ချိပ်ပိတ်ထားသော နတ်ဘုရားပလ္လင်

အခန်း ၈

လျှို့ဝှက် ဆန်းကြယ်သော ဆရာအသစ်(၄)

ဘာသာပြန် - Win Min Khant

"နတ်ဆိုးတွေက လူသား မျိုးနွယ်စုပေါင်း ထောင်ပေါင်း များစွာကို သတ်ဖြတ်ခဲ့ပြီး‌‌တော့ သွေးမြေကို စွန်းထင်း စေခဲ့တယ်... လွန်ခဲ့တဲ့ နှစ်ပေါင်း သုံးထောင် အတွင်းမှာ ငါတို့ရဲ့ ကျောင်းတော် ခြောက်ခုးက လုံးဝ နောင်တ မရခဲ့ဘဲ လူသား‌ မျိုးနွယ်စုတွေ ရှင်သန်ဖို့ အတတ်နိုင်ဆုံး လုပ်ဆောင်ခဲ့တယ်... တစ်နေ့မှာ‌တော့ ငါ့တို့ဆုံးရှုံးသွားတဲ့ နယ်မြေကို ပြန်ယူနိုင်ပြီး ရက်စက် ကြမ်းကြုတ်တဲ့ နတ်ဆိုးတွေကို နှင်ထုတ်နိုင်ရမယ်... ငါတို့ နောက်ဆုံးထွက်သက် အထိ ကြိုးစားရမယ်..."

" လုံဟောင်ချန်း နတ်ဆိုး မျိုးနွယ်စု‌တွေက ငါတို့ အတွက် အဆိုးဆုံးနဲ့ မုန်းစရာ အကောင်းဆုံး ရန်သူ‌တွေပဲ ဆိုတာ မင်းသေချာ မှတ်ထားပါ "

ရှင်းယု၏ အသံသည် စွမ်းအင် အပြည့်ရှိပြီး ကိုးနှစ်သား လုံဟောင်ချန်းပင်လျှင် သူ့စကားကြောင့် မယုံနိုင်လောက်အောင် စိတ်လှုပ်ရှားလာပြီး လွှမ်းမိုးနိုင်လေသည်။

"နတ်ဆိုး မျိုးနွယ်စုတွေက ကျွန်တော်တို့ အတွက် အဆိုးဆုံးနဲ့ မုန်းစရာ အကောင်းဆုံး ရန်သူတွေပဲ "

လုံဟောင်ချန်းက ရှင်းယု၏ လေသံ အတိုင်း ခိုင်မာစွာ ပြန်ပြောလိုက်သည်။

ရှင်းယုက ခေါင်းညိတ်လိုက်ပြီးဆက်ပြောလိုက်၏။

"သူတို့ကို ငါတို့ မွေးရပ်မြေကနေ မောင်းထုတ်ဖို့... ပျောက်ဆုံး နေတဲ့ နယ်မြေကို ပြန်လည် သိမ်းပိုက်ဖို့နဲ့ အရေးကြီးတဲ့ နေရာတွေကို ကာကွယ်ဖို့ အတွက်ပဲ အာရုံစိုက်ရမယ်... အကယ်၍ တစ်နေ့နေ့မှာ ငါတို့က နတ်ဆိုးတွေကို မတားဆီးနိုင်ခဲ့ရင် အိုဒင်မြို့ ဘယ်လိုဖြစ်သွားမလဲ... မင်း အမေနဲ့ မင်း သူငယ်ချင်းတွေ ဘယ်လို ဘေးဆိုးတွေ ကြုံရမလဲ စဉ်းစားကြည့် ..."

လိမ္မာ ပါးနပ်သော လုံဟောင်ချန်းသည် ထိုသို့ ပြောလိုက်သည်နှင့် အထိန်းအကွပ်မဲ့စွာ တုန်လှုပ်သွားပြီး သူ့အကြည့်သည် ကြမ်းတမ်း လာသည်။