ဖဝါးထက်က ပုလဲသွယ်

ဖဝါးထက်က ပုလဲသွယ် (၁၇)

Translation of Pearl In The Palm.

ဖဝါးထက်က ပုလဲသွယ် (၁၇)

Translator - Jinnie Grace

________

တိရှောင်းက လေးနှင့်မြားကို ချလိုက်ပြီး ယဲ့လီကျူးကို ကြည့်လိုက်သည်။

အကွာအဝေးကြောင့် သူဒီဖက်ကို ကြည့်နေသည်ဆိုတာကိုပဲ ယဲ့လီကျူး သတိထားမိပြီး သူ ဘယ်သူ့ကို ကြည့်နေလဲဆိုတာကို‌တော့ သူမ မသိပေ။

သူမမျက်တောင်ဖျားလေးတွေ တုန်ယင်သွားပြီး လက်ဖက်ရည်ကိုပဲ ငုံ့သောက်နေတော့သည်။

တိရှောင်းလည်း မျက်လွှာပြန်ချလိုက်ကာ မြင်းဇက်ကြိုးကိုဆွဲပြီး ကွင်းထဲက ထွက်သွားလိုက်တော့သည်။

ပွဲကြည့်စင်တစ်ခုလုံးက အမျိုးသမီးများ၏မျက်လုံးထဲတွင်‌တော့ တိရှောင်းကိုသာ မြင်နေကြသည်။

ငယ်ရွယ်ခံညားချောမောသော မင်းသားချင်က ဘုရင်အကြောက်ဆုံးသောသူတစ်ယောက် ဖြစ်သည်။ ဘုရင်ရှေ့တွင် ဒူးမထောက်သလို အိမ်ရှေ့မင်းသားကလည်း သူ့ဖက်ပင်။ မင်းသားချင်ပေါ်လာတိုင်း မင်းသားတွေအားလုံးကိုလွှမ်းမိုးသွားသည်မို့ ဘုရင်ကြောက်တာလည်းမဆန်းပေ။

မင်းသားချင်က မိန်းမတွေနှင့်လည်းမရင်းနှီးသလို ပင်ကိုယ်ကိုက အေးစက်သူမို့ သူ့ကိုကြောက်လန့်ကြသည်။

တစ်အောင့်လောက်နေတော့ မင်းသားချင်က အဝတ်ပြန်လဲလာကာ အေးစက်သော မျက်နှာထားကြီးနှင့် ထွက်လာသည်။

ကျောက်ယွင်လည်း သူ့ဘေးနားသို့ ရောက်လာ၏။ “ဦးရီးတော် နောက်ပွဲကျ မပါတော့ဘူးမလား”

တိရှောင်းက ခေါင်းညိတ်ပြ၏။

“ကျောက်ယိက အရှက်ကွဲသွားပြီဆို‌တော့ မင်းကို လာယမ်းတော့မှာ။ ဘာမှသနားနေစရာမလိုဘူး။ သတ်ချင်ရင် သတ်ပစ်လိုက်။ မင်းနောက်မှာ ငါရှိတယ်”

ကျောက်ယွင်က ပုံမှန်မင်းသားတွေလိုပင် ကောင်းမွန်စွာ မွေးဖွားခဲ့ကာ လက်ရုံးရည်ရော နှလုံးရည်ရော ကောင်းသည်။ သူ့တိုက်ရည်ခိုက်ရည်ကတော့ တိရှောင်းကိုယ်တိုင် လေ့ကျင့်ပေးထားသည်မို့ သူများတွေထက်တော့ နှာတစ်ဖျားသာနေသည်။