عشق الوحوش والشياطين

الفصل 46

انا هنزل فصل دلوقتي علشان انا فرحانه بصراحه وحبيت افرحكم انتوا كمان بفصل هيتكشف فيه شويه أسرار مستخبيه علشان بصراحه انتوا اتلخبطوا ا اوي استعدوا لكشف الأسرار استمتعوا الفصل 46
صلي على نبي الرحمه 💜
نظروا لهم ثواني بصدمه شديده تحولت إلى غضب أشد يكاد يفتك بهن وهن يقفن ويرتدين قميص وبنطلون جينز ويتركن شعرهن الطويل على ظهرهن ويبتسمن بتحدى
عدنان بلطم: احيه احيه هنموت كلنا
حاول الشباب يتحكموا في اعصابهم بس فشلوا وكانوا هيتحركوا ناحيه البنات بس دخل بسرعه جابر ووقف قدام البنات وبقي في النص وقال بهدوء لمحاوله تهدأت الشباب فهو ادري بمعرفة غيره العاشق وكيف يكون غضبها
'' اهدوا يا شباب ''
عدي بغضب: نهدي نهدي ايه ايه اللي عاملينه في نفسهم ده
ديانا ببرود: ده العادي
رسيل بتكمله: واه فعلا احنا مش محجبين
فهد بغضب: يا سلام وهو لعبه تلبسيه في وقت ما تحبي وتقلعيه وقت ما تحبي
جين: لا هو مش لعبه بس هو اتفرض علينا
الشباب: وده ازاي أن شاء الله
جابر بغيظ: اتنيلوا اقعدوا وانا هشرح ليكم
قعد الشباب وهو لا يزالون ينظرون إلى البنات بغضب جحيمي اما البنات يبتسموا باستفزاز شديد
تكلم جابر لقطع تلك النظرات
'' مبدأيا كده البنات فعلا اتفرض عليهم الحجاب علشان كده كانوا مستخبين في الحاره دي لبسوا الحجاب زي باقي الموجودين هناك وغيروا اسمهم للأسماء اللي انتوا عرفتوهم بيها اول مره وبما اني الورق بقى مكشوف هما ظهروا دلوقتي من غير حجاب وهما اصلا كانوا بيبقوا بشعرهم برا مصر أو برا حياتهم التانيه دي ''
مالك بضيق: وهما لبسوا الحجاب مستمروش ليه عليه
شغف: لأنه في شغلنا وانتوا عارفين ايه نظامه لازم منعرفش عن هوياتنا وكون اننا نلبس الحجاب دي حاجه تدل على أننا عرب وكمان مسلمين يعنى دي علامه مميزه
سليم : بس ده مش سبب يخليكم تتلاعبوا بالحجاب
جين: عندنا سبب أقوى من كده وربنا في الآخر غفور رحيم وعارف انه غصب عننا
نظروا لهم بعدم اقتناع والبنات بتحدى أكبر
جابر بحده: قوموا اضربوا بعض احسن امشيوا يا بنات من هنا حالا
البنات مشيوا ببرود تلحقهم نظرات الشباب الحارقة
جابر: اهدوا بقى ناقص تولعوا فيهم
فهد بغضب: انا عايز اعمل كده فعلا
جابر: اهدوا قولت الموضوع ابسط من كده
عدي بعصبيه: هو ايه ده اللي ابسط دول خرجوا من البيت بشعرهم انت ترضى مراتك تعمل كده
جابر: مرضاش بكده بس برضو هما غصب عنهم عارف انهم يقدروا يتصرفوا في طبيعه شغلهم بس فعلا عندهم أسباب أقوى وعلى فكره البنات عمري في يوم ما شوفتهم لبسوا ضيق أو قصير الا في حالات نادره دول حتى هما اللي بيعلموا البنات الأخلاق وعلموهم الحجاب وفوايده وبنات صحابي كلهم محجبين ماعدا 7 دول علشان ظروفهم
سيف بغضب شديد: لحظه بس 7 يعني شمس من ضمنهم
نظر الشباب له بتفشي
جابر: ايوه هي وملك وعشق هما 7 زي بعض في الظروف وهما دايما عارفين بيعملوا أيه وعمرهم ما عملوا حاجه غلط برغم جنانهم والمصايب اللي بيعملوها الا ان الكل يشهد بأخلاقهم
سكت قليلا الشباب لكن يشعرون بداخلهم بنار تحرقهم من فكره ان قد يرى رجل آخر شعر زوجته أو يرى جزء يظهر منها فقد الفكره فقد تجعلهم يكادون يحرقون البنات حيين
جابر: هههههههه على فكره البنات نادرا ما بيخلوا شعرهم مفرود كده دايما يبقى مربوط بس هما عايزين يستفزوكم انا عارفهم مستفزين جدا
سليم : هو انت بتضحك وتفقع مرارتنا
جابر بضحك: هههههههه بصراحه الموضوع يستدعي الضحك ده انتوا هتشوفوا ايام ما يعلم بيها الا ربنا انتوا 5
أدهم نظر لعمه وقال: والله يا عمي شكلي هضحك كتير الايام دي ههههههههههه
ضربه سيف بالملف على راسه بغيظ وضحك أدهم أكثر
..........................................
