أحببتك في الخفاء باللهجة الجزائرية 💌

𝑺𝒎𝒂 𝒂𝒏𝒅 𝒊𝒕𝒂𝒎 🩷

سما :
فات عام ، حياتي كانت تتمحور على ايتام و جيران  و قرايتي و كي نقول جيران نقصد زاك و صوفيا لي ولات دارهم لاصقة فينا و رائف مقابلني و اريان دا شقة في نفس بلاصة لي نسكنو فيها و حتى ريتال كان من مفروض تكون في نفس حومة بصح رفضت و فضلت تبقى في إقامة جامعية حتى تكمل تجهيز و يديرو العرس
ايتام كي العادة ، يعاوني في قرايتي و حتى ولا يديرلي بحوث بما اني رجعت ل عادتي وليت نتكاسل على قراية ، كنت حاطة راسي و قاعدة في صالون مربعة رجليا و بيسي قدامي ، طلعت شعري كعكة و درت نواظري ، ياربي مافهمت والو معادلات صعاب وفي هادي فترة وليت نتقلق بلخف و عصبية فوق لازم و حتى وليت حساسة بزاف ، سمعت باب ، رحت نجري نشوف شكون مالقري علابالي بلي ايتام  ، جريت عندو و سوطيت عليه ، لفيت رجليا عليه ، طلعني حتى قابلتو
ايتام : واشبيها برانساس
: توحشتك
دفن راسو في رقبتي
ايتام : انا كثر
داني ل صالون لقا وراقي في كل بلاصة كي العادة ، قعد فوق فوتاي و انا فوق حجرو
ايتام : نتي كل ماتقراي لازم ديري حرب
: هوما دايرين منهج صعيب ، معرفتش نحلهم وحدي
ايتام : ارواحي نقريك
: لا منقراش
شاف فيا
ايتام : و علاه متقرايش
عينيا تغرغرو بدموع و بديت نبكي ، رفدت ورقة وريتلو
كانت ورقة تع اختبار ديت فيه 20 من 100
عنقني و دار يدو مور ظهري
ايتام : ياك كنتي مريضة و مقريتيش و مرة جاية تجيبي نقطة مليحة
: بصح كاين لي مقراوش و داو 50 قالو ساهل غير انا شوف نقطة لي جبتها
حكم اختبار و قعد يشوف في اجاباتي و اسئلة
ايتام : سؤال 5 يعتمد على ذكاء و راكي جبتيه صحيح و سؤال 10 معادلة صعيبة و حليتيها و باقي كلو حفظ
مسحت دموعي و شفت في ورقة و صح خرجو اسئلة تع ذكاء و لي يعتمدو على فهم جبتهم صحيح و بما اني مرضت مقدرتش نحفظ
ابتسمت معاه و بستو في خدو ، كان يديرلي كوراج ، كون ماشي هو كون راني حبست من شعال
ايتام : ايا بكاية تاعي وجدي روحك
: ويين
ايتام : ماشي كنتي تحوسي على طنوبيل ،لقيتلك وحدة
: صححححح !
