ဖဝါးထက်က ပုလဲသွယ်

ဖဝါးထက်က ပုလဲသွယ် (၂၀)

Translation of Pearl In The Palm.

ဖဝါးထက်က ပုလဲသွယ် (၂၀)

Translator - Jinnie Grace

________

ယဲ့လီကျူးက ထိုညက ဘာမှမစားသည်မို့ ဝူသခင်မက အစေခံရှင်းအာကို ဂရုစိုက်ရန်ပို့ပေးလိုက်သည်။

ညနေရောက်နေပြီ ဖြစ်သော်ငြား နေက ပူနေသေး၏။ ယဲ့လီကျူး၏ အိပ်ဆောင်က ယဲ့အိမ်တော်တစ်ခုလုံးတွင် အကောင်းဆုံးဖြစ်ကာ အခန်းက အရိပ်ရသည်မို့ အေးနေသော်လည်း ရေခဲမရှိသည်မို့ အပူရှိန်ကတော့ ရှိနေဆဲပင်။

ရှင်းအာက ဝူသခင်မ၏ လူယုံဖြစ်သည်။ သူမက မျက်လုံးနက်နက်လေးနှင့် ရုပ်လည်းချောသည်။ သူမက အဆောင်ထဲဝင်လာတော့ ယဲ့လီကျူးကို အရင်နှုတ်ဆက်၏။

“ဒီအစေခံက ပထမသခင်မလေးကို နှုတ်ဆက်ပါတယ်။ သခင်မက အဆောင်နဲ့ဝေးတာရော လုပ်စရာလေးတွေရော ရှိနေတာမို့ မလာနိုင်လို့ ဒီအစေခံက အစားလာနှုတ်ဆက်တာပါ။ သခင်မလေး တစ်နေ့လုံး သွားလာထားရတော့ပင်ပန်းနေမှာပေါ့ ခဏလေးနေပါဦးနော်။ သမားတော်ခေါ်ပေးပါ့မယ်”

ယဲ့လီကျူးက အနီရောင်နုနု ဝတ်စုံအပါးကိုဝတ်ထားပြီး အိပ်ရာပေါ်တွင် ပျင်းရိစွာ လဲလျောင်း‌နေ၏။ သူမ၏ ဆံနွယ်နက်တွေက ခုတင်အောက်သို့ ပုံကျနေ၏။

ယဲ့လီကျူးစိတ်တို့ ထိုင်းမှိုင်းနေသည်။ သူမနိုးလာခါစမို့ ဘာမှမစားဖြစ်ပေ။ သူမအခု စိတ်ကြည်နေတာ မဟုတ်သည်မို့ သူမကို လာနှုတ်ဆက်သည့်မိန်းကလေးအပေါ်တွင်လည်း အာရုံမရပေ။

ခဏလောက်နေမှ သခင်မလေးဆီမှ အေးစက်စက်အသံကို သူမကြားရသည်။

“ဝူသခင်မရဲ့ကြင်နာမှုကို မှတ်ထားလိုက်ပါ့မယ်။ ယုရှား သူ့ကိုပြန်ပို့လိုက်ပါ” ရှင်းအာက ပြံုးကာပြောလိုက်သည်။

“ဘယ်လိုလုပ်သခင်မလေးကို ထားခဲ့နိုင်ပါ့မလဲ ဒီအစေခံက သခင်မ‌လေးအခြေအနေကို ကောင်းမကောင်းကို ကြည့်ပေးဖို့လာရတာပါ။ ဒီအတိုင်းပြန်သွားရရင် သခင်မက သခင်မလေးအတွက် အရမ်းစိတ်ပူပြီး ထမင်းတောင် မစားနိုင်‌အောင်ဖြစ်သွားပါလိမ့်မယ်”

ယဲ့လီကျူးကတော့ လက်ကိုထောက်ပြီး ပြောလိုက်‌သည်။ “လိုက်ကာချလိုက်တော့”