad mo na naman."

"Totoo naman, 'ah." Giit ko.

Nakita ko ang ilang canned juice na nasa lamesa. Nakaramdam ako ng uhaw kaya dumampot ako ng isa. Binuksan ko ito at tinungga. Nang maubos ito ay muli kong inilapag sa lamesa.

"Mauna na ako." Paalam ko at tumayo na sa sofa.

Akmang maglalakad na ako nang matigilan dahil sa paghawak ni Lotus sa isang kamay ko.

"Ano na naman, Lotus?"

Ipinungay niya ang kanyang mata na tila nagpapabebe.

"May nakalimutan akong itsismis."

"Tungkol saan?"

Napataas ang isang kilay ko nang makita ang kakaibang ngiti niya.

"Tungkol sa mga VIP members na ka-meeting ni Boss Cosimo ngayon." Sabat ni Mazda kaya sabay kaming napalingon ni Lotus dito.

"Oh, anong tungkol sa kanila?" Tanong ko at inalis ang kamay ni Lotus na nakahawak sa kamay ko.

"Isa sa mga VIP members ay lider ng Mugen Gang." Sagot nito.