ဖဝါးထက်က ပုလဲသွယ်

ဖဝါးထက်က ပုလဲသွယ် (၇၉)

Translation of Pearl In The Palm.

Translator - Jinnie Grace

ဖဝါးထက်က ပုလဲသွယ် (၇၉)

________

လျိုရှီးတစ်ယောက် ဒီမနက်နိုးလာတော့ တစ်ခုခုဖြစ်တော့မလို ခံစားလိုက်ရသည်။

အနှစ်လေးဆယ်အတွင်း အတွေ့အကြုံတွေကြောင့် ခံစားမိနေပြီ။ ထို့နောက် သူမက တာအို ဝတ်စုံကို ဝတ်ဆင်လိုက်ကာ သူ့ဘေးက အစေခံလေးကို ပြောလိုက်သည်။ “ငါတို့ မနေ့က ယဲ့သခင်မအတွက် လုပ်ပေးတာတွေက အကျိုးရှိတယ်။ မင်းသမီးချင်က သာမန်လူ မဟုတ်တော့ သူသေတာနဲ့ တစ်မြို့လုံး သိမှာပဲ”

ထိုအစေခံက ပြောသည်။ “ကြည့်ရတာ လက်ထပ်လိုက်ရလို့ ပျော်နေကြတယ်ထင်တယ်။ စိတ်ရှည်ရှည်နဲ့ စောင့်ကြတာပေါ့”

လျိုရှီးက ပိုက်ဆံအရမ်းမက်သည်။ သူမက ပိုက်ဆံအတွက်ဆို အကုန်လုပ်သည်။ လွန်ခဲ့သည့်နှစ်နှစ်ကလည်း မျက်နှာမွဲမိန်းကလေးတွေကို စုကာ ချမ်းသာသော အိမ်တွေကို ငွေနှင့် ရောင်းစားသည်။ ထိုစဉ်က ဝူသခင်မက သူမကို ငွေသားသုံးထောင် ပေးခဲ့သည်။ စရံ အနေနှင့် ငွေတစ်ထောင်ပေးပြီး ယဲ့လီကျူးသေတာနှင့် ကျန်ငွေကို ပေးမည်ဟု ဆိုသည်။

ထို့ကြောင့် သူမက ယဲ့လီကျူးကို အရမ်းသေစေချင်နေခြင်းဖြစ်သည်။ သူမက သက်ပြင်းချကာ ဆိုလိုက်သည်။

”မင်းသားချင်က ကံအရမ်းကောင်းတယ်။ သူက ငယ်ငယ်ရွယ်ရွယ်နဲ့တောင် အာဏာအရမ်းကြီးတယ်။ ဆိုတော့ ယဲ့လီကျူးက သူ့ကံကို မှီခိုပြီးနေနေတာ ဖြစ်မယ်။ ဒီနေ့ ယဲ့အိမ်တော်ကို ထပ်သွားပြီး ယဲ့လီကျူး ပြန်ဖျားအောင် ထပ်ပြီး လုပ်ရဦးမယ်”

သူမ ပြောနေစဉ်မှာပင် အိမ်ရှေ့တံခါးက ဝုန်းခနဲ ပွင့်သွားသည်။

ဝတ်စုံနက်ဝတ်ထားသော သူများက ချက်ချင်းဝင်လာပြီး ခါးတွင် ကျောက်စိမ်းပြားချိတ်ထားသော သူက အမိန့်ပေးလိုက်သည်။ “ဒီတစ်ယောက်ကို ခေါ်သွားကြ”

လျိုရှီးတစ်ယောက် ချွေးစေးတွေ ပြန်နေလေပြီ။ “နင်တို့ငါ့ကို ဘယ်ခေါ်သွားမလို့လဲ။ ငါ ရုံးကို တိုင်မှာနော်”