ဖဝါးထက်က ပုလဲသွယ်

ဖဝါးထက်က ပုလဲသွယ် (၁၈)

Translation of Pearl In The Palm.

ဖဝါးထက်က ပုလဲသွယ် (၁၈)

Translator - Jinnie Grace

________

"ယဲလီကျူး"

အရပ်ရှည်ရှည်နှင့် ခံ့ညားသောအမျိုးသားက မှင်ရည်ရောင်ဝတ်စုံကို ဝတ်ဆင်ထားသည်။

ယဲ့လီကျူးကတော့ ထိုလူ၏ မျက်ခုံးများကအစ အေးစက်နေသည်ဟု ထင်မိသည်။ သူ့ပုံစံက ဘာကိုမှ ဂရုမစိုက်သည့်ဟန် ပေါ်နေတာမို့ တစ်ဖက်သို့ လှည့်သွားတာနှင့် သူမနာမည်ကို မေ့သွားတော့မလိုပင်။

ထိူသူက သူမနာမည်ကို မေ့သွားမှာကိုတော့ တကယ်ကြောက်မိသည်။ သူမက မျက်နှာလေးကို မော့ကာ လှပသောမျက်လုံးဝိုင်းကြီးများနှင့် သူ့ကိုကြည့်ရင်း နူးညံ့စွာဆိုလိုက်သည်။ "ကြာပန်းထဲက ကြာစေ့လုံးလေးတွေနဲ့တူတဲ့ လီကျူးပါ"

တိရှောင်းက ပြန်ဖြေသည်။ "ငါမှတ်မိပြီ"

ယဲ့လီကျူးသည် အနည်းငယ်ပြုံးသွား၏။

တိရှောင်းလည်း လှည့်ထွက်သွားတော့သည်။

သူပြန်သွားတော့ အင်အားကင်းမဲ့သွားမှုကို သူမနောက်တစ်ဖန် ခံစားလိုက်ရပြန်သည်။

သူမကို တိရှောင်းက တကယ်ကိုလွှမ်းမိုးထားတာပဲ။

ယဲ့လီကျူးက ခေါင်းအုံးလေးကို မှီကာ နဖူးကိုလက်နှင့်ဖိထားလိုက်သည်။ သူမ အနည်းငယ် အိပ်ချင်လာတာမို့ မျက်လုံးမှိတ်ထားရင်း ဖြည်းဖြည်းချင်း အိပ်မောကျသွားတော့သည်။

သူမနိုးလာတော့ ဟိုဖက်အခန်းက ယုရှားကို ခေါင်းလောင်းတီးကာ ခေါ်လိုက်သည်။ ထို့နောက် သူမကို ပြန်လည်ပြင်ဆင်ပေးဖို့ စောင့်နေလိုက်တော့သည်။

ယဲ့လီကျူးက မှန်ထဲကို ပျင်းရိစွာကြည့်လိုက်သည်။ “ဘယ်အချိန်ရှိနေပြီလဲ ဘယ်နှနာရီမှ ပြန်ရမှာလဲဟင်”

ယုရှားကဆိုသည်။ “နေ့လယ်မှာ စားသောက်ပွဲ ရှိသေးတယ် သခင်မလေးရဲ့။ ညစာစားပြီးရင်တော့ ပြန်လို့ရပါပြီ။ မားမားလျန်ရှင်းလည်း ခုနကမှထွက်သွားတာ။ သူက ပြောသွားသေးတယ်။ သခင်မလေး နိုးလာရင် မိဖုရားခေါင်ကြီးရဲ့ ကျောက်ယန်နန်းဆောင်ကို ခေါ်လာခဲ့ပါတဲ့။ နူးဘီတို့ ဒီကနေ နန်းဆောင်ကို လှည်းနဲ့ သွားလို့ရတယ်”