أحببتك في الخفاء باللهجة الجزائرية 💌

27

إيتام
كنت في طنوبيل تع سيفيل ، نظرات سما و شهقاتها و بكيتها كيفاش حسيت بيها طاحت صوتها لي كان يرجف ، قاع هادو راهم يحرقو فيا ، علابالي قراري يضرها بصح راح توالف راح تتعود بسك هيا تسحق تعيش ، اذا بقيت معاها راح يقتلوها كيما دارو ل يما و لأنو بابا كان قرارو يقعد مع عايلتو و يحميهم قتلوها ، مراحش نعاود غلطة تاعو لازم نروح في هادي مهمة
قلبي كان يتزير عليا ، حاب نولي و نعنقها و نقلها رجعت بصح ل مصلحتها
شفت تلفوني يفيبري لقيتو رائف
عقدت حواجبي ، اتفقنا بلي مراحش يناقشني في قرار اذا فات و خرجت من باب ، رفدت عليه
رائف : إيتام ارجع
صوتو كان مخنوق ، دقيقة راه يبكي !
نقزت من بلاصتي خليت تع سيفيل يشوفو فيا ، و دقيقة شفت تلفوناتهم يصونو هوما تاني ، حسيت بنفسي ضياق عليا
:واش كاين رائف اهدر
سمعت لابوليس و لومبيلونس من موراه
رائف : سما ...سما ق..ت..لت ر..وحها
حسيت بقلبي و عروقي جمدو في هاديك دقيقة مأمنتش كلمات لي راه يقولهم رائف و مستحيل نأمنهم ، سما مستحيل تخمم تقتل روحها ، سما مازالت عايشة ومازالت تتنفس ، كذبة و مستحيل نأمنها
: ل مكان حادث
هدرتها ببرود على عكس نار لي راهي فيا داخل ، مرتي و برانساس تاعي لي داتلي عقلي و قلبي معلاباليش واش رآه صاريلها
حطيت يدي بين راسي رؤية ضبابية ولات تروح و تجي تصويرتها بين عينيا ، تخيلت صوتها و هيا تعيطلي و كي كانت شادتني باه منروحش
فطنت من دوامتي وقت حبس موتور طنوبيل و  طلعت راسي
شفت من تاقة شريط مداور على طنوبيل محروقة ، طنوبيل حمراء ، قلبي كان يحرق بصح علابالي بلي مستحيل تكون سما ،. قلبي يقولي راهي عايشة هبطت من طنوبيل شفت رائف طايح في لرض و سام واقف حاط يديه على راسو ، حسيت ب لينار ، متقبلتش نشوف هاد موقف لي راهم فيه
حكمت رائف و نوضتو من كول تع شوميز ، كان مهدود و عينيه طافيين ، كرهت واش راني نشوف فيه هيا مماتش عروقي تزيرو عليا ، معلاباليش وين راهي كمية ضرر لي راهي فيه
ضربتو ب يدي لي ولات مزيرة  ل وجهو
بقيت نضرب فيه و نعيط ، كانت ل اول مرة نضرب رائف بنفس طريقة لي نضرب فيها مجرمين ، بصح غضبي منو راه كبير لدرجة نخمم نقتلو علاه محماهاش
: قتلك راهي في أمانتك ، خليتها في أماانتك وين كنتنت اه وينننن كنت ،  راح ترجع
غير قلت راح ترجع طلع راسو يشوف فيا
: راح ترجع و تنسى تشوف وجها راك تسمعععع مرتي مماتش راح ترجع و داك وقت تنساها ،تنسى بلي عندك أخت،  مراحش نخليها تشوف اخ مهمل
كنت نعيط بصوتي خليتهم قاع يسمعوني حتى حسيتو قدم ليا و عنقني
رائف : سامحني
بعدتو عليا
:  سما راح ترجع و هيا لي تخمم اذا تسامحك ولا لا
غير سمع واش قلت بعد عليا ، جا سام عندي و زاد هو عنقني
سام : الله يرحمها
حسيت ب زعاف تع دنيا كامل مور هاد كلمة حسيت بوقت يحبس قلبي مزال يهبط بإسمها
بعدتو عليا و ضربتو بجهدي لدرجة رجع مفرش في لرض و معمر دموم
بقيت نضرب و نردد
: مرتيييييي ممممااااااتش ، سمااااا راح ترجع سمعتتتت
حسيت بعفسة تبيكات في رقبتي و بعدها طحت مراني حاس بوالو