🔥لهيب الهوس 🔥( مكتملة)

part89

بسمة ناعمة
البارت 89:دااز الوقت بززااف.. حركات رااسها باقية مغمضة عينيها كااتحس برااسها مهزوزة.. حلااتهوم بتثااقل.. جاو فعينيه كاايشوف فيها مبتااسم... دغيا صحصحاات شاافت يمين وشمال.. لقاتو هازها مدخلها لدار.. يالله جات تنطق مخلووعة حتى سبقها: شششش... غاندخلك قبل ماايوذن... وغانمشي.. سكتي غاتفيقيهوم...
سكتات غير كاضور فعينيها.. وهو كايشوف فارجاء الداار: فين بيتك؟؟
هبة بالحس: غير حطني.. قادرة نتمشى
تااج: عاارفك قاادرة.. باغي نشووف بيتك. .
سرطات ريقها.. آش غايشوف فيها؟؟ نعتاتهالو بصبعها.. ومشا فاتجاهها.. دفع البااب ودخل بيها.. كايشوف فيها.. وهي حشماانة.. حطها فوق الناموسية.. وهي جلساات كاتشوف فيه.. داير يديه فجيااب المونطو كاايضور فيها مبتااسم بإعجااب.. استغربااتلو... شنو عجبو؟؟... رجع كايشوف فيها: هنا فين كنتي تحلمي بياا...؟؟
عضاات على شفاايفها حشماانة.. وهو رجع كاايشووف... توجه للكوافوز... هز قرعة دالريحة كانت مجطووطة تما حطها على نيفو كاايشمها: ورجع ضار شاف فيها.. لقاها حتى هي كاتشوف فيه: فرااسك اول مرة شمييت ريحتك فديك الزنقة.. ماخلليت حتى قنت ديال الروايح ماقلبتش فيه؟؟
صغرات عينيها باستغرااب: بغيت نشمها فباااصة أخرى.. نستاانس بيها حتى نشوفك مرة أخرى... مشيت لمحلات الماركات ومشيت حتى لدوك الرخااص.. او والو مالقيتش
هبة وهي كاتشوف فديك القرعة للي فيدو: واش هذي؟؟ راها موجودة..
حرك راسو بالنفي: لاا.. ماشي هذي... هاذيك مااشي بارفان.. هذيك ريحتك نتي ريحة ذااتك... هااد الريحة للي منتااشرة فهااد البيت... واش كاتشميها؟؟
حركات رااسها: ل.. لا.. كانشم غير ريحتك..
حط ديك القرعة وقربلها تحنا على ركابيه فوق الطاابية: وانا كانشم ريحتك... دياالك نتي.. مخلوقة ليك بووحدك... كاينة فيك فحواايجك.. وففراشك... وفبيتك... شفتي فالفيلا للي فوجدة؟؟ كاينة فداك البيت.. وكاينة فالفرااش.. وااخا تغسل بااقية فييه...
هز يدها بااسها وهي غير كاتشوف عينيها مغرغرين: هااد الريحة مخلوقة ليك بووحدك.. وأنا بااغي نشريها.. بااغيها تكون من نصيبي.. وأنا الوحيد للي من حقي نستنشقها... وردة ناادرة... فيها غير وحدة... وهاد الوحدة فزت بيها أناا... ونهار غدا غانمضي على وثيقة تملكي لييها... شد وجهها بين يديه: إلى نتي عندك نهاار غدا عاادي... أنا مااشي بحاالك... أنا نهاار غدا هو شي حااجة سبيسياال فحيااتي... هو نهاار غايسجلو التااريخ عندي... نهاار غدا.. واخا تعيااي ماتفكري ولا تصوري كيف غاايدوز عندي أنا متأكد ماغاتقدريش تخاايليه...
سمع صووت الخطواات.. شاف جهة البااب ورجع شاف فسااعتو: غايطونو ناضو بااش يتوضااو... تااض باسها فشفاايفها وشاف فيها: نهاار غدا ماغانافسني حد ففرحتي...
مشا بسرعة البرق جهة السرجم... نقز وجا لتحت... جا محني.. نااض قااد حوايجو ورجع شاف جهة بيتها.. ابتااسم وتمتم: نهار غدا غانديرك بين يديا حياتي كااملة...
أما هي بقاات كاتشوف فالفرااغ ودموعها كاينزلو شلاال.. حتى حطات يدها على وجهها كاتبكي: اهيء اهيء... شكون قاالك نهار غدا غاايفووت عندي عاادي..؟؟!! اهيء اهيء.. نهاار غدا غاادي نتزااد أنا من جدييد... غااتكون هبة أخرى... أهيء.. هبة الفرحاانة.. هبة العشقاانة... اهيء اهيء... نهاار غدا غاانمضي على زواجي كأنني أول مرة نمضي علييه... #كانبغييك... اهيء اهيء... بقاات مدة جاالسة تما حتى سمعااتو كاايوذن... نااضت دخلات للدووش توضاات وخرجات لبساات جلابة طويلة.. اتاجهات للقبلة.. صلاات كاتطلب الله يتمم فرحتها ويكمل نهار غدا بيخير وعلى خيير...
