🔥لهيب الهوس 🔥( مكتملة)

part28

بسمة ناعمة
البارت 28
: خرجات وهي ساهية ماكايناش فداك العاالم... فيقها بغواتو: تحركيي واش غانباتو هنا؟؟ رفعات راسها كاتشوف فييه كان وااقف حدا واحد الطاكسي... ركب وخلاها عاد جاية طلعات اللوور... ديمارا مول الطاكسي غير وصل للحي خلص ونزل مخليها.. نزلات بالثقالة باغية غير تووصل وتتكاا... تبعاتو وهو كان زدح الباب ودخل... دخلات من ورااه كلشي كايبانلها ظلام كارهة راسها وكارهة حياتها باغية غير تحط راسها على الوسادة كيف كانت كادير فدارهوم تجبد شي قصة من الفايس تقراهل تفوج بيها على راسها وتفكر ففارس أحلامها للي نساتو وهملااتو فهاد الزوااج... ابتاسمات بحزن مللي تذكرات دوك الأيام البسااطة والهناا... تنهدات بصووت مرتاافع.. يالله بغات تطلع الدرووج حتى سمعات صوت عجووزتها: هبة معاك شي ماعن فوق البوطاجي فوتي عليهوم.. لطيفة مشاات تقلب على عماد لعند الجيران... غمضات عينيها مكرهة بحاليلا قالتليها حاربي ماعندهاش الجهد فين تزيد توقف مزال... رجعات ودخلاات للكوزينة خرجات عينيها.. قالتلها شي مااعن... كان عليها تقوول شلاا مااعن.... حايدات جلابتها رماتها فوق واحد الكرسي تما... دارت طابلية طويلة وكفضات على يديها كاتغسل فيهوم... دخلات عجوزتها عليها: إيوا آش قاال الطبييب؟؟
هبة: والو اخالتي سولي سمير...
تكات مقابلة معاها: أمم نسول سمير... علاه نتي ماكنتيش معاهوم؟؟ ولا زعما گاتحشمي؟؟ كاع لا وأنا مالي فيكووم... غانمشي نشوف لطيفة واش لقات الولد... خرجات وخلاتها كاتغسلهوم بالنترة قالتلك كاتقلب على عماد عند الجيران لولد عندو خمسطاش عام وغايتوضر... ضورات راسها بلا حول ولا قوة إلا بالله... راها باينة هاربة من هاد الجوطية دالماعن للي لقاات... حتى لغدا ماخلااولهاش... شوية داللحم فالخبز قالتلها لولدي سمير راه فيه غير الشحمة ونتي ماكاتاكليهاش... ماتسوقاتش حيت اصلا مافيهاش الجووع... كملات ومسحات البووطاجي وطلعاات كاتمشى وتوقف فالدرووج هازة جلاابتها بيديها.. دخلات لبيتها للي ماكايدخلش ليها حتى ضو الشمس... لقاتو متكي فوق الناموسية راامي سبرديلتو وتريكوه فلرض... طاطات هزاتهوم... حرك راسو كايشووف فييها.... حطاتهوم فالجنب وحايدات الطابلية.. تكات لتحت فوق الحصيرة للي مفرشة تما كاتنعس فيها مع واحد من اللحوف للي جابت حيت ديك الناموسية قااصحة علييها يالله جبداات التيلي كااتخنتش فيه
بغات تدخل للفايس تلف بشي قصة من نهار تزوجات ماقراات حتى كاتلقا الكونيكسيون تسالات... تنهدات مكرهة كاتذكر من نهار تزوحات لهنا كاتشارجي غير لراسها هو كان كايشارجيلها غير مللي كانت صاحبتو... ودابا مابقالهاش لفلووس هادوك للي كانو يعلقوولها فعرسها كانت حاطاهوم فالماريو وكان كل مرة ياخد منهوم ويقولها حتى لمن بعد ونرجعلك... طلعات راسها كاتشووف فيه كان كايشوف فالسقف داارت شهيق زفير أصلا اول مرة غاتطلب منو شي حاجة حتى من اولويز كانت جايباه معاها من دارهوم بصووت خاافت نطقاات: سمير...
شاف فيها كايستناها تهضر: تسالاتلي الروشارج ومابقاوش ليا لفلووس... ممكن..