تاني يوم كان سيف يجلس في مكتبه بالشركة ينظر للسماء من خلال الزجاج يفكر بكل ما يحدث حوله واهمهم ما يحدث لأخيه يجب أن يعرف ما حدث في ذالك الوقت
⚡⚡⚡⚡⚡
سيف بهدوء: ادخل
دخل أدهم وقال بهدوء شديد
'' سيف عمر برا ''
سيف بغموض: دخله يا أدهم
اقترب أدهم منه وقال: فكر قبل ما تتصرف هو جيه لحد هنا علشان يقولك الحقيقه اسمع منه الأول
ابتسم سيف بهدوء: دخله يا إعصار
تنهد أدهم وذهب للخارج ولا يعلم ما يفكر به صديقه
دخل عمر وهو يشعر بالتوتر الشديد كان خائف من تلك اللحظه وها قد أتت وقف عمر أمام المكتب وهو يفرك يده بتوتر وقلق من سكوت أخيه واخيرا قرر التكلم
'' اسف يا سيف والله كان غصب عني مكنتش اعرف غير أنه برشام للصداع ''
تجمعت الدموع في عيون عمر وهو يشعر بالانكسار فهو يعتبر سيف ابيه وليس أخيه الكبير وكونه الآن خسر ثقه أهم شخص في حياته تشعره بالانكسار الشديد
وقف سيف وأقترب من عمر واخذه في حضنه بقوه يقول بصوت حنون فسيف  رغم أنه صعب التعامل الا انه حنون الا ابعد درجه
'' اهدي يا عمر وبطل عياط انت راجل يلاه ''
شد سيف عمر واجلسه على الكنبه في المكتب وجلس أمامه على الكرسي
'' انا عايز افهم امتى وازاي ده حصل وازاي اتعالجت في مستشفى عسكري ''
عمر: حاضر هحكي ليك كل حاجه
وبدأ عمر الكلام
'' من حوالى اكتر من 6 سنين لما كنت أولى كليه مكانش عندي صحاب بس اتعرفت على واحد اسمه سامح بس مع الوقت عرفت انه مصاحب شله فاسده وبتاعت برشام وكده فبعدت عنهم واتعرفت في محاضره من المحاضرات على ياسين وبقيت انا وهو صحاب جدا وبعد كام شهر عرفت انه اخوه مات بس مكنتش اعرف انه أدهم عمي حسن دخل في غيبوبه وياسين كان معاه دايما وكانت شمس برضو بس هي كانت غريبه في أول يوم جالها انهيار بس لما فاقت كأنها بقيت واحده تانيه وكانت هاديه جدا بس كنت احيانا بشوف معاها أشخاص تانيه في الأول مكنتش اعرفهم ومحبيتش اني ادخل لاني علاقتي في الوقت ده كانت مع ياسين بس واتضح اني الأشخاص دول كانوا ملك وعشق ومراد ويامن وولاد عمها ماجد وأكمل وكان في 4 بنات تاني واللي اتضح بعدين ليا انهم البنات عمك عمار كان في نفس المستشفى فكنت انا وابوك معاه وفي يوم ياسين شرب عصير بس كان مسموم فاتلف الكبد عنده واتحجز في المستشفى في الوقت ده انا كنت بروح المحاضرات وابقى مع ياسين وعمك في المستشفى فكنت مش بنام غير 3 ساعات في اليوم وده خلي عندي صداع شديد في يوم شافني سامح وعطاني شريط برشام وقالي انه للصداع عدي اسبوع وانا كنت باخد من البرشام ده على اساس انه للصداع وكنت باخد مرتين في اليوم في يوم دخلت عند ياسين وكانت شمس عنده في الوقت ده حاولت اتكلم معاه معاها بس هي كانت هاديه وجامده جدا ولا كأنها طفله لسه عندها 13 سنه حتى ياسين كان مستغرب خرجت علشان اجيب لها اكل والصداع زاد عليا فخرجت شريط البرشام بس وقع مني وجيه تحت رجل واحده شعرها احمر لما رفعت رأسها شوفت 6 بنات في نفس السن اللي هو أقل من 15 سنه وشمس من ضمنهم بس كانت عيونها مختلفه ودي كانت ملك بس اللي خلاني اتخض اني شمس خرجت من الاوضه ومسكت الشريط وقالت ليا