أما هو ديمارا الطومو.. كايسوق... ويقلب بعينيه على شي جاامع يصلي فيه.. هذاك للي فالحي.. مابغاش يمشيليه.. حيت باباها غايكون تما.. وكيف ماكان الحاال راه باقيين ماتزوجوش ويلا شافو تما غاايفهم لبلاان... بانلو وااحد الناس كايدخلولو.. رومبلاصا الطومو.. ونزل.. دخل مشاا للحمام تما.. توضا.. وخرج صلى تحية المسجد وجوج ركعاات.. بداو الصلااة... حتى سالاو... وجلس هااز يدو للسماا.. كاايدعي من قلبو.. باغي زواجو يكمل وهبة تكوون من نصييبو... فالحلاال...
....
شرقاات الشمس... والنهاار سخون وزويين.. واخا جااي فعز الشتاا.. كان متميز... خرجاات من الحماام لاابسة ملاابس دااخلية.. كاتنشف شعرها بالفووطة وحاط التيلي فوذنها مكااليااه بكتفها: آه أنا دابا غاانلبس حواايجي بااش نمشي.. تااج يالله عيط.. قالي وااحد النص سااعة يكون هناا.. ونتوما فيين وصلتو؟؟ ...... أمم وااخا نتلااقاو تماا... يالله نخلليكوم...
قطعاات وتوجهاات للمااريو.. كاتقلب بين حواايجها.. حتى جبداات وااحد الجلاابة زوينة بخيااطة عصرية.. عامرة من جهة الصدر سخونة.. وجاات مع طاايتها.. جااتها كااتحمق.. جلساات مقابلة مع مراايتها برونشاات السيشوار فالضوو... وبداات كااتنشف شعرها... والإبتساامة مافارقااتش وجهها... جمعااتو كعكة مهملة... وهزاات زيفها فاللون الكحل.. بحال الجلاابة... هزاات بووط فلكحل طوييل... لبسااتو عاالي شوية.. جاات زويينة... داارت بوودر وماسطارة وغوجااليف حمر... خرجاات من بييتها غادية جهة وليديها للي جالسين فالطبلة دالفطوور.. عامرة بكل ماتشهاه العيين.. حالتهوم تبدلاات من نهاار دخل تااج لحيااتهوم... هزات كروااصة وهي وااقفة.. عضاات منها وتبعااتها جغمة دالحلييب... نطقات ماماها: بنتي جلسي تفطري ماالك كاتاكلي وااقفة؟؟
حطات البااقي: لا أماما ماافيااش..
_الله أبنتي رااه تابعاك الطريق... كولي شوية
_والله مافخااطري.. دابا نااكل من بعد.. شاافت فباباها للي كان جالس كاايفطر بالزربة بااش مللي يجي تاج يلقااهوم كايسااينووه.. لابس جلاابة بيضة وبلغة بيضة.. ومقااد الرزة على رااسو على الطريقة الوهراانية... مشاات جلساات أونفااص للتلفاازة شعلااتها كاتفرج وتلف الوقت... حااسة بالتوثر.. اي حااجة داارتها مع تااج.. بحاليلا اول مرة تجربها.. قضية مطلقة وداايرزة من هااد الشي كاامل كااع ماكاينة فقااموسها... قفزاات على صووت ضحى للي نقزاات عليها من اللور.. لالسة الطابلية دالقراية وهاازة الساكادو دياالها: هاانا على العروسة دياالنا..
تخطفاات كاتشوف فيها: فف.. خلعتيني...
ضحى: امم طنتي سااهية كااتفكري فحبيب القلب..
ضحكات بلا ماتجااوبها وضاارت جلساات حداها كاتشوف فييها: بووكوص أختي وزويين والله.. اي وحدة تتمنااه..
هبة بمزااح: وااجمعي رااسك شفتك تحليتي..
ابتااسماتلها وشداتها من يدها: المرة اللولة ماقلتش ليك مبرووك ولا الله يكمل عليك بيخير.. ومااتمنيتش مصير بحاال دياالك.. حيت بكل صرااحة ماكانش عااجبني زوااجك.. ومااكنتش باغياه يكمل... ولكن داابا غانقوولك مبرووك أختي والله يكمل عليك بالخيير.. غنضاات عينيها رافعة يديها للسماا: ويااربي يااربي.. عطيني بحاالو يااربي.. شافت فييها: كاع صحابااتك ضبرتي عليهوم.. وأنا نسيتيني
هبة: ههههه.. حمقة.. راه ضبرو على راسهوم مااضبرت على حد أناا...