قاطعها: منين غانجيبهوم شفتيني خدام...؟؟ ياك من نهاار دخلتي عليا ماخدمت ماضحكت مافرحت... بحال النحس نتي حتى ل*وا بحال الناس ماكاينش... الشنعة دالزوااج... واصلا شنو بغيتي لهاد الروشارج غاتشاطي مع دوك ل*حبات للي ماكنتي تخللي معاهوم قنت يااك...؟؟!!
ناض: لهلا من شي ترياح هنا نمشي ن*ود حسن...
خرج وخلاها مصدومة من هدرتو.. هذا هو سمير للي كانت ماكاتعطيهش وقت وماعلى بالهاش بيه وجامي خسر الهدرة.. كان يدوي بطريقة متحضرة وبالآداب والأخلاق.. كان كايعاملها بحال شي أميرة واخا من بعيد... كليتي شربتي رتاحيتي... دابا خرجات معاه بلا فطور وهاهي باقية بلاا غداا ومامسوقش ليها... جامي عايرها ولا عااير صحاباتها ودابا ديما كاينعتهوم بابشع الألفااظ... يالله عرفاات علااش خاطرها كانت هاربة منو... علاش وااخا كان كايعاملها مزيان ماكانش كايتسرطلها... علاش كانت كاتفكر تفسخ الخطوبة... ودابا كاتفكر فالطلااق... ولكن وااش هي مامكملاش حتى شهر فالزوااج غااطلق...؟ مايمكمش وشنو يقولو عليها النااس... تنهدات ماتمسح دمعة نزلات من عينيها... تفكرات الملف دلافاك للي كلفاات بيه واحد ولد خاالتها... على الأقل تخلص ديك لابوورص تعاون بيها راسها حتى يحن الله
داازت شهر نفس الرووتين الملل والهدرة الخاوية والخدمة من الصباح حتى لليل الحاجة الوحيدة للي تبدلات هي أنو سمير منعاتو يقربلها واخا ماخلا حتى محاااولة... كايطلب يرغب يتبحلس يسب يخوف ويهدد او والو... كرهات يقربلها... وبحكم انو ساكن مع العائلة ماكايرضااش يسمعو غواتهوم وكايستسلم... هذي هي الحاجة الزوينة للي نفعاتها فيها السكنة مع جوقة دبناادم... وحتى لافااك تقيدات فيها... طلبات منو يخليها تبقا تمشي دوز الامتحانات وماخلاهاش واخا قبل الزوااج كان موااعدهاا... قطعات الآمل فقرايتها وكل نهاار كاتبكي خيت يالله حسات بقيمتها وخصوصا مللي كاتشوف تصااور صحاباتها فلافاك فالقهوة فالزنقة داك الشي للي حلمو بييه حققاتو كوثر أو مريم.. اما حتى غزلاان مانجحااتش مي عايشة حياتها هذيك من بكري مع عائلتها حييت هما لباس عليهوم وماشي ضرووري تاخد البااك باش تخرج من المنطقة... تكات على الحيط كاتفكر فين هي عمرها بقاات بوحدها فالداار ولا حتى فبيت يااك كاتخاف تمشي من الكوزينة للدوش... ودابا هاعي الجووج داللييل وبااقي هو مادخل والفوقي كاامل خاوي غير هي للي فييه هما كاع بيوتهوم لتحت... سمعات البااب دبرا تزدح... هاهو دخل... الرااجل للي كان كايطلب غير يشووفها مايخدم ماياكل مايشرب كاافيه يشووفها ويجلس معاها رجعات كاتشوفو من وقت لوقت...
دفع بااب البييت ودخل خنزر فيها وزاد للنانوسية تجبد فوقها بسبرديلتو... قلبها طلع مللي شمات ريحة الشرااب...آه ريحة الشرااب ماغاتخفاش عليها وهي العام كامل كاتشمو فالطوبيس فولااد الحومة... تصدمات يااك ماكان لا يكمي لا يشرب.. ناضت وهزات لحافها خرجات للحووش تنعس ماغاتقدرش تصبر لديك الريحة سمعاتو من البييت نطق: بغيتيه راجل كامل ومكمول ماكايكمي ماكايشرب ونتي مافيك حتى حاجة كاملة... راه من ديما كانشرب ونكمي غير كنتي عورة وباغية غير فاش تلصقي...
سمعات وتنهدات قالها كنتي باغية تلصقي ياك هو للي كان لاصق بيديه ورجليه...