ترمادول انت بتاخد ترامادول يا عمر
وقتها مكنتش فاهم حاجه وتعبان جدا فاغمي عليا من التعب ولما صحيت لقيت نفسي في اوضه غريبه وفيه كتب وأفلام وسرير وشباك فضلت اليوم كله مش فاهم حاجه وفي آخر اليوم دخلت عليا شمس وفهمتني اني كنت باخد مخدرات واني هفضل في المستشفى دي اتعالج تعرف اكتر حاجه وجعتني يا سيف اني بنت لسه مكملتش 15 سنه بتعرفني غلطي خرجت بعد اسبوعين لاني كنت لسه في البدايه ورجعت لياسين اللي كان عرف بموضوع انه عنده عيله وأنه ملك وعشق عايشين وكمان ملك اتبرعتله بجزء من كبدها انا اعتذرت ليه عن غيابي وحكتله عن كل حاجه بس هو ده كل اللي حصل الوقت ده والله ما كنت اعرف يا سيف انه مخدرات ''
نظر له سيف وقال بحنان
'' آسف اني مكنتش جمبك الوقت ده ''
نظر له عمر بصدمه هل يعتذر منه الوحش ام يتوهم
أخذه سيف في حضنه يقول
'' آسف يا عمر اني وقتها انشغلت عنك ''
عمر بسرعه: لا متعذرش انا برضو غلطان اني اخدت الشريط من سامح وانت كنت مضغوط وقتها في شغلك يا سيف انا اللي آسف
ابتسم سيف لأخيه وهو يفكر في كل ما حدث وقتها لما كانت مليكه جامده هكذا برغم سنها يبدو أن حدث الكثير بعدما ترك صغيرته
..........................................
بعد يومين
كان يجلس الشباب يعملون على آخر التطورات في القضيه وكان اكمل وعدنان معهم حين سأل أدهم اكمل فجأه وقال
'' اكمل هو عشق وملك كانوا فين الفتره اللي اختفوا فيها ''
نظر له اكمل طويلا وقال
'' كانوا في روسيا يا أدهم في غابه كده بعيده وفي وسط الغابه دي قصر شكله يخوف بصراحه من برا بس من جوا عينك ما تشوف النوم جنان آخر حاجه منهم هما الاتنين وليه لأ مش هما من العصابه ''
عدي : نعم
عدنان: ايوه العصابه 8 أفراد 5 البنات ومصطفى وملك وعشق الباقي
أدهم: طب وده قصر مين
اكمل: ده قصر يوسف السيوفي عم شغف وجايبين ليوسف الضغط بمساعدة معتز وموده ولاده
ظهر صوت فجأه من اللاب الخاص بعدنان وكان صوت رسيل
فهد : بتعمل ايه يا عدنان وايه الصوت ده
عدنان: براجع الكاميرات اللي في المكتب وده صوت رسيل والبنات يوم ما اخدوا أوامر يروحوا الكتيبه عندكم
مالك : طب عيد الفيديو من الاول وهات اللاب
عدنان بص لاكمل
'' امممم خلاص ماشي بس هو تسجيل الوقت ده بس ''
فتح مالك الفيديو وعدل وضعيه اللاب بحيث الكل يشوف
داخل الفيديو اليوم ده
Flash
كان جابر قاعد مع جلال ويوسف وعز وإبراهيم فقال جابر
'' إبراهيم انت قولتلهم على المهمه الجديده ''
إبراهيم: ايوه واكيد جايين في الطريق و....