ضحى: وووو... شحاال فرحتلك شحاال؟ نقزاات عنقااتها: فرحت بنسيبي هههه... هانا غانمشي نقراا... ناضت خلاتها غير كاتضحك وضور فرااسها... بقات جالسة شوية.. حتى سمعاات صوت لكلااكصوون.. جاات وااقفة مشابكة يديها كاتسرط فرييقها تمشاات جهة البااب.. لقاات باباها طاار سبقها وماماهت كااتجمع فالطاابلة.. خرجاات حتى لبرا.. وقفاات كاتشوف فيه كاايسلم على باباها... ضاار شاف فيها مبتااسم بااينة الفرحة على وجهو... وحتى هي كاتشوف فيه ضااحكة.. حل الباب القدااامي للطومو... ركب باباها وهو كايشوف فالنااس دياال الحي بافتخاار... وهي تمشات بخطوات ثقاال حتى وقفاات مقابلة معاه.. هز يدها بااسها وحلها اابااب اللوراني دالطومو دايرلها إشارة بيدو باش تركب: جااتك الجلاابة كااتحمق...
ابتااسمات بخجل وهي كاطلع وتهبط فيه كان لابس مونطو فالخضر مع سرواال كحل وسبرديلة خضرة: ح.. حتى نتا جيتي زوييين...
تااج: الفرحة هي للي خلااتني زويين..
.ركباات وركب حتى هو ديمارا مخللي كاع الأنظاار متبعااهوم.. ومعاهوم سمير للي كان واقف متكي على وااحد الحييط مخنزر وطالعلو الدم... عينيه حمرين وحااس بالشمتة.. مارضااش.. قلبو مزير عليه.. كللو كاايترعد وهو كاايشوف فالطومو الغاالية للي رااكبة فيها هذيك للي تسماات فوااحد الوقت مرااتو.. هذيك كانت دياالو فوااحد الوقت.. كاانت كاتصبنلو حواايجو وشادة النوبة مع مراات خوه الجااهلة.. كانت كااطلبو على روشاارج دعشرة دالدرااهم ومللي كااتبغي تحمم كاتهز حواايجها وتمشي لدارهوم حيت ماكايبغيش يعطيها فلوس الحماام... هي هذيك هبة للي كان كايخلليها فالداار ويمشي يسهر مع صحاابو.. وينعس مع لبناات... هي هذيك البنت للي خرجها من قرايتها وتزوج بيها بااش يتكرفص عليها هو وعائلتو... هبة للي كانت ختو كااتفيق مع وقت لغداا وتعايرها.. كاانت كاتطلب فيه بحال الكلبة بااش يخللييها تمشي تشووف وليديها... كاتبقا وااقفة النهاار كاامل على رجلييها ومللي تجي تنعس باللي كاايبات سهراان غير يدخل سمعها هدرة تسممها... بااقي عاقل مزياان على النهار للي وقف قداامها بكل شجااعة وقاالها بللي دار فيها خير مللي تزوج بيها.. ولوكان خلاها غاتبقا باايرة فداار بااها حتى حد ماايتسوق لها.. وحتى لقرااية ماعندها فيين توصلهاا...أما إلى طلقها غااتولي بحاال طاارو دالزبل فدااك الدرب... بينلها بللي رغم كاع دااك الشي للي كايدوز عليها رااه دااير فيها خيير كبيير مللي مزوج بييها...
زير على قبضة يدو مغمض عينيه نزلاات منهوم ظمعة سخوونو.. دمعة الشمتة.. حيت ضيعها من يديه.. دمعة الحسرة حييت ماقدرش يحتافظ عليها... طيح دمعتو حيت مارضااش مللي شافتلو فعينيه وضحكت باستهزاء.. أكيد تفكرات الهدرة للي قاالها... بينااتلو العكس.. هااهي مع سيد الرجاال وهااهو بااقي فبلااصتو مااتحركش.. كاانت قالتهااليه.. قالتلو مزاال نهار نتهنا منك غاانبقا ندوز عليك ومانرضاش حتى نشوف فيك.. أنا غاانزيد القداام ونتا غاتبقا فبلااصتك ولا تقظر تنزل لتحت عااد... كاانت هدرتها على حق.. وهتهو جا النهاار للي باان فيه الحق من البااطل.. ضرب بيدو مع الحييط بكل جهدو.. ماارضااش بالخساارة... وللي زاد كمل على ماابيه.. هي لقتلاات للي عطااهوملو تااج... حس براسو جفااف فحيااتها من بعد ماكان هو المتحكم والمسيطر.. وقف مخنزر ومصمم.. انتقاام وعنااد.. هذيك كانت دياالو قبل من دااك السيد.. هو عاارف بل متأكد بللي ماغايقدرش يناافسو.. راه لا مجاال للمقاارنة.. ولكن كيف داار شافها وكيفااش بغاها.. وعلاش بغااها... وشنو وقع؟؟ يااك ماكاملااش سيمانة باش نفارقو وتهجم علييه.. هادو كاع أسئلة ضارو فراسو... المهم ماغايستسلمش..  واخا غايلعب غير من بعيد.. ماعندوش الجرأة بااش يقرب ولا يباان... أكيد لعبة خبيثة كاايخطط لها... ولكن مااشي داابا.. وأخيرا غايبعد من حضن بااه ويمشي يساافر.. يخبي كماارتو حييت رجع مصظر ضحك وشفااية... غايمشي ينسب وعااد يرجع... تحرك من تما هااشي وجهو فلرض والسخاانة طالعالو.. ماباغي يوقفو حد ولا يدوي مع حد.. حتى من وليديه وعائلتو طلعلهوم فالرااس وطلعولو فالرااس.. دخل مبااشرة للدار طلع لبيتو.. جمع دوك الشوية دالحواايج للي كانو عندو فالسااك.. هز شي فليساات كان داسهوم.. والديبلوم دياالو.. وجاا ناازل.. وقف عليهوم كاملين فالصالون جالسين كايدويو... فموضوع هبة طبعا.. مرات خوه كاانت جاية من الحمام هي وقشلتها وشاافتها وهي خاارجة مع تااج وباها.. جالسة كاتعبر على إعجاابها بيه وبطموبيلتو... وهما كايخنزرو خصووصا ختو.. نار الغيرة من عبة.. ونار الفقصة من هذي للي كاتغزل برااجل آخوور قداامها حتى قفزااتها: نوضي تكعدي ديريلنا ماناكلو ونتي جاالسة كاتمعشقي حدايا لا حشمة لا حياا...
