ဖဝါးထက်က ပုလဲသွယ်

ဖဝါးထက်က ပုလဲသွယ် (၄၆)

Translation of Pearl In The Palm.

ဖဝါးထက်က ပုလဲသွယ် (၄၆)

Translator - Jinnie Grace

_______

နောက်ရက် ယဲ့လီကျူးနိုးလာတော့ လန့်သွားသည်။

အိပ်ရာတွေက ရှုပ်ပွနေကာ ထူးဆန်းသောရနံ့တွေလည်း ရစ်ဝဲနေသောကြောင့် သူမ မသက်မသာ ခံစားလိုက်မိသည်။

သူမ လည်ပင်းတွေလည်း ခြောက်သွေ့နေ၏။ မနေ့ကဖြစ်ရပ် ကအတော်လေးများသည်။ သူမလည်ပင်းကို ကိုင်ကာ တိရှောင်းကို မငြင်းနိုင်ခဲ့ပေ။

မနေ့က သူအတော်ကြီး စိတ်တိုနေတာကို သူမသိသည်။ သူမ သူ့ကို လိမ်မိတာ မှားသွားမှန်းသိသော်လည်း အမှန်တရားကိုတော့ မပြောနိုင်ပေ။

သို့သော်သူက သူမကို အရမ်း ကြမ်းကြမ်းတမ်းတမ်းကြီးတော့ မလုပ်ခဲ့ပေ။ မဟုတ်လျှင် သူမ အိပ်ရာပေါ်ကတောင် ထနိုင်မှာမဟုတ်။

သူမကို ချော့နေစဉ်ကလည်း နဖူးလေးကိုနမ်းသွားသေးသည်။

ဟိုက်ထန်က အခန်းထဲဝင်လာတော့ မနေ့က မင်းသားချင်နှင့် ယဲ့သခင်မလေးများ အတူ နေပြီးသွားကြပြီလားဟု တွေးလိုက်မိသည်။ ဆေးများ ယူလာပေးရဦးမလားဟုတောင် စဉ်းစားနေမိ၏။ သို့သော် သူမသည် တိုက်ရိုက်တော့ မမေးရဲသည်မို့ “သခင်မလေး ရေယူဦးမလားဟင်”

ယဲ့လီကျူးက အင်းဟုပြောကာ အသံအက်အက်ဖြင့်။ “ရေကို ကန့်လန့်ကာရှေ့မှာထားခဲ့ပြီးသွားတော့။ တခြားဘယ်သူ့ကိုမှ ဝင်မလာစေနဲ့”

ဟိုက်ထန်က ဟုတ်ကဲ့ဟုဖြေလိုက်သည်။

ယဲ့လီကျူးရေချိုးနေတုန်း အိပ်ရာကို အမြန်သိမ်းပေးလိုက်ကာ နံ့သာအိုးထဲသို့ အမွှေးခဲလက်တစ်ဆုပ်စာ ကျဲချလိုက်သည်။

ယဲ့လီကျူးက ရေစိမ်နေရင်း မျက်စိကို မှိတ်ထားသည်။ သူမက ဟိုက်ထန်ကို ဆေးယူလာပေးဖို့လည်းပြောလိုက်သည်။

တစ်နာရီလောက်ကြာတော့ သူမ ရေထဲက တက်လာသည်။

အခန်းထဲတွင် ကိုယ်လုံးပေါ် ကြေးမုံအကြီးကြီး ရှိသည်။ မိန်းကလေးတွေက အလှကြိုက်သည် ဆိုသောကြောင့် ယဲ့ဖူအန်းက ငွေကြေးများစွာကုန်ကျခံကာ တည်ဆောက်ထားပေးခြင်းဖြစ်သည်။