ايتام : امممم
بستو في شفايهو و جريت طلعت دروج تحت عياط ايتام كي العادة باه نعس روحي
لبست اول حاجة جات في يدي درت خيماري
و هبطت عند ايتام
لقيتو يستنى فيا ، وهبطت رحنا لاميزون تع طنوبيلات و قعدت نختار و نشوف ، و مع تالي قلبي راح لامبرغيني و هاد مرة كانت اخر طراز و خيرتها في نواغ
: واش رايك
ايتام : شابة كيفك
دار عقد معاهم و منعرف ل هادوك وراقي ،هدرت مع صوفيا و عرضتنا ل عشاء
: حبي
ايتام : اممم
: حطني هنا نشري قاطو ، صوفيا عرضتنا ل عشاء
نزلت معاه ، شفت قاطو بصح ريحة تاعو منعرف علاه قلبتلي خاطري
: واش هدي ريحة
ايتام : تاعش ريحة 
خرجت برا نجري و رديت كلشي
ايتام : سما واشبيك
: ريحتو مشي شابة
غسلي وجهي و مشاني ل طنوبيل ، ركبت معاه و خليتو هو يشري قاطو ديجا راني فشلانة
وصلت عند صوفيا
صوفيا : مزية جيتو راح نقلع شعري
ضحكت عليها
: راح تشيبي قبل وقت
صوفيا : راني شبت و كملت و رحت فيها
غير سمعت صوت بكاء راحت تجري و انا دخلت رفدت ايدن و ايتام راح عند زاك يشوف وين رآه
: كبر بلخف
صوفيا : غير لبارح ولدتهم و ليوم راكي تشوفي راح يخرجوني عقلي
كان رايدن يشد في شعرها و هيا تبعد ، ايدن كان هادئ و يبغي رقاد شوية هك و جاو كامل ريتال و رائف و سام دخل رافد انيا
ريتال : وييييين رآه وليدي
دخلت تجري عند رايدن ، بسك كان يتفاعل اكثر من ايدن في هدرة ، شفت في ايدن و بستو من خدو ،زادو في نفس وقت من نفس كرش بصح شخصياتهم مبدلة
كنا قاعدين انا و صوفيا و ريتال بعدما مدت ايدن ل زاك و رايدن ل ايتام و انيا ل سام
صوفيا : واخيرا كملت مع تربية
: راكي وزعتيهم كي حلوى
صوفيا : دوك تولي اونسانت و تشوفي معاناة
: انا !! مشكيتش
صوفيا : علاه راكي في عام و نص زواج
: راني نشرب دواء ، قراية وحدها راهي مخليتني نهبل
ريتال : نتي درتي تخصص صعيب
: صعيب بصح واش راح ندير إنه تخصص احلام
ريتال : احم اسمعو
: غير الخير
صوفيا : كي حمحمتي معناها موضوع صح رآه خطير
ريتال هبطت راسها و حمارت
:زواج ...قصدي كي تتزوجو ... تتوجعو
طرطقنا انا و صوفيا عليها بضحك
صوفيا : انا تزوجت و وولدت و راني حية
: اه يا ريتال غير بداي ترجفي من دروك
صوفيا : عشنا و شفنا ريتال تحشم
ريتال : منزيدتش قاع نسقسيكم مالا بعدووو ، كنا نهدرو 
و كنت قاعدة معاهم حتى جا ايتام راح يعطيني ايدن بسك رقد ، غير قرب مني دورت وجهي
: ايتام واش هدا
شاف فيا
ايتام : واش ؟
: ريحتك يا ايتام ريحتك علاه بدلتها
شم روحو و شاف فيا بإستغراب
ايتام : هادي ريحتي لي موالف نديرها
: بعد بعد عليا ، مانيش حاملة ريحتك
ايتام : منيتك سما ؟ واقيل مراكيش تشمي
هربت منو و رحت عند صوفيا
صوفيا : واش قتيلو ؟ سيد رآه غير يشم في روحو
: ريحتو معلاباليش قاع واشبيها ، مشي شابة
شفت في صوفيا و ريتال لي طارو عليا يعنقو
: يااااا واشبيييكم
صوفيا : نوضي معايا
طلعت معاها مدتلي باطة مبلعة ، دورت نقراها
: واش هدا
صوفيا : تاست
لقيت تاست حمل
: منيتك راني نشرب دواء وين راح يجيني حمل
ريتال : مشي كامل دواء يقدر يمنعلك حمل بلاك حملتي
: لا مستحيل نحمل ، اصلا يقلك حامل تاكل و انا بالعكس  راني غير نتقلش
صوفيا : هدا وحم و على حساب شوفة ، وحم جاك عليه ، مسكين ايتام راح يعاني
درت تاست في ساك ، علابالي بلي مستحيل نحمل كنت نشرب دواء بانتظام و طبيبة لي عطاتولي خبرتني بلي احتمالية حمل فيه 5./.