نااضت كاتشووف فشيخها للي جاالس حااني رااسو للأرض كاايخمم.. ودخلات للكوزينة.. وقف عليهوم سمير.. ونطق من بعد صمت: الةاليد غاانمشي لطنجة..
شاف فييه.. وبقا سااكت حتى نطقاات مو: علااش اولدي وااش لقيتي شي خدمة؟؟
سمير: غانمشي عند صحابي تما.. ونقلب ربما نلقا شي حااجة.. راه قالولي مااكايعتاارفوش بالسيفياات... خاص تمشي برجليك عااد وشوف تشووف...
نطق بااه: الله يسهل عليك أولدي...
هضرات ختو وهي كاتعوج فشفاايفها: سير وغدا رجع راكوم ماتقدروش تعيشو بلا فلوس باا.. مادرتو ربح فحيااتكوم.. نضتي حتى تزوج جبتي وحدة ماخلات فينا غير للي نساات.. ومشاات صبرات على رااجل ملعق... هي وبااها...
نااض باها صااعر طاالعلو الدم... شااف فييها مخنزر: نتي غاتسكتي ولا ماغايعجبك حاال... هز صبعو جهتها كتحذير: حتارميني انا راني بااك... ماتبقايش تخسري الهدرة حدايا.. وهذيك للي كاتدوي عليها طفراتو.. طلقات من خوك حيت مالقات فيه فايدة ومشات جاابت سيدو داارت العز لباها.. ماشي بحاالك نتي غير خامرة فبيتك ومللي تنوضي كاتسرطي وتخسري لهدرة حدايا بحال شي زوفري خاانز.. ومن بعد كاتمشي تنعسي عااود... أحسن حاجة دارتها هبة قبل ماتمشي هي عطااتك قتلة دالعصاا... تفووو على كماارة... عطاهوم بالظهر كايتمشى ويسب.. وهي غير مصدومة.. سمير خرج غاادي ومرات خووه كاتفرج من بااب الكووزينة مبتااسمة وعاجبها الحاال
فطريقهوم لوجدة... كااايسووق وباباها حاالس بارتيااح حدااه.. وحاضي جلستو.. تااج عندو وااحد الهبة خطيرة.. كاتخللي الوااحد يرض الباال لتفااصيلو الصغاار ويحضي راسو مللي يكون حدااه..
صوناالو التيلي جااوب وهو دااير الكييت: ألوو أشرف... وي انا فالطريق.. اوكي نتلااقاو فالفيلاا... آه مابقاش بززاف..
قطع عليه...
مهدي: واش غانمشيو لدراك قبل؟؟
تااج: غانديرو تما العقد
مهدي: واش فالفيلا؟؟
شاف فيه تااج: آه.. عندك شي مشكل أعمي؟؟
المهدي: لا اولدي مااعندي حتى مشكل.. حسن هاكا.. نتونا بثلاتة غاديرو العقد عين بناادم خاايبة اللهم فالدار حسن..
حرك رااسو وطلع عينيه فالمرااية كاايشووف فيها كاتسمعلهوم وتشوف فالسرجم.
هز التيلي ديالو كاايكتب وعينو عليها... تحركات كاتسمع لصوت الميسااج فالتيلي ديالها.. جبداتو من صااكها وحلاتو: مال عنري سااهية وسااكتة؟؟
ابتاسمات وطلعات راسها كاتشوف فيه لقاتو باقي حااضيها.. رجعان كاتشوف فالتيلي وتكتبلو: والو.. راه كانسمعلكوم غير مالقيت ماانقوول...
تاج: قربنا نوصلو..