انفتح الباب بقوه لتدخل عاصفة
'' بقى عايزين تخلصوا مننا تقوم تودونا الجيش''
عز: اهدي يا جين وبعدين ايه يعني هي دي اول مره تاخدوا مهمه جديده
شمس: لا مش اول مره بس جيش لا
يوسف: لأ ليه يعني
شغف: علشان حر والتزام بالمواعيد والاكل في معاد والنوم في معاد ابعتوا حد غيرنا
جابر: مينفعش عايزين دكاتره وانتو دكاتره
ديانا: ابعتوا ولادكم وانا هاعمل ليهم شهادات تثبت انهم في طب واعملوا اللي انتوا عايزينه اما احنا في الجيش No
@ ولا ليه أن شاء الله
شمس : انتوا جايبين زين يقنعنا لا يا زين مش هنروح
زين: هتروحوا دي أوامر
رسيل برفعه حاجب: الأوامر مش علينا وانتي عارف
زين: هههههههه لا دي أوامر من فوق من آدم يعني ملزمين تنفذوها
جين: هي ملك وعشق معانا
عز: لا انتوا 5 ومعاكم عدنان بس وأعتقد عارفين ايه هي التفاصيل
شغف: تفاصيل ايه انتوا بعتوا أسمائهم ونظام المهمه بس شكلهم ايه دول
جلال: لما تروحوا هناك هتعرفوهم المهم هتروحوا
شمس بضيق: ماشى هو اسبوع نقدر نتصرف فيه
جلال بسخريه: اسبوع ايه معاكم من 3 لـ 5 شهور هناك
البنات بذهول: نــــعــــــم
رسيل مسكت جلال من هدومه بعصبيه
'' نعم نعم نعم 5 شهور ليه يعني بنراقب مافيا دي أطول مهمه اخذناها مكملتش اسبوع ليه يعني 5 شهور ''
جلال: الله يخربيتك هتخنقيني ابعدي
زين بعد رسيل
شمس : احنا مش هنروح نقعد 5 شهور في مكان واحد ليه أن شاء الله
جابر: هتروحوا واجباري
شغف: بقولك ايه محدش يجبرنا على حاجه احنا مش عايزينها ماشي يا جينرال
زين بغموض: وانا قولت هتروحوا
شمس قربت منه
'' ناوي على يا زين ليه مُصر نروح انا مش مطمنه ''
زين: انا مش ناوي على حاجه بس لازم انتوا تروحوا لاني الباقي مشغول
ديانا: اممم هنعمل نفسنا مصدقين امتا بقى
جابر: بعد اسبوع تكونوا هناك مع باقي الدكاتره وهيوصل ليكم التكليف لحد البيت
جين: البيت؟! ليه هنروح بأي شخصيه
عز: شخصياتكم اللي هي روان وحبيبي وأمل وآيات وشمس مارسوا حياتكم التانيه
نظروا لهم طويلا بنظرات غريبه ليقول أبراهيم بتوتر من نظراتهم
'' ايه بتبصولنا كده ليه ''
شغف بشك: ما تقولوا انتوا عايزين ايه بالظبط بدال اللف والدوران اصل ظباط جيش في كتيبه مهمه زي دي اكيد ثقه ومش محتاجين شهور علشان ندرسهم
زين: اهو احنا مش عايزين غير كده
شمس : اممم مش مصدقه برضو بس هنروح لاني عندنا فضول بصراحه انتوا عايزين ايه بالضبط من هناك بس اقسم بالله لو حصلت حاجه غير اللي مطلوب مش هتعدي على خير ابدا
جابر: لا متخافوش يلا اتكلوا على الله بقى واه إياكم تعملوا مصايب هناك انتوا في الجيش مش في أي دوله اجنبيه
عز: يعنى مصايب لا
إبراهيم: كوارث ممنوع
يوسف: جنان مش عايزين
جلال: الجيش مش لعبه ده نظام يعني اذا تكرمتوا قليلوا من مصايبكم
زين: بلاش جنان هناك
رسيل: خلاص بقى احنا لو قرود مش هتعملوا كده
جلال: انتوا العن ده انتوا العصابه يلا بقى من هنا
البنت خرجوا وقال يوسف
'' زين انت متأكد من اللي هتعملوا ده ''
زين بغموض: ايوه آدم بيقول هما دول
جابر: زيــــــن البنات لو افتكروا حاجه هناك هتحصل كارثه احنا في غنى عنها
زين: لا متخافش انا هكون معاهم وكمان المجهول هيراقب من بعيد
عز: انا مش فاهم مين المجهول ده
زين قام: مش مهم يا عز سلام
Back
الفيديو خلص والشباب الحيره تملكتهم بسبب الغموض اللي كان في آخر الفيديو لكن قطع تفكيرهم دخول عمر وهو يقول
'' ياااه الوحوش هلا هلا هلا 3 هلا والله ''
مالك: ايه يا حيوان مش فيه باب تخبط عليه
عمر بمرح: معلش معلش المره اللي جايه بصوا بقى مين جيه
اكمل وعدنان وقفوا
'' قبل ما تدخلهم نمشي احنا لاني فيه شغل اتطلب مننا عايز يخلص ''
سيف : روحوا انتوا
عدنان وأكمل مشيوا وقال عمر
'' احم احم بصوا مفيش حاجه ببلاش ''
فهد : عايزنا ندفعلك فلوس يا ابن الجارحي
عمر: لا فهمتوني غلط لو كان عليا مش عايز غير تدافعوا عني لو البنات عرفوا علشان مش هيرحمونا احنا 3 اما هنا وعنان فادفعوا ليهم بقى شيكولاتة  علشان هما بيموتوا فيها
سليم : لو على الشيكولاتة سهله ولو فلوس سهله برضو بس نعرف اي حاجه عن المجانين دول عقلي قرب يشيط
عمر: يا عيني حالتكم بقيت صعبه قولنا ليكم بلاش العصابه انتوا بقى اصريتوا
عدي مسك حاجه من على المكتب وحدفها على عمر بغيظ
عمر: اااااااه خلاص يا عم ادخلوا
دخلت هنا ومعها بنت محجبه سمراء وعيونها سوداء
عمر: أقدم ليكم....
