ကြယ်စင်လင်းရောင် ယူနီကွန်း-၂
" ညွှန်ကြားမှုအတွက် ကျေးဇူးတင်ပါတယ် ... စီနီယာ "
" အင်း ... မင်းလည်း သွားတော့ "
အကြီးက လက်ကို လှုပ်ရှားလိုက်လျှင် စာလိပ်မှာ လောင်ကျွမ်းသွားခဲ့ပြီး အခိုးအငွေ့များ ဖြစ်ကာ လုံဟောင်ချန်း၏ လက်တွင်းမှ ကျောက်ပြားထံ ဝင်ရောက်သွားခဲ့သည်။ လုံဟောင်ချန်းက ယဲ့ဟွာဘက်လှည့်၍ သူရဲကောင်းတို့ ဓလေ့အတိုင်း အလေးပြုသည်။
" သွားတော့ "
ယဲ့ဟွာက အလေးပြန်ပြုသည်။ သူ့မျက်နှာပေါ်မှ အပြုံးမှာ အားတင်းပြုံးထားပုံပေါ်သော်လည်း သူ့အကြည့်မှာ အေးစက်နေမြဲပင်။ လုံဟောင်ချန်းက ကျောခိုင်း၍ မြူခိုးများအကြား ဝင်ရောက်ပျောက်ကွယ်သွားသည်။
ကျောခိုင်းသွားသော ပုံရိပ်ကို ကြည့်နေပြီးနောက် ယဲ့ဟွာက လှည့်ထွက်ရန်ပြင်သည်။ အဘိုးကြီးက စကားစလာ၏။
" ဒီကောင်လေးက ရှားပါး မျိုးစေ့လေးပဲ။ ဒီလို တပည့်မျိုး ရထားတာ မင်းတော်တော် ကံကောင်းတယ် "
ယဲ့ဟွာမှာ ရုတ်တရက် ချီးကျူးစကားကြောင့် အံ့အားသင့်သွား၏။
" စီနီယာရဲ့ ချီးကျူးမှုအတွက် ကျေးဇူးတင်ပါတယ် "
အဘိုးကြီးက ခပ်တည်တည် ပြန်ပြောလာသည်။
" ငါက သူများတွေကို မချီးကျူးတတ်ဘူး။ အမှန်ကိုပဲပြောတာ ... မင်းလည်း သွားတော့ "
" ဟုတ်ကဲ့ "
ယဲ့ဟွာသည် မြူခိုးများအတွင်းသို့ ရိုရိုသေသေ ဆုတ်ခွါလာသည်။ မလာခင်က ဤနေရာမှ အကြီးအကဲများ အကြောင်းကို လုံဟောင်ချန်းအား သူမပြောပြဖြစ်ခဲ့ခြင်းမှာ သူယခင်လာစဉ်က သူတို့အကြောင်းကို သိရန်ပင် အရည်အချင်း မမှီခဲ့သောကြောင့် ဖြစ်၏။
သူရဲကောင်းတို့၏ မြင့်မြတ်သောတောင်မှ ထိုအစောင့်အရှောက်များမှာ အဖွဲ့အစည်းမှ တာဝန်များကို ပြီးမြောက်အောင် ထမ်းဆောင်ပြီးသူများ ဖြစ်ကြပြီး အနည်းဆုံး ကောင်းကင်သူရဲကောင်းအဆင့်များ ဖြစ်ကြသည်။ သူတို့သည် ငွေစင်အနှစ်စစ်ချပ်ဝတ်ကို လက်ခံရယူပြီးနောက် အငြိမ်းစားယူကာ ဤနေရာအား စောင့်ကြပ်နေကြခြင်း ဖြစ်၏။
YOU ARE READING
ချိပ်ပိတ်ထားသော နတ်ဘုရားပလ္လင်
Fantasyမူရင်းဝတ္ထုစီးရီး - Shen Yin Wangzuo (Throne of Seal) မူရင်းရေးသားသူ - Tang Jia San Shao ဝတ္ထုစီးရီး - ချိပ်ပိတ်ထားသော နတ်ဘုရားပလ္လင် ဘာသာပြန်ဆိုရေးသားသူ - Win Min Khant