هبة: آه عاارفة
تااج: وقربنا نكااتبو
عضات على شفاايفها بابتساامة: عاارفة...
تااج: #مرااتي...
غمضاات عينيها كااتفكر فهااد الكلمة للي قرااتها.. حلااوتها غرييبة ومااعندهااش مثيل.. هااد الشي غير فميسااج.. كيفااش غاتكون من فمو ولساانو مبااشرة لوذنها ومساامعها؟؟
رجعات كاتشوف فيه.. صافطلها بووسة من شفاايفو خلااها كاضور فعينيها خدودها حمارو خاايفة باها يشوفو وهو كاايضحك مبرد.. ضارت كاتشوف فباباها لقاتو كايشوف قداامو مكاالمي ومفرنس.. عاد رتااحت...
للحظاات دخلاات الطوموبيل للجردة دالفيلا.. نزلو من تما.. دار إشارة لباباها بااش يدخل.. لقا الخدامة فاستقباالو.. دخلاتو للثالون بابتساامة.. وهو بقا وااقف حتى قرباات هبة حدااه.. بقا كاايهبطلها الجلاابة ويقاادهالها وهي غير كااتشوف: فففف.. زعما ماقدروش يوسعوها شوية من هنا..
هبة: واش مااجاتش معايا؟؟
تااج: جاات جاات غير زيدي...
جرها من يدها حتى دخلو الدااخل وتنثرات منو.. شاف فيها.. ذبلات عوينااتها: باابا...
حرك راسو متفهم: باينة ماغاتقدريش تطلعي الفوق؟؟
هبة: علاش غانطلع؟؟
تاج: والو غير باش نسلم عليك.. راك عارفة ماسلمتش علييك كاان باباك معاانا...
خنزرات فييه: سير كون تحشم...
شدها من حنكها بصبااعو: هانا غاادي..
مشا وخلااها وااقغة مبتااسمة... من بعد تمشاات جهة باها لقاتو جاالس كايشرب فالعصير ويدوز بالفاكية والحلوى... جلساات حداه... هزات كاسها كاتشربو حتى نطق: نهار تزوجتي بدااك الخنز ديال ولد حمو دخلت عندهوم مرة.. غير باش نشوف باه كان مريض.. ماقدرو حتى يقولولي جلس تشرب تااي... يخخ تريكة الجووع.. شووفي النااس دالخير والكرم..
هبة بابتساامة: ربي خلق وفرق ابابا... وتااج فرق كبير بينو وبين سميير...
مهدي: الله يكمل عليكوم بالخيير أبنتي.. تهلااي فييه... راه ماغاتلقاايش بحاالو..
حنات راسها حشماانة: إن شااء الله أبابا...
جبدها لعندو معنقها باسها فوق راسها: من ديما كنتي بنتي الغاالية.. وغاتبقاي نتي هي الرووح دياالي..
عنقااتو حتى هي: ونتا هو أحسن أب.. وأحسن رااجل فحيااتي..
وقفاتهوم تنحنيحتو المعصبة.. طلعو راسهوم وهما باقيين معنقين كايشوفو فيه وااقغ فم البااب مخنزر... قرب لعندهوم وجلس حداهوم.. معصب.. وكايحاول يبرد.. نطق مغدظ: نوضو...
هبة خرجات فيه عينيها كاتغمزلو وباباها غير كاايشوف: ب.. بغيت نقول.. الشمس والجو زوين نووض أعمي نساريك الجردة.. بينما وجد لغدا وجااو لعدول والدراري...
مهدي بابتساامة: آهاه هي اللولة.. الجو زوين بررا...
ابتاسملو غير بزز ناض باها سابقو.. وهو ناض من وراه.. ضار شاف فيها مخنزر ونطق مقلدها: نتا أحسن رجل فحيااتي.. يخخخ...
مشا تابعو وخلااها كااتضحك... وناضت من ورااهوم تابعاهوم...
بقاو كايتمشاو بجوج فالجردة.. ويدويو فجميع المواضبع.. تاج علم مهدي بللي غايصيفطلو مهنديسين بناء من عندو.. وهما للي غايتكلفو بدارو.. وغايهندسوها كيف بغا هو.. فرح بهاد الإقتراح.. بغا يهزو فوق راسو... بقاو تما حتى وصل وقت لغدا.. دخلو توضاو وصلااو.. ونزلو لتحت.. لقاو لبنات والدراري يالله وصلو وحتى غزلان جاات معاهوم.. تسالمو.. معاهوم حتى وليديهوم.. الدار عمرات.. جلسو على السفرة دالمااكلة.. الهراج والهدرة.. غير غزلان للي جات بووحدها.. حتى جاا دااخل فاارس.. كايفرنس من برراا... سلم عليهوم كااملين.. غير وصل عليها هي بااسها فحنكها خلاها مزيرة على الفورشيط للي فيدها... مكرهة.. مالقات كيف دير حدا النااس لكباار للي معاهوم.. حدها ابتااسمات بزز ومخنزرة فيه من لتحت لتحت.. جر الكرسي حداها.. وجلس.. بداو فالأكل وهو كايقطعلها ويحطلها فالطبسيل.. خلاتو حتى سالا ودفعات داك الطبسيل بلبااقة وجبدات واحد خااوي عمرات فيه... وميلاات رااسها جهتو نطقاات بهمس: هاد الحركاات ماغاينفعووش معااياا... من الأحسن تبعد مني.. وداك الزوااج للي نتا فرحان بيه أنا مامعتاارفاش بيه... بعداات كاتاكل ببرود خلاتو غير كاايشوف.. يالله استوعب مدى توثر الوضع بينااتهوم.. ولكن ماشي هو للي يستسلم..
