ဖဝါးထက်က ပုလဲသွယ်

ဖဝါးထက်က ပုလဲသွယ် (၆၇)

Translation of Pearl In The Palm.

Translator - Jinnie Grace

ဖဝါးထက်က ပုလဲသွယ် (၆၇)

________

မိဖုရားခေါင်ကြီး၏ စိတ်ပူပန်မှုကို တိရှောင်းနားလည်ပါသည်။

သူမက ဘုရင်၏နာမည်ကို ပြောရတာကိုတောင် စိတ်တိုသည်။ ဘုရင်ကိုလည်း မုန်းသည်။ မိဖုရားရှန်ကိုလည်း မုန်းသည်။ ထိုလူနှစ်ယောက် သူမကို သိလို့ဖြစ်စေ မသိလို့ဖြစ်စေ ထိခိုက်စေခဲ့ခြင်းများကိုလည်း မုန်းသည်။

သို့သော် တိရှောင်းရှေ့တွင်တော့ ကိုယ့်ကိုယ်ကိုယ် ထိန်းသိမ်းထားခဲ့ပါသည်။

မိဖုရားခေါင်ကြီးက သူမမျက်ခုံးကို သူမ ဖိလိုက်သည်။ သူမက မငယ်တော့သော်လည်း ရုပ်ရည်သွင်ပြင်ကတော့ တောက်ပထည်ဝါနေဆဲပင်။ သို့သော် ရယ်မောနေသော မိန်းမငယ်လေးများနှင့်တော့ မည်ကဲ့သို့ ယှဉ်နိုင်ပါမည်နည်း။

နှစ်ပေါင်းများစွာ ကြာသည့်တိုင် ဘုရင်က သူမကို မချစ်ခဲ့သည်မို့ သူမကလည်း ဘုရင်အပေါ်စိတ်လှုပ်ရှားမှုမရှိ။ သူမက တော်ဝင်သွေးပါသူမို့ တခြားကိုယ်လုပ်တော်တွေလို ညုတာချွဲတာလည်း မလုပ်နိုင်ခဲ့ပေ။

သူမက နာနာကျည်းကျည်း တစ်ချက် ရယ်လိုက်သည်။ “တိရှောင်း မင်းမှတ်မိလား။ ငါမြို့တော်ကို လာတုန်းက ရှန်ကျိုးက ဖရိုဖရဲတွေ ဖြစ်နေတာ။ မင်းလည်း ငါ့ကို လိုက်ပြီး မစောင့်ရှောက်ပေးနိုင်ခဲ့ဘူး။ အရမ်းငယ်သေးလို့ ယွင်အာလောက်တောင် အရပ်မရှည်သေးဘူး။ ရှန်ကျိုးကလည်း အရမ်းခေါင်ပြီး အဲ့တုန်းက ခရိုင်စားကလည်း ဒီလောက် အာဏာမရှိဘူး။ ငါ မြို့တော်ကို ရောက်တုန်းက အနိုင်ကျင့်ခံရမှာ စိုးရိမ်ခဲ့တယ်။ အဲ့တုန်းက မင်းပြောခဲ့တာလေ။ အားလုံးက ရှန်ကျိုးနဲ့ ချင်ခရိုင်စားကို အထင်သေးနေကြတယ်ဆိုရင်တောင် ကျွန်တော်က မော်မကြည့်ရဲအောင် လုပ်ပေးမယ်လို့”

တကယ်လည်း တိရှောင်းက ပြောသည့်အတိုင်းလုပ်ခဲ့သည်။ သူက ငယ်သေးပြီး အတွေ့အကြုံ မရှိခဲ့သေးပေ။ ထိုစဉ်က ဘုရင်ကလည်း ရှန်ကျိုးကိုဆို ခွဲခြားဆက်ဆံခဲ့သည်။ သူစိတ်ပူတာက သူမြို့တော်ကို ရောက်လာလျှင် အစ်မလုပ်သူ အရှက်ရမှာကို စိုးရိမ်မိပြီး ချင်အိမ်တော်ကို အားဖြည့်ရန် ဆုံးဖြတ်ခဲ့သည်။