هبطت تحت و ودعتهم و رحت
كل دقيقه ندور نخزر في ايتام ، زعما صح ؟ هو كان دايمن يخبرني بلي معندوش مشكل مع اولاد ووقت ما حملت حملت
ايتام : واشبيك متقوليليش ريحتي برك
: لآلا تفكرت ولاد صوفيا و زاك
ايتام : ايدن خرج ل بوه
: و رايدن خرج ل صوفيا ، واش رايك في لولاد و تربية
كان يسوق بصح سؤالي جاه عادي ، كان عارف بلي مراحش نحمل دروك
ايتام : عادي عارفتني بلي معنديش مشكلة نربي و بالعكس ولادنا بسك قطعة منك راح نكون اسعد انسان نهار يجو ل دنيا
ابتسمت معاه و هبطت راسي ، مبغيتيش نقولو ، خفت لا يكون كلشي غالط
بعد شهر :
فات شهر و مجربتش تاست مع لول كنت مترددة و بعدها نسيت موضوع اعراض عندي كانت مختلفة على اعراض حمل
دخلنا ل شتاء و برد بدا يدخل مع اول كانت فيا دوخة و قلت ڨريب برك بصح  موضوع طول بقيت شهر غير راقدة و نحس بفشلة
هدرت مع صوفيا
صوفيا : منيتك ، كون تجربي تاست واش راح يصرالك علا اقل نحي شك
: خايفة يا صوفيا مرانيش باغي نتأمل بلي راني حامل و نبقى كل خطرة هك و نتوسوس و نخاف اني نكون عقيم
صوفيا : واش دانا ل عقم
: دواء لي كنت نشربو فيه احتمالية انو نولي عقيمة ، مخبرتش ايتام عليه ، بصح هدا وين حاسة بلي خربتها
صوفيا : يا سما كيفاش تشربي حاجة تديك ل عقم
: خايفة من مسؤولية , كون منعرفش نربيهم ، منعرفش نمدلهم حنان و نخليهم يعانو و يتمنو كون مزادوش
صوفيا : كنت خائفة من تربية بصح كي تولدي و احساس امومة حاجة اخرى راح ديري كوراج علا ولادك و تتعلمي تربي و تحسي بيهم 
بعدما كملت هدرة مع صوفيا ، حكمت تاست و دخلت ل دوش درتو بصح يدي ترجف ، مبغيتش نشوف نتيجة خايفة ، لقيتها زوج خطوط ، قعدت نشوف بصدمة واش قصدهم ب زوج خطوط بلاك راني غالطة باينة راني غالطة بلاك انعميت
هبطت عند رائف لقيتو متكي و يتفرج
: ايتام
دار ليا و غير شاف دموعي ، قرب مني
ايتام : برانساس واشبيك
: واش معنى زوج خطوط
شاف فيا و عقد حاجبو ،
فهمت بلي مفهمنيش
: كي نديرو تاست حمل و يخرج زوج خطوط واش معناه
ايتام : على حساب منعرف ، معناه كاين حمل علاه تسقسي ؟
كان يهدر عادي ، متوقعش بلي سؤالي كان عليا و كنت نقصد بيه روحي ، حطيتلو تاست في يدو ، شاف زوج خطوط
ايتام : تاعمن هدا ؟
: تاعي
غير قتلو تاعي ملامحو تغيرت ، كان يشوف فيا بصدمة
ايتام : تاعك تاعك ؟
درتلو براسي ايه و بعدها رفدني و دورني و بدا يعيط ، فرحة تاعو كانت باينة
: ايتام حطني ريحتك
غير قتلو ريحتك حطني و طلع يجري
: وين رايح
ايتام : ندير ريحة واحد اخرى
ضحكت عليه
: ميهمش ، مام تبدلها راح نبقى هك يسموه وحم
خبرت صوفيا و درت حفلة صغيرة