.... تغدااو ومشاو جلسو فالصالون.. طالقين موسيقى هادئة.. كايدويو حتى وصلو لعدول.. دخلااتهوم الخداامة.. ناضو الدراري استقبلوهوم.. جلسوهوم وجاابولهووم المشروباات والحلوى... كلاو وتباادلو أطرااف الحدييث.. جبدو الدفااتر دياالهوم.. عم السكون فالمكاان غير صوتهوم للي كايتسمع.. ستة دالقلووب غايتوحدو فهااد اللحظة.. بالفرحة والسعاادة.. وفخر الآباء.. برضا الوليدين والولااد... لعدوول كاايسول وهما كاايجااوبو... توثق زوااحهوم بثلااتة.. عرساان جدااد.. ونسااب جدااد.. طااخت دمعة من عين المهدي للي كاان كايخمم ليل ونهار لمستقبل
بنتو المجهول وللي كان كاايهوف حييت مطلقة والهدرة تاابعااها.. نااض عنق تااج بكل قوة: نتا رااجل.. نسيبي رااجل.. الله يخلليك لوليديك ويرضي عليك أولديي... تعالاو الزغاارت دياال الخدامات.. وشي عيالات جابتهوم ماريا متكلفين خصيصا فهاد الشي.. الموسيقى تجهداات.. لبنات فرحانات كاايعنقو فبعضياتهوم ودموعهوم سابقينهوم... وكايعنقو فوليديهوم.. وغزلان حتى هي فرحاانة معاهووم.. وكل واحد عنق مراتو فرحاان بييها...
بقاات واقفة كل مرة يجي واحد يعنقها ويبااركلها.. فوسط دااك النشااط وديك الموسيقى.. وديك العلااقة للي بين باها ورااجلها.. شريط حياتها كللو داز قدام عينيها.. طفولتها لبسيطة علاقتها بسمير تهربها منو.. زواجها بيه.. مدة زواجها معااه...احلامها فبيتها لبسييط... فارس أحلاامها للي ماعمرها ضناات تشووفو... طلعاات عينيها كاتشوف فيه كاايضحك فرحاان ويرد على للي باركلوو... عينيها شلاال بالدمووع... هذا هو للي حلماات بييه.. رجع رااجلها داابا.. هذااك راه حلاالها... تمشات بخطوات ثقيلة جهتو.. مابقا كايباانلها حد داابا من غيرو.. تخطات كلشي أو وقفاات مقاابلة معااه.. خلات كلشي ينتاابهلها.. وحتى هو كاايشوف فيها مستغرل.. حركات يدها هزاات بيها يدو.. حطاتها على شفاايفها باستها خلااتو مصدووم.. ونطقاات بصوت مخنوق بالبكاا: أنا وحدة مطلقة... اهيء اهيء.. حلمت بززاف وأنا متكية فبلااصتي.. ومللي كنت كانوض.. كانضحك ونقوول براكة من التخربيق.. داك الشي ماغايتحقق منو حتى الربع.. نسيت بلي ربي كبيير... كبير بززاف.. لدرجة انو وااحد من هااد الرجاال لقلاال فالعاالم بشهاامتو بشجااعتو برجولتو بوساامتو.. وبشخصيتو القوية... بأخلاقو.. بآذاابو.. يكون من نصيبي أنا.. من نصيب هبة النية.. هبة لهبيلة.. هبة لبسيطة.. هبة لمطلقة.. اهيء اهيء... شافت فالسما: الحمدلله الحمدلله... ربي كبيير.. اهيء اهيء.. كبير بززااف.. رجعاات شاافت فيه بابتساامة.. شداتو من كتاافو... ضحكاات وعينيها عاامرين بالدمووع: هههه.. اهيء.. رااجلي.. نتا رااجلي.. يااك؟؟ مااكانحلمش؟؟ عنقااتو مخشية فيه.. وهو مرفووع: اهيء اهيء.. ماكانحلمش أتااج يااك؟؟!! اهيء اهيء.. نتا رااجلي داابا يااك؟؟!! اهيء اهيء.. ماغانفيقش ونلقا رااسي فبيتي ولا بااقية مزوجة بهذااك ياك..؟؟!! اهيء اهيء.. رااه مامتيقااش بللي الدنيا ضحكاات ليا لهااد الدرجة؟؟.. اهيء اهيء...
زير عليها بيديه كاايبوسها فخدودها وجبهتها.. نااسي حتى هو الحضور للي كاع تأثرو بالمشهد شي كاايبكي وشي غير كاايشووف مبتااسم: ششششش.. ماكاتحلميش.. نتي مرااتي داابا... مرااتي... واش بغيتي تقتليني؟؟ كيفااش حلم؟؟ هاد السعاادة للي عشتها كااملة بغيتي ترجعيها حلم؟؟ نسااي المااضي.. نسااي شنو وقع.. من قبل.. انا راجلك ونتي مرااتي... رجعتي دياالي...
جالسين فالصالون مجموعين.. لبناات بوحدهوم كاايدويو فرحاانين بزواجهوم.. والرجال مع نساابهوم... كاان جالس حداه... تنحنح ونطق وهو كايشوف فهبة كانت جالسة مع صحاباتها بعيدة عليهوم: هبة هي الفرحة اللولة ديالي أنا ومراتي.. هي للي علماتني معنى الأبوة ومعنى المسؤوولية... وكل ماكبراات وزدت تعرفت عليها وعلى أخلااقها كاانزيد نبغيها ونبغي لولااد... أو واخا رزقني الله بجوج من ورااها.. هي بلااصتها بقاات خااصة وكبيرة فقلبي... راك عاارف ديما الولد اللول كاتكون معزتو خااصة فماابالك بوحدة بحاال هبة.. ضريفة ونية وقلبها بيض... طلع راسو كايشوف فتااج: كنت ديما هازلها الهم.. لمستقبلها... لحياتها.. انا ماغاندوملهااش.. ولكن تيق فياا هذي اول مرة كانحس براسي مرتااح من جهتها.. واخا غااتمشي معاك لفرنسا.. وغاتبعد علينا وتغرب... واخا حنا ماساخيينش بييها.. أنا مرتااح وغاننعس وقلبي هااني ومهني علييها... حيت هي فيدين آمنة...
ابتااسملو تااج مأكد هدرتو.. واخا حاس بالغيرة حيت بالنسبة ليه هو رااه كايتغزل بمراتو ويذكر محااسنها قداامو... ماهاموش شكون هو... المهم هبة ماايشكرها حد وماايلوومها حد... حط يدو على يد نسيبو ونطق: بنتك هي بنتي داابا... وكيف مااكنتي مسؤول عليها وحريص على سلاامتها التسعطاش لعام للي دازو... أنا كانوااعدك غانشد بلااصتك ونكون مسؤوول عليها وحريص على سلاامتها السنين كاملة للي غاتعيشها من هنا لقداام...
تنهد باها بارتيااح مبتااسم: لهلا يخطيك أولدي.... هااد الشي راه بااين أو وااضح...
سكت شوية وتااج كايستنااه يهضر حيت عاارفو بااغي يقول شي حااجة: هبة داابا مرااتك.. ورجع عندك الحق فيها قانونياا.. ولكن..
تااج: عمي خوود رااحتك دوي شنو بغيتي تقوول؟؟
تنحنح بحرج: بصرااحة أولدي.. نتا مربي على بررا غايجيك هاد الشي غريب.. وخصوصا أنك ماشي ولد الشرق..
تااج: شناهو هااد الشي للي غايجيني غرييب؟
مهدي: حنا هنا.. الناس ماكاتعتارفش بالعقد بحال كيف ما كاتعتارف بالعرس... يعني لبنت وااخا تعقد... كاتسماا عاازبة حتى دير العرس... أنا ماكانفرضش عليك شي حااجة.. ولكن حتى حد ماضاامن شنو ممكن يوقع من بعد.. شحال من وحدة هنا.. سلمات راسها لراجلها قبل العرس.. ومن بعد وقعو مشااكيل فرقوهوم وتسماات ماكاتسوااش وتنبداات.. كاينة للي صدقات حاملة كااع... والإشاعات سلااح فتااك... والبنت أغلى مااعندها هما كراامتها وشرفها...
كايدوي بحرج من الموضووع.. على قبل مصلااحة بنتو: أنا ماغانبززش عليك.. ولكن حسبو طلب... إلى كاان ممكن.. غير حتى ديرو العرس..
جاوبو بابتساامة: موااعد بنتك من قبل... وغانوااعدك حتى نتا.. مااغانقيسها حتى تبغي هي وترضى نتاا... أنا مابغيتهاش على قبل شي حااجة من غير رووحها وقلبها ونيتها وضراافتها.. ضور رااسو كتيشووف فيها بنفس الإبتساامة: وملاامحها.. وعينيها العربيين...
غمض مهدي عينيه بارتيااح.. كل مرة كايزيد يتأكد بللي هذا هو الرااجل للي تستااهل بنتو...
...
واحد الملااحظة: فالشرق هااكا.. يمكن تجيكوم غريبة.. ولكن راه العرس بمثاابة إشهاار... والعقد ماكايكونش كاافي... والبنت هنا مللي تخللي رااجلها يقيسها غير حييت عاقدين كادير غلااط كبير.. حتى حد مااضاامن الزوااج.. أما إلى دارو العرس حتى إيلا طلقاات رااه دوزاات ليلة الدخلة
العشية كااملة وهما جالسين.. حتى بدا الليل يطيح.. قررو الرجاال يرجعو فحالهوم... ولبناات جلسو...
كانو مجموعين فالصالون....
هبة: بابا لوكان غير جلستي تباات
مهدي: لا أبنتي.. غاانمشي داابا.. غدا تجي ياك؟؟
هبة: آه أبابا.. غدا.. غاندوز معاكوم هاد الأيام للي بقاو.. حتى لبنات غايدوزوهوم مع وليديهوم
مهدي: مزياان... سلم عليها: يالله نخلليك تهلااي فرااسك.. وفرااجلك أبنتي...
هبة: إن شااء الله أباابا...
......
غزلان: نتوما غاتجلسو باش تنفااردو بعرساانكوم وتبااركولهوم ويباركولكوم أنا علاش غانجلس.. غانمشي.. باش يالله نوجد رااسي
كوثر: لا اصااحبتي غانباتو سهراانين وبغيناك تبقااي معانا... مريم دوي معاها رااه راسها قصااح ورجعات كاتعصبني.. كانت كاتسمع للهدرة.. تبدلتي بززاف أصااحبتي
مريم: كيفااش نباركولهوم ويبااركولنا؟؟ نتي ماالكي..؟؟ ماتزوجتيش؟؟ من نهار درتو العقد مادويتو مع بعضيااتكوم.. آش هاد العبث؟؟
غزلاان بحدة: ماعندنا فاش ندويو..
قااطعها وااقف حداها كايشوف فيها بقسوة مخنزر وجهو كاايخلع: كااين فااش ندويو.. ونتي مااغاتخرجيش من هنا...
سرطات ريقها بعصبية: غاانخرج.. ماعاجبنيش نبقا هنا.. من حقي
فاارس: إلى ماعاجبكش تبقاي هنا نمشيو لداري..
غزلان: وبآشمن صفة غانمشي معااك؟؟ ونتا بآشمن صفة كاتحكم فيا؟؟
هز صبعو جهتها: تمشي معايا بصفتك مرااتي.. ونتحكم فيك بصفتي رااجلك...
غزلاان: رااجلي..؟؟!! مرااتك..؟؟!! ههه.. زوينة هذي
فارس: يا غاتبقاي هنا ياا غانمشيو لداري.. حاجة أخرى والله لا كاانت.. ونتي عاارفة مللي كانحلف مااكانحنتش...
عضات على شناافتها معصبة ورجعاات اللور جلساات على الفوتوي كااتنفخ.. وهو بقا متبعلها العين مخنزر... ومن بعد عطاهوم بالظهر خاارج للجردة...
..... توادعو مع نسابهوم.. وصافطوهوم فرحاانين وراضيين فالطومو مع الشيفوور.. مللي تكاتبو حطو الشيكاات دياال الصدااق.. بنفس المبلغ... داوهوم معااهوم.. ماغايمسوهومش.. بالنسبة ليهوم هذاك رزق بناتهوم وهما للي من حقهوم يتصرفو فييه..
........
لعشا كاايشهي... الطبلة الطويلة عاامرة... كل كوبل بووحدو.. كايوشوشو بيناتهوم... من غيرهوم هما للي كايااكلو فصمت.. هو حااضيها بنص عين وهي كااتقلب بالفورشيط فالطبسيل... حتى قفزوها انفاسو للي ضربو فوذنها: كل وحدة غاتبات مع رااجلها فالبييت.. كاننصحك تمشي معايا بلا صدااع ولا مشااكيل..
ضترت كاتشوف فيه باستغرااب: لفين غاانمشي معااك؟؟
فاارس بضحكة شريرة: لداارنا أمرااتي...
زيرات على الفورشيط بيدها كاتحاول تحكم فراسها قبل ماتلصقلو داك الطبسيل مع وجهو: هذيك داارك بووحدك وأنا مااشي مرااتك... وكانقسمليك بالله من هنا مانخرج هااد الليلة.. شافت فيه: وراه حتى أنا مااكانحنتش إلى حلفت...
فاارس ببرود: الله أودي.. وشكون يحنتك ألعمر؟؟ وااخا نبااتو فشي بييت هناا...
غزلاان: مااباغاش نباات مع..
قااطعها: ماتشااورتش معااك.. ونقسم بربي حتى نباتو بجوج فنفس البييت... يالله جات تدوي حط صبعو على فمو مخنزر بطريقة خوفااتها: ششش.. ولا كلمة...
سرطات هدرتها ورجعاات خشاات وجهها فطبسيلها كاتااكل لقمة فسااعة