عنان بغيظ: ليه يا اخويا لسانتنا اتقطعت منعرفش نعرف عن نفسنا
عمر: انا غلطان واستاهل ضرب الجذمه
هنا: احم احم احم انا هنا عادل الشرقاوي ودي بنت عمتي عنان ماهر المنشاوي
سيف باستغراب: ماهر المنشاوي انتي اخت فادي
عنان بغرور مصطنع: مكنتش اعرف اني مشهوره كده
هنا بقرف: اتنيلي دول صحاب فادي وكانوا مستغربين يس تشابه الأسماء
عنان: رخمه
أدهم : بس هو انتوا تعرفوا ايه البنات أو بمعنى أصح اشمعنا انتوا
هنا: لاني احنا نبقى مساعدين البنات في شغل الشركات وكده
عنان: وبما اني احنا من الشله فعارفين عن حياتهم العمليه والشخصية اما بالنسبه لشغلهم في المخابرات فابقوا اسألوا مراد ومروان هما أعلم أو حتى اكمل
مالك: عمر هو انت شغال معاهم
عمر: لا علشان انا شاهد على بلاويهم هما 7 وبعدين اشتغل برا ليه يعني ابقى مفحوت في شركه ابويا واروح كمان برا ده انا اصلا مش مستوعب لحد دلوقتي ياسين ازاي بيشتغل عندنا وفي نفس الوقت شايل شركات العيله مع ماجد ويامن
هنا: ما هو الدنجوان مش من فراغ
سليم : طب سمعونا بقى تعرفوا عنهم ايه
عنان: بصوا بقى مفيش حاجه ببلاش
عمر: مش قولتكم
ابتسم فهد : عايزين ايه
هنا: حاجتين بس الأولى بوكسين كبار شوكولاته واحد ليا والتاني لعنان
عدي : سهله والتانيه بقى
عنان: التاني بقى ودي الأهم اني البنات يوم ما يعرفوا اننا اتكلمنا معاكم عنهم اكيد هيجيبوا أجلنا فانتوا بقى دافعوا عننا
مالك: للدرجه دي خايفين منهم
هنا: اسكت انت متعرفش أيديهم عامله ازاي
سليم : ههههههه ماشي اقعدوا احكوا بقى
قعدوا وبدأت هنا الكلام
'' احم احم شخصياتهم هما 7 كده مختلفه عن بعض بعيدا عن المصايب والجنان اللي بيعملوا نبدأ بالكبيره شمس أو مليكه ''
عنان: خدوا عندكم اكتر حاجه شمس بتكرها اني حد يناديها مليكه اما بقى سبب كرهها لده فاحنا مش هنقدر نقوله
استغرب سيف وادهم وهنا كملت
'' شخصيتها بقى تعتبر شمس أقوى واحده فيهم جبروت بمعنى الكلمه مش بتحب التسرع وذكيه جدا جدا بس ده مش معناه اني الباقي مش اذكيه لا هما اذكيه برضو بس الفرق اني شمس بتفكر بعقلها الأول وبعدها تتصرف وبارده ومش سهل انك تعصبها ولو اتعصبت يبقى يوم مش باينله ملامح لاني لو هتهديها دي حاجه صعب جدا والحته دي فالكل بس شمس بتبقى شيطان بمعنى الكلمة وذكائها بيبقى شيطاني علشان كده عمر ما حد يعرف ابدا شمس بتفكر في أيه ''