ဖဝါးထက်က ပုလဲသွယ်

ဖဝါးထက်က ပုလဲသွယ် (၃၆)

Translation of Pearl In The Palm.

ဖဝါးထက်က ပုလဲသွယ် (၃၆)

Translator - Jinnie Grace

_______

အိမ်ရှေ့မင်းသားအတွက်တော့ အမှားတွေ အများကြီး လုပ်မိတာ ဒါပထမဆုံး မဟုတ်ပေ။ လွန်ခဲ့သည့်ရက်က ညီလာခံတွင် သူအတော်လေး အပြောခံခဲ့ရသည်။

တကယ်တော့ ကျောက်ယွင်က ငယ်သေးသည်။ အိမ်ရှေ့မင်းသားပလ္လင်တွင် ထိုင်ကာ များစွာသော မျက်လုံးတွေ၏ အကြည့်ဒဏ်ကိုခံရသည်။ သူ လက်လွတ်စပယ် လုပ်မိမည်ဆိုလျှင် ဝန်မင်းတွေ အပြစ်တင်တာ ခံရလိမ့်မည်။ ဘုရင်က ဒုတိယမင်းသားကိုတော့ ခပ်လွယ်လွယ်တာဝန်တွေ ခိုင်းကာ လူထုအသည်းနှလုံးကို အရယူထားပေးခဲ့သည်။ ကျောက်ယွင်ကိုတော့ မျက်နှာသာလုံးဝမပေးပေ။

ဘုရင်က ကျောက်ယွင် အမှားလုပ်မိမည့်နေ့ကို စောင့်နေကာ ထိုအမှားကို အခွင့်ကောင်းယူပြီး အမတ်တွေရှေ့တွင် နာမည်ဖျက်ပြီး အိမ်ရှေ့မင်းသားအာဏာကို ပြန်ဆွဲယူလိုခြင်းဖြစ်သည်။

ကျောက်ယွင်က အမှားပြုမိသူမို့ ဘုရင်အပြစ်တင်တာ သဘာဝကျပြီး ပြစ်ဒဏ် သေးသေးပေးလျှင်တောင် တိရှောင်းအဖို့ ဘာမှဝင်ပြောပိုင်ခွင့်မရှိပေ။

ဘုရင်က ကျောက်ယွင်၏သည်းခံနိုင်စွမ်းကို တစ်ရစ်ပြီးတစ်ရစ် ကျပ်ပေးနေခဲ့တာဖြစ်သည်။ ထို့အပြင် မင်းသားချင်လည်း မြို့တော်တွင်မရှိသည်မို့ ကျောက်ယွင်တစ်ယောက် အမှားလုပ်မိရန် ဖိအားပေးခံရ‌တော့သည်။

အိမ်ရှေ့မင်းသားက နှစ်လလောက် အချုပ်ကျခံလိုက်ရသည်မို့ သူ့အာဏာက ပျံ့ကြဲနေလေပြီ။ သူလွတ်လာတော့ ဆယ်လပိုင်းကုန်ပြီ။

ယဲ့လီကျူးကတော့ ဒါတွေမသိပေ။

ပုံမှန်ဆို မင်းသားနေနေ မင်းသမီးနေနေ ဘယ်လိုအမှားကိုပဲလုပ်လုပ် ယဲ့ဖူအန်းအဖို့ကတော့ သူတို့ကို ချက်ချင်း အမှားကိုထောက်ပြကာ ပြန်လည်ပြင်ဆင်စေမည်ဖြစ်သည်။ သို့သော် ဒီတစ်ခါတွင်‌တော့ ယဲ့ဖူအန်းက ယဲ့လီကျူးကို နန်းတော်ထဲသို့ တစ်ချိန်လုံးလွှတ်ထားသည်။ သူ့သမီးကို သွေးခုန်နှုန်းစမ်းပေးသော မျက်နှာကြောင့် ဖြစ်စေ၊ မင်းသားတို့ကြား မဝင်လို၍ဖြစ်စေ သူသိပ်ပြီး မဝေဖန်